3
ربّي دا-ئقّار ئ-صَمُوئِيل
1 ئد أربا صَمُوئِيل ئيقّيما دا ئخدّم يي ربّي دّاو ن-تنباط ن-ؤكهّان عالي. ݣ لوقت نّا ئدروس واوال ن ربّي د تويرݣا زݣ غور ربّي دروسنت ݣ وُوسّان نّا.
2 يان ييض، ئيݣنا عالي ݣ وانسا نّس أها ئوحلاس ئيژري، ؤر ئيقّيمي دا يتراعا شا شيݣان.
3 أود صَمُوئِيل ئݣنا ݣ ثادّارث ن ربّي نّاݣ ئلّا تّابوث ن لعاهد ن ربّي، أها ئسول ؤوسيد ن ثادّارث ن ربّي ؤر ئخسي،
4 داي ئيغر ربّي يي صَمُوئِيل. ئيجاوبث صَمُوئِيل ئنّاس: «هايي».
5 داي يازل غر عالي، أها ئينّاياس: «تغريدي، هانك دّيخد!» أها ئنّاس عالي: «ؤور-اش غريخ، دّو أتݣند». داي ئعايد صَمُوئِيل غر أنسا نّس ئيݣن.
6 داي ئيغر ربّي ئ-صَمُوئِيل تيكّلت ثيسناث، ئيكّر صَمُوئِيل داي ئدّو غر عالي أها ئنّاس: «تغريدي، ها نك دّيخد». داي ئجاوبث عالي: «لا، أممّي! ؤر-اش غريخ، عايد أتݣند».
7 ماشان صَمُوئِيل ئسول ؤر ئسّين ربّي، ولا أس ئيضهر ووال ن ربّي.
8 داي ئيغر ربّي يي صَمُوئِيل تيكّلث ثيس شراط، داي ئيكّر صَمُوئِيل ئدّو غر عالي أها ئنّاس: «تغريدي، ها نك دّيخد». داي ئيفهم عالي ئد ربّي أدّاي ئيقّار يي لعيل،
9 داي ئنّاس عالي يي صَمُوئِيل: «دّو أتݣند، داي مش آش ئيغرا ديخ ئيناس: "سيول أ ربّي، أخدّام نّش داش ئسفليد"». داي ئدّو صَمُوئِيل ئيݣن ݣ وانسا نّس.
10 داي ئدّود ربّي ئيبد أها ئيغراس يي صَمُوئِيل أم تيكّال ثيمزوُورا: «صَمُوئِيل، صَمُوئِيل». ئيجاوبث صَمُوئِيل: «سيول أ سيدي، أخدّام نّش داش ئسفليد».
11 داي ئينّا ربّي يي صَمُوئِيل: «ها نكّين دّيخ أد ݣخ ياث لحاجث ݣ إسرائيل كول ونّا س ئسلان أد تبزبيزن ئيمجّان نّس سّين.
12 ݣ واسّ نّا دّيخ أد عاقبخ عالي د آيت تادّارت نّس س-ؤينّا نّيخ زݣ ؤمزوارو أر أمݣارو.
13 لّيخ علمغاس ياد ئس دّيخ أد حكمخ خف ثادّارث نّس أر أبدا، خف لمعصياث نّا ئسّن ئس داد سوݣوزنت نعلث أرهنث تݣان وارّاو نّس أها ؤوراسن ئينهيم.
14 خف أوياد ݣولّيخ ؤر تّيلي توكّي ولا ثمغروصث ئتمحون دنب ن عالي د تاروا نّس أر أبدا ن-ئيبيدان.
صَمُوئِيل ئيعلماس يي عالي س واوال ن ربّي
15 داي ئيݣن صَمُوئِيل ألّيݣ ئفاو لحال، ئيكر ئيرژم لبيبان ن تادّارث ن ربّي. ذا ئيݣد أذاس يِني يي عالي أينّا ينّاي ݣ ثوارݣيت.
16 ئيغراس عالي يي صَمُوئِيل ئنّاس: «أ صَمُوئِيل ممّي». ئنّاس صَمُوئِيل: «ها نك».
17 ئنّاس عالي: «مايداش ئينّا ربّي؟ عافاش، أد-ؤورغيفي تفّر أود يان ووال. أش ئعاقب مولانا ئزايداش مش غيفي ثفّرد شان واوال زݣ ؤينّاش ئينّا ربّي».
18 داي ئيعاوداس صَمُوئِيل كول أينّا س-ئينّا ربّي أها ؤُور غيفس ئيفّير أود يان واوال. داي ئينّا عالي: «هاتين ربّي أينّاخ! أدج أينّاس ئعجبن أد ييلي».
صَمُوئِيل ئيعايد ئݣا نّبي ن-إسرائيل