2
راعوث دولاقظ ن ثزلفين ݣ-يݣر ن بوعز
1 ييلي غر ناعومي يان أوليهل نوريازنس إدجيون شيݣان، يان أورياز غر إعدّا لخير، زݣ ثݣمّي ن أليمالك إسمنس بُوعَزْ.
2 ثنّاس راعوث ثاموآبيث يي ناعومي: «عفام أدجّي أد الدّوخ غرإيݣران أدلاقظخ ثيزلفين إيتّوتّين. بار أدافخ الرحمث يشا ن يون». ثنّاس: «الدّو أيلّي».
3 أها ثدّو أرتلاقّاض الفّير نيشݣّال. داي أور تدّو غاس غر إيݣر ن بوعز، نّا يّان زݣ ثݣمّي ن أليمالك.
بوعز دايتّوَصّا خف راعوث
4 ألّيي ديعايد بوعز زݣ بيت لحم. إينّاسن إيشݣّال: «يهويه ربّي إيدون!» النّناس: «أشيبارش ربّي!»
5 إيسال بوعز أنبداد نيشݣّال نس: «مامي ثيا ثرباثّين ثينس؟»
6 إجاوبث أونبداد نيشݣّال إينّاياس: «يات تربات ثاموآبيث، تنّا ديعايدن د ناعومي زݣ لجيهث ن موآب،
7 ثنّايي: "عافاش أدجّي أدلاقظخ ثيزلفين ظارث نيشݣّال، أورثبدّي زݣ ثيفاوث أر دغي، هان مايثزدغ ݣ أُويين ن تادّارت ثامژيانث"».
أوال ن بوعز د راعوث
8 إينّاس بوعز يي راعوث: «إيس دا تسفليد أيللّي؟ أدور تدّو أت تلاقطّ يشان ئݣر ياظن، أدور زرّيي إيݣر تخ، قّيم غر ثخدّامين ئنو.
9 أللّن نم أديلينث خف ؤينّا مݣر، تدّو ظراسن، هاثين وصّاخثن أدورشم تحدان. أدّاي شم إنغ فاذ ثدّود غر إقلاّل ن وامان تسوث زݣ أويينّا ديوين إعرّيمن».
10 ثاتّوي خف وودم نس غر أشال ثشرم دثاس، ثنّياس: «ماخ ألّيي ديش أوفيخ الرحمث عاد إستسّنث ئد ثاغريبث أيد ييخ».
11 إجاوبت بوعزإينّاياس: «ئتّوعاودييي كول ؤينّا ثييث إثمغارث النّم أيللّي إيمّوث أورياز النّم. ثزريث الوالدين النّم، تمازيرت نّا ي ثلوليث. ثدّود غر لقوم نّا ورثسّينث قّاح.
12 ربّي أدغيفم إيخلف شييّان أها إيشمل ليخلاس النّم زݣ يهويه، ربّي، باب ن-إسرائيل، نّا مي ثاغث أمور ثفّرث الدّاو ن وافريون نس».
13 ثنّاس: «أوفيخ دييش الرحمث أسيدي. ثسمغورثي. ثسيولث سيواليون ن ييوظن أوول ن تسمخث نش. وخّا ؤر وثاخ أديخ أم يوت زݣ تسمخين نش».
14 ينّاس بوعز: «ي لوقت ن ووتشّي تدّود غر دا أتتشد الحق نم نوغروم، ثغمسث إيدنخ». ثقّيمث ثمان إيشݣّال. إيشاس بوعز ثيزلفين يورفن. ثتش ألّيي ثدجيون أها إيشايظاسد.
15 ثكّر أت تلاقض. يامر بوعز إيخدّامن نس: «أدجات أت تلاقض أود إينير ثادلوين أدور تتحݣراث سيواليون نّون.
16 أها ثستوتّيم شان ثزلفين زݣ ثادلوين ثادجيمت أت تن تلاقض، أد-ور-اس التّينياث شان واوال إيخّان».
بوعز أمكّاسو ن ناعومي
17 أها تقيم راعوت أرتلاقاض أر ثادݣّات. ثدز أينّاد تلاقض. ثافن لعبار ن يوت الإيفا (أم 22 كيلو) ن ثمژيين.
18 ثاسي ثيمژين ثعايد غر تمدينت. ثنّاي ناعومي، ثامغارث نس أينّا تلاقض. ثاسيث. داي ثشاس راعوث أود أينّاس ديشايظن زݣ ݣُوتشي إيعدّان شيݣان.
19 ثسالت ثمغارث نس: «مانيݣ تلاقطّ أسّا؟ د ما نيݣ ثخدمد؟ أديبارش يهويه، ربّي واد ديݣم إيطهلاّن أسّا». داي ثعاوداس إثمغارث نس ما تݣا د مايد ثخدم ثنّاس: «إيسم نورياز نّا دخدمخ أسّا "بُوعز"».
20 ثنّاس ناعومي إيثسليت نس: «أديتّوبارش يهويه، ربّي نخ أوريكّيسن الرحمث نس لا زݣ النّيي وينّا الدرّين ؤلا وينّا مّوثنين». ثزايد ثنّاس ناعومي: «أولاهل نخ أيديّا وريازالنّا زݣ وينّاخ إيتكّوسن».
21 ثنّياس راعوث ثاموآبيث إينّاي: «القّيم غر ثخدّامين أرد تشمّل ثمݣرا غوري».
22 أها ثنّاس ناعومي يي راعوث، ثيسليت نس: «أيلّي يوفام أت تقّيمت د ثخدّامين نس أدورغيفم إيتبسّال شان يون إشا ن ئݣر ياظن».
23 ثقّيم د ثخدّامين ن بوعز أرتلاقاض ألّيݣ شمّل زݣ أومݣر ن ثمژين دومݣر نييرذن. أها ثزدغ د ثمغارث نّس.