4
ئفليسطينين ئيوين تّابوث ن-لعاهد
1 داي ياوضن واوال ن صَمُوئِيل أرّاو ن-إسرائيل كول. داي فّغن وارّاو ن-إسرائيل أد حاربن ئيفلسطينين، داي جمعن ݣ تمازيرت ن-بن عازر، ئد ئيفليسطينين جمعن ݣ تمازيرت ن-أفيق.
2 داي مصافّان ئيفلسطينين داث ن-ورّاو ن-إسرائيل، نتّا كر ئمنغان رّون ئيفلسطينين أرّاو ن-إسرائيل، داي نغين زّيكسن أم ربعا لاف ن-ؤرݣاز ݣ ؤدغار ن-ئمنغان.
3 داي عايدند مدن غر لموخيّام، داي قّيمن ئيمغار ن-إسرائيل أر تمسقسان: «ماخ ألّيݣ آخ يودجّا ربّي نتيِرّا أسّا داث ن-ئيفليسطينيين؟ أويثاخد تّابوث ن-لعاهد ن ربّي زݣ شيلوه حما أد يلي ربّي أمّاس نّخ بار أداخ ئيفوكّا زݣ ئيفاسن ن-ئيعداون».
4 أزن مدّن غر تامدينت شيلوه، أويند تّابوث ن لعاهد ن ربّي ئغين يي كولشي ئقّيمان خف لكروبيم (لكروبيم نّوع ن لملايكة ئيلاّن خف تّابوث ن لعاهد)، داي مُونند وارّاو ن عالي: حوفني د فينحاس د تّابوث ن لعاهد ن ربّي.
تّابوث ن لعاهد ݣ لموخيام
5 غاس ييوض تّابوث ن-لعاهد ن ربّي غر لموخيام، داي سغوين وارّاو ن-إسرئيل كول س يان ؤغويّي ئيجهدن ألّيݣ ئيرݣيݣي واشال.
6 نتا سلان ئيفليسطينين ئ-وغويّي داي قّيمن أر تمسقسان: «متّى ؤغويّي-اد ݣ لموخيام ن-ئيعبرانين؟» داي سّن ئس دييوض تّابوث ن لعاهد ن ربّي غر لموخيام ن-إسرائيل،
7 داي خلعن ئيفليسطينيين شيݣان أها نّان: «ئيدّاد ربّي غر لموخيام ن-إسرائيل أيايْداخ ئيجْران! ؤر دجّين ئِيجْري ؤويَا.
8 أيايداخ ئيجران! مايداخ ئيتفوكّون زݣ ؤفُوس ن ربّي ئغين ئ-كولشي، ئسو ريد نتّا أيد يُوثان أيت مصر س-شيݣان ن لمصايب ݣ صّحرا؟
9 جرداث أها ثݣيم ئيرݣزن أ-ئيفليسطينين، أد-ؤور كن ترّون ئيعبرانين أتݣيم ئسمخان نسن أم ئيمشينّا كّان ݣان ئسمخان نّون. ئيوا ݣاث ئيرݣزن أها تنّاغم ئيتسن».
10 سكّرن ئيفليسطينيين ئيمنغان أها تيارّون أيت إسرائيل، أها ئيرول كو يون غر ثخامث نّس. والاينّي عدّان ئيمتّين شيݣان، أسنّا مّوتن زّيكسن ثلاثين ن والف ن-ؤرياز.
11 أرماس نّسن مثن وارّاو ن عالي: حوفني ذ فينحاس. داي أوين ئيفليسطينيين تّابوث ن لعاهد ن ربّي.
لموث ن عالي
12 ݣ واسّ نّا يوزلاد يان ؤرياز زݣ ثقبيلث ن بنيامين زݣ ؤدغار ن-ئمنغي غر شيلوه، س-ئيعبان نّس نا فلينين يومس ألوض ئ-يخف نّس.
13 لوقث نّاݣ دييوض ئيلّا عالي ئيقّيما خف لكرسي نّس، ثاما ن-أوبريد، ئتخ ؤر ئيهنّا وُول نّس خف تّابوث ن لعاهد ن ربّي. غاس ئيعلم ؤورݣاز نّا ئميدّن ئسين أينّا ئيجران كرن ئيمزداغ ن تمدينت كول أرسغويّون.
14 غاس ئسلّا عالي ئ-يغويان ئيكّر أر يسقسا ميدّن: «متّا ئغويان-اد؟» ئدّود ؤورݣاز س طّرحث ئيعلم يي عالي.
15 ئد عالي ثكّا غورس ݣ لعمر ثمانيا وتسعين ن-ؤسݣاس، أها أوحلنث والن نّس، ؤر ئيقّيمي دايتسادّا.
16 داي ئنّاس ؤورݣاز ئ-عالي: «نكّين غاس ثارولا أيد رولخ زݣ ئمنغي، أسّاد أيد دّيخ». داي ئسقساث عالي: «مايد ئيجران أممي؟»
17 داي ئيرار غيفس: «رّان ئيفليسطنييين آيت إسرائيل، تّونغين شيݣان ن-ئيعسكرين، مثن وارّاو نّش: حوفني ذ فينحاس، أها أويين ئيفليسطنييين تّابوث ن لعاهد ن ربّي».
18 غاس ئسيول ؤورݣاز خف تّابوث ن لعاهد ن ربّي ئيتّوتي عالي سݣ لكرسي نّس غر ضارت ثاما ن تفلوت، داي ئيرژ زݣ ئحنيي نّس أها ئيمّث ئتخ ئيوسّير أها ئيزور شيݣان. أها ئيزري ربعين ن-ؤسݣاس ئحشم ديݣس خف وارّاو ن-إسرائيل.
لموت ن تمطّوط ن فينحاس
19 ئد ثيسليت نّس، تامطّوط ن ممّيس فينحاس تلّا س-ؤديس، ثقرب أتّارو. تسلا لخبار ن التّابوث ن لعاهد ن ربّي ئس ثيوين ئيفليسطنييين ذ لموت ن-ؤرݣاز نّس ذ-ؤمغار نّس، داي ئعايد غيفس أقضاع تحودر س-اشال أها ثارو.
20 نتّاث تقرّب أتمّت نّانثاس تعيّالين آس ئيضور: «أذ-ور تݣذ، هاثين ئيشام ربّي أربا». ماشان ؤر غورسنث تروري لبال ولا ثرورا أوال.
21 أها تسما ممّيس "ئخابوذ" (لمعنى نّس لعزّأور-يقّيمي)، «ثنّا: ئدّا لعزّ ن-إسرائيل»، ئتخ ئتياوي تّابوث ن لعاهد ن ربّي أها ئيمّث ؤرݣاز نّس ذ-ؤمغار نّس.
22 تعاود ثنّا ديخ: «أور ئيقّيمي لعزّ غر إسرائيل» ئتخ ئتياوي تّابوث ن لعاهد ن ربّي.