راعوث
1
لاژ ي تمازيرت ن يهوذا
1 ي وُوسّان ن شحال أيا، النّاي كّان أر حكمن غاس إيد القاضي ي إسرائيل، إيكّربوهيّوف ي تمازيرت. إيدّو يون أورياز زݣ تمدينت ن بيت لحم ن يهوذا غر تمازيرت ن موآب أدّييس إزدغ نتّا د تمطوت نس د واراو نس سّين.
2 إسم ن ورياز أليمالك، ئد إسم ن تمطوت نس ناعومي، ئد أراو نس يون إسمنس محلون ئد وايظ إسم نس كيليون، ئد نيتني ݣان زݣ تقبيلت ن ايث إفراتَا زݣ تمدينت ن بيت لحم. دّون غر يوت لجيهث ي تمازيرت ن موآب أها ژدغن ديݣس.
3 ديس أي إمّوث أليمالك أرياز ن ناعومي أها ثتقّيم نتّات د وراونس سّين.
4 أولْ واراو نس إيخفاون نسن ثيوثمين زݣ تمازيرت ن موآب، إسمن ثمزواروت عورفة، ئد ثيسناث راعوث. أها زدغن ديس أم عشرا نيسݣّاسن.
5 مثن واراو نس السّين: محلون د كيليون. ثقّيم ناعومي غاس نتّات بلا أرياز ؤلا أراو.
ناعومي د تسلاثين نّس
6 ثكّر نتّات د تسلاثين نس أتسعايد زݣ لجيهث ن تمازيرت ن موآب، إتخ ثسلا ديس إيس ديشثي ربّي شّعب نس إيكساسن بوهيّوف.
7 ثفّغ زݣ تمازيرت ن موآب النّاي ثكّا نتّات د تسلاثين نس سنات، الدُّونث يوبريد أدعايدنث غر تمازيرت ن يهوذا.
8 ثنّاسنث ناعومي إثسلاثين نس: «عايدمث غر ثخامين ن-ئد مّا نكنث! إيسول ربّي أداكنث إيݣ الخير نس أها ييلي ديدكنث أبدا، إمشينّا ثكّامث ثيامث ي ويد إمّوثن د ديّيي.
9 أداكنث إيف يهويه ربّي الرّاحث، إيشاكنث ثيخامين نكنث ديريزن كُونث إيتّاول». مْيْرَانْثْ إغالن أرترونث أللّي شملنث ثلا سيغويّان.
10 النّانثاس: «لا أديدم نمون غر مدّن النّم».
11 ثنّاسنث ناعومي: «الدّومث عايدمث أ ثاراوين ئنو! ماخ أتدّومث إيدي؟ إيس سولخ ياد أدّاروخ أراو كونث إيتّاول؟
12 عايدمث عفاكونث أثارّاوين ئنو، الدّومث. أوسّيرخ شيݣان خف ييول. وخّا إيولخ أريازإيظا ئد أدّاروخ أراو.
13 إيس ثغيمث أتݣّانّيمث أرد خاثر؟ ؤر تظماعمث إيريزن كنث إتّيلين؟ لا أثارّاوين ئنو، ثحرّا ثيثي نوفوس ن ربّي غيفي أوݣار نكنث».
14 هزّانث إغوييّان زايدنث يي ثلا. داي ثنّاس عورفا يي ثامغارث نس بسلاما، ئد راعوث ثشبّر دييس.
راعوث ثقّيما د تمغارث نّس.
15 ثنّاس ناعومي يي راعوث: «هان أوتمازيرت النّم ثعايد غر القوم النّس ديد ربّي النّس، ثفور أولتمازيرت النّم!»
16 ثنّاس راعوث: «أدور زّييّي اتتر أدبظوخ إيدم أدعايدخ زݣ ظرام. دينّا غر ثدّيد أدغورس الدّوخ، دينّا ي ثزدغث أديّيس زدغخ. لقوم النّم أديي وينو، دربي النّم أديي وينو.
17 دينّا يتمثاث، أدّييس مثخ أها مظلّي ديس. الترخ يي يهويه ربّي أديي عاقب شييّان مش ور ييخ إمشيس، أوريي إيبطّو ديدم غاس الموث!»
18 ثنّايت ناعومي إيس قّور إيواليون نس، ثرا أديس ثمون، أورياد إيتس تزايد ݣ ووال.
19 أها الدّونث سنات نسنث ألّيي نّيوضنث غر تمدينت ن بيت لحم. رار مدن كول ن تمدينت غورسنث البال، النّان: «هاش ناعومي».
20 ثنّاسنث ناعومي: «أدوري القّارمث ناعومي (لمعنا نس ثادإيطرحن)، ماشا غريمثي "مارّا" (لمعنا نس ثامخيبث خف ثحرّا الدّونيت). باب ن القدرا إيسحرّا تودرت ئنو شيݣان،
21 إتخ فغخ س-يفاسن إعمّر. إيراريد يهويه ربّي س-يفاسن خوانين. إيماخ أديث قّارمث ناعومي؟ يِيلي يهويه ربّي يشاهد الظد ئنو، باب ن القدرا إيعاقبييّ».
22 أها ثعايد ناعومي د راعوث ثاموآبيث ثيسليت نس، نّا ييتس ديعايدن زݣ الجيهث ن موآب. الدّوند غر بيت لحم ي البدو نتمݣرا ن ثمژيين.