2
داود ئتوختار أد ئݣ أݣلّيد خف يهوذا
1 ضارث ن-ؤينّا، ئشاور دَاوُد ربّي ئنياس: «ئد أد دّوخ غر ثمدينين ن يهوذا؟». داي ئنّاس ربّي: «دو». ئنّاس دَاوُد: «ما غر تدّوخ؟» ئنّاس: «دّو غر ثمدينث ن حبرون».
2 ئدو دَاوُد غر دينّا د تعيّالين نّس سناث ئسمنسنث: أَخِينُوعَمُ تايزرعيليث د أَبِيجَايِلُ ثامطوت ن نابال أكرملي.
3 ياوي داود ئرݣزن نّس نّا ديدس ئلاّن، كّو أرݣاز د أيث ؤخام نّس، زدغن ݣ ثمدينث ن حَبْرُون.
4 داي دّوند ئرݣزن ن يَهُوذَا غر حبرون، خثارن دَاوُد أد ئݣ أݣلّيد خف ثقبيلين ن ثمدينث ن يهوذا. علمناس يي دَاوُد، نّاناس: «ئرݣزن ن ثقبيلث ن يَابِيش جِلْعَاد أݣ ئمضل شاول».
5 يازن دَاوُد ئمازان غر ئرݣزن ن يابيش جلعاد ئنّياسن: «أكن ئبارش ربّي أليݣ ثݣام لخيرا ݣ سيدي نّون شاول ألّيݣ تّمضلم.
6 ربّي أيداون ئتخلاصن س لخير د رحمث، أود نك دّيخ أداون ݣخ لخير أم ؤينّا ثݣام.
7 دغي شجعاث ئخفاونّون ثݣيم ئرݣزن، ئتخ ئمّوث سيدي نّون شاول، ئد نك ثختاري تقبيلث ن تمدينث ن يَهُوذَا أد ݣخ أݣلّيد غيفس».
8 ئد أَبْنَيْر ممّيس ن نَيْر، لكمندار أخاثار ن لعسكر ن شاول، ييوي إِيشْبُوشَث ممّيس ن شاول ئسنضوث غر ثمدينث ن مَحنايِم،
9 ئݣث د-أݣلّيد خف جلعاد د أشُّورِيِّين د يَزْرَعِيل د أَفْرَايِم د بَنْيَامِين د خف إسرائيل كول.
10 ئد إِيشْبُوشَث ممّيس ن شاول ثلّا غورس ربعين ن-ؤسݣاس لّيݣ ئحشم خف إسرائيل، ئقّيم ݣ ثنباط سين ئسݣاسن. ئد تاقبيلث ن يَهُوذَا ثفارن دَاوُد.
11 ئد لحساب ن وُوسّان نّاݣ ئنبض دَاوُد ݣ حبرون خف ثقبيلث ن يهوذا سبعا ن-ئسݣاسن د ستّا ن وايّورن.
12 داي ئفّغ أَبْنَيْر ممّيس ن نَيْر د لعسكر ن إيشبوشث ممّيس ن شاول زݣ مَحنَايِيم غر جبعون.
13 ئد يوآب ممّيس ن صرويا د-ئسمغان ن دَاوُد فغن، داي مجماعن ئيتسن ݣ-ؤݣلمام ن جبعون. قّيمن كول نسن ثاما ن-ؤݣلمام، يان ؤجمّوع ن-ئيرݣزن زݣ سيا يي ؤݣلمام، د يان ؤجمّوع ن-ئيرݣزن زݣ سيين يي ؤݣلمام.
14 ئنّاس أَبْنَيْر يي يوآب: «سبد ئعرّيمن عافاش تادجدثن أد نّاغن دثاخ». ئنّاس يوآب: «أدجثن أد كّرن».
15 كرن أر زرّين س لحساب ن تناعش يي بَنْيَامِين د إِيشْبُوشَث ممّيس ن شاول د تناعش زݣ ئسمغان ن دَاوُد.
16 كو يون إجمع د-ؤعداو نّس ئوت س سّيف نّس ݣ ؤعداس ن-ؤعداو نّس تّوتّين كول نّسن. سمّان-اس يي وانسا نّا: "هلقت هصوريم" (لمعنا نس ئݣر ن سيوفا) نّا ئلاّن ݣ جبعون.
17 ييلي يان ئمنغي ئوعرن شيݣان ݣ واسّ نّا، ئتيارّو أَبْنَيْر د-ئرݣزن ن-إسرائيل داث ن-ئسمغان ن داود.
18 ئلين ديس شراض ن واراو ن صرويا: يوآب د أبيشاي د عسائيل. ييلي عسائيل ئفسّوس ݣ ترولا أم شا ݣ ئملالن ن عاري.
19 ئرول عسائيل ضارث أَبْنَيْر ؤر ئضور أد ئدّو خف ؤفاسي ولا خف ؤزلماض.
20 ئضور أَبْنَيْر غر ضراس ئنّياس: «ئد شݣ أيد ئݣان عسائيل؟» ئنّاس: «نك أيا».
21 ئنّاياس أَبْنَيْر: «ضور خف ؤفاسي نّش نغد خف ؤزلماض نّش ثامزث شا ݣ ئعرّيمن تكسداس سلاح نّس». داي ؤر ئري عسائيل أد ئفغ ضاراس.
22 ئعاود ديخ أَبْنَيْر ئنّاياس يي عسائيل: «فّغ ضاري مّاخ أليݣ ثريث أك نغخ؟ ماغر تراراخ ؤدم ئنو داث ن يوآب ݣماش مش ك نغيخ؟»
23 داي ؤر ئري أد ئفغ ضاراس، ئوت أَبْنَيْر س-ؤبوض ن-ؤحريش غر أديس، ئفغاس ؤحريش زݣ ثاداوث، ئتّوتّي ئمث ݣ-ؤدغار. كول ونّا ديدّان غر أدغار نّا ݣ-ئمّث عسائيل دا ئتبداد دينّا.
24 ئزّع يوآب د أبيشاي أَبْنَيْر، أليي تغلي ثافوشث داي دّون غر تيشّوث ن أَمَّةَ ثاما ن جيح نّا د يوسان ݣ-ؤبريد ن صّحرا ن جبعون.
25 جمعند وارّاو ن بنيامين خف أَبْنَيْر ݣين ياث لفرقا، بدّين خف ئخف ن ثيشّوث.
26 ئغراس أَبْنَيْر يي يوآب ئنّاياس: «أر مي أخ ئنقا سّيف؟ ئس-ؤر ثسّينث ئس تمرّا أها ثحرّو لحر لموث أر لحد؟ أر مي تّينيث يي لعسكر نّش عايدات زݣ ضارث ن أيث ماثون؟»
27 ئّناياس يوآب: «ݣولّيخ س ربّي نّا ئدرن أموريد ئس ؤر تسيولث أيانتا ؤر تعيادن ئرݣزن ئنو ضارث ن أيثماتسن آر صباح».
28 ئسوض يوآب ݣ لبوق، ئبد شعب كول ؤر ئعاود أود يون أد ئثفور إسرائيل ؤر ياد عاودن ياد أد نّاغن.
29 ئد أَبْنَيْر د-ئرݣزن نّس دّان غر لخلا ن-ئض نّا كول، أر تدّون نضون أسيف ن ألأوردن كن كول ثالاثين فّغن غر ثمدينث ن مَحَنَايِم.
30 ئد يوآب ئعايد زݣ ضارث ن أَبْنَيْر، ئجمع لعسكر كول، أفن إخصاصن زݣ لعسكر ن دَاوُد تسعطاعش ن-ؤرياز د عسائيل.
31 نغين ئرݣزن ن داود زݣ تقبيلث ن بنيامين د زݣ ئرݣزن ن أَبْنَيْر ثلت ميا ؤستّين ن-ؤرياز.
32 داي أسين عسائيل أها مضلنث ݣ ثمضلث ن ئبّاس نّا ئلاّن ݣ بيت لحم. ئدو يوآب د ئرݣزن نّس ئض كول، ئسّيد لحال غيفسن ݣ حبرون.