2
1 داي ضارت ن-ؤينّا، ثنّا حنّا ݣ تژالّيت نّس: «ئفرح وُول ئينُو س ربّي. أها ئسمغور شّان ئنو داث ن-ئعداون ئنو. فرحخ ئدّخ ئيفوكّا ربّي.
2 ؤر ئلّي ونّا ئقدسن أم ربّي، ؤر ئلّي غاس ربّي أها ؤر ئلّي شان ئسّلي ئصحان أم ربّي نّخ.
3 كساث لكيبر، ؤر-ئتفّغ واوال ؤر ئحلين زݣ ئماون نّون. ئتخ ئعالم مولانا خف كولشي أها أر ئتحاساب ميدن خف لفعايل نّسن.
4 ئيتّورزا سلاح ن-وينّا ئوعرن، ئد ئمضعاف أغول جهدن.
5 وينّا ئدجّيون عايدن دا خدمن غاس خف ئدوسان نّسن. ئد ئيمژلاض ياغول ئيشايض غيفسن لخير. ثنّا ؤر دا ئتّارون ثورو سبعا ن-ئشيرّان. ئد ثنّا غر لّان شيݣان ؤر ثقّيمي دا-تّارو.
6 ربّي أيدّاي ئينقّان أر ئيتحيو، نتا أيدّا ئسضارن غر ثمضلث أها أر زّيكس ئسكّار.
7 ربّي أيدّاي ياكّان أر ئتكس، أر ياكّا دّلث أر ياكّا لعزّ،
8 أر ئسكار لمساكين زݣ وشال د ئيمژلاض سݣ ئيغد، ئسغيمثن د-ئخثار أها ئيشاسن تانباط د لعزّ. ئتخ ربّي أمّي ئݣا واشال وينس د نتّا أيد تيسرصّان.
9 ربّي أيد دا ئحطّون وينّا ثيت وقّارن، ئد وينّا ؤر ئحلين دا تمثاثن ݣ ثيلاّس. ئتخ بنادم ؤر دا يترّو س لجهد نّس.
10 وينّا ئيتعنادن ربّي دا رژّان. د زݣ ئݣنّا دا ئسضيقّيس مولانا تيݣناو خف ئيعداون نّس. ئتخ نتّا أيد دا ئحكمن خف دّونيت كول أها أر ياكّا لعزّ يي وݣلّيد ن شّعب نّس د لمجد يي وݣلّيد نّا ئخثار».
11 ثفّير ن-وينّا، ئعايد قانا غر ثادّارث نّس ݣ تمازيرت ن رّاما. ماشان أربا ئيقّيما أد ئيݣ أخدّام ن ربّي غر عالي أكهّان.
أرّاو ن عالي
12 ئد أرّاو ن عالي كّان خّان شيݣان ؤر سّين ربّي.
13 د لحق ن-ئكهّان خف شعب. أدّاي د ياوي شان ؤرياز ثامغروصث، داد ئتدّو ؤخدّام ن-وكهّان ݣ لوقث ݣ دا ئنݣّا ؤكسوم ياسيد ديتس لفرشيطا ثخثارث م شراض ن واشّيون.
14 أها ئيژّوت ݣ ؤوكسوم أر أمّاس ن تروكوت. داي ئينزغتيد أينّا تصرو ݣ واشّيون نّس، ذا ثيتّامژ ؤكهّان يي ييخف نّس. أياد أيد كّان أر تݣّان ديما يي وارّاون ن-إسرائيل نّا ديدّان غر ثمدينث ن شيلوه.
15 ديخ أر ئتدّو ؤخدّام ن-ؤكهّان غر بو ثمغروصث، قبل أد ئسغوس ثادونث ئنّياس: «شيد أكسوم ئ-ؤكهّان أتشنفخ، ئتخ ؤر دا ئيتقبال أكسوم ئينوان دا يتّيري أكسوم أزݣزاو».
16 داي مشاس ئينّا ؤورݣاز: «ݣاني أرد سغوسخ ثاذونث أبعدا، داي تامزد أينّا ثريد». ذاس ئيتّيني ؤخدّام: «لا شيد دغي نغد أداش ثكسخ س دّرع».
17 داي عدّونث لمعصيّاث ن وارّاو ن عالي شيݣان داث ن ربّي، ئتخ حقّر ثيمغراص ئتّوشان يي ربّي.
لخدمث ن صَمُوئِيل
18 ئيكّا صَمُوئِيل أر ئخدم يي ربّي ݣ ثمزي نّس. أر ئنسّا لكسوث ن لشتّان ن-ئكهّان. ئسم نّس "أفود".
19 ثيلي مايس أراس ثعدّل ثاجلاّبيث ثمزيانث. أر-است تّاوي كّو أسݣاس أدّاݣ ديدّو ؤؤورياز نّس أديش ثامغروصث ن-ؤسݣاس.
20 داي ئبارش عالي ألقانا د ثمطوط نّس، ئنّاس: «ربّي أذاش ئيش ثاروا ݣ ئيلاّ لخير زݣ ثمطوطّ-اد ݣ ؤدغار ن-ؤربا نّا ثهدام يي ربّي». داي عايدند غر أنسا نّاݣ زدغن.
21 داي أليݣ د-يشثي ربّي حنّا ثاسي أر تّارو ثارو (تيرو) شراض ن-ئوثمان ذ سناث تشيرّاثين. ئد صَمُوئِيل ئݣماد ݣ لخدمث ن ربّي.
عالي د ورّاو نّس
22 داي ئوسّير عالي شيݣان. ياوطّين مادّا تݣان ورّاو نّس يي ثاروا ن-إسرائيل كول د ئس أر تزنون د توثمين نّا أر ئخدمن ݣ لباب ن ثخامث ن-ؤجمّوع.
23 داي ئنّاياسن: «ماخ ألّيݣ دا تݣّام أم لفعايل-اد؟ نكّين سلّيخ يي لخبار ن لفعايل نّون ؤر ئحلين زݣ شعب كول.
24 ﻻ، أ-يارّاو ئنو، ئيخّا واوال نّا غيفون ئتيانّان أينّا مي سليخ ن ووال دا يتضور ئنݣر شعب ن ربّي.
25 مش ئخضا بنادم ݣ لحق ن بنادم ربّي داس ئتخلّاص، والاينّي مش ئخضا بنادم ݣ ربّي، مايد ئينّان أد ئحشم ئنݣراتسن؟» والاينّي ؤر سلين يي ووال ن بّاسن. ئتخ ئيرا ربّي أتن ئيخلو.
26 ئد أربا صَمُوئِيل أر ئتخيثير ݣ رضا ن ربّي ذ ميدن
27 يان واس، ئدّاد يان نّبي ن ربّي غر عالي أها ئنّاس: «ئمشيتخ أيدّاي تّيني ربّي: "ئيس ؤر سنعيتخ ئخف ينو يي لاجدود نّش ݣ مصر ݣ تادّارت ن فرعون،
28 أها خثارخث زݣ ومّاس ن ثقبيلين ن-إسرائيل أد ݣين ئكهّان-ئنو أها ألين خف "ؤوسغرص" ئينو أها سغوسن لبخور نّسين أفود داثي؟ ئس ؤور-اسن شيخ أمور نّسن ݣ ثمغراص تݣن ورّاو ن-إسرائيل؟
29 ماخ ألّيݣ ثحقّرم ثامغروصث ئنو د ثوكّي نّاس وصّيخ ݣ ثادّارث ئنو ئقدسن، أها ثزوُرد أرّا نّش غيفي حما أد سݣمن ثادونث زݣ ماي ثخيريم ݣ ثمغراص كول تݣن وارّاو ن-إسرائيل شعب ئينو؟
30 خف ؤينّا دا يتّيني ربّي ن-إسرائيل: "سنّيت نّيخ آيث تادّارث نّش د تادّارث ن بّاش أد خدمن داثي أبدا". والاينّي دغي ئنّا ربّي: "ؤسار ئيلّي ؤوينّا، ونّا ئسّي ئسّمغورن دا ث سمغورخ، ئد ونّا يي تحقّار دا ئتّمژي.
31 ها ؤوسّان أد دّون نّاݣ ش تْعَقَابخ عاقبخ ثادّارث ن لاجدود نّش ؤر ئتغيما أود يان ؤمغار ݣ ثادّارث نّش.
32 أها ثينِّيْث زيّار ݣ ؤزدوغ ئنو، ؤر تعيشد ݣ لخير نّا دّيخ أد شخ يي وارّاو ن-إسرائيل ؤسار ئدّي أد يلي ؤمغار ݣ ثادّارث نّش ؤسّان كول.
33 والاينّي دّيخ أد-ادجخ شا ؤرݣاز زݣ ثادّارث نّش أد-ئخدم داث ن-وسغرص-ئنو، أرد وحلنث واللن نّش س-ئيمطّاون أها ئيفسي وُول نّش س لحزن أها مثن كول وارّاو نّش ݣ ثعورما نّسن.
34 س ثماثارث أد مثن وارّاو نّش حوفني د فينحاس سّين نّسن ݣ يان ن واسّ ثيسيند ئس ئيصحا واوال-ئنو.
35 أها خثارخ ئ-ييخف ئنو أكهّان ݣ ثلاّ نّيث أد ئخدم س-ؤينّا ئيرا وُول-ئنو يريث لخاضر-ئنو، أها بنوخاس ثادّارث ن لمان أها ئدّو داث نُ وْنّا خثارخ ؤوسّان كول.
36 أها كول ونّا ئقّيمان ئدّر ݣ ورّاو نّش أد ئدّو أداس ئسجد خف شان شوي ن-ئيقاريضن د توغريفث ن-ؤغروم"، ئناياس: "أدجّي عفاش أد عاونخ ئ-شان يون ݣ ئكهّان حما أد شّخ أقشور ن-ؤغروم"».