3
أرّاو ن داود
1 داي ئغزيف ئمنغي ئنݣر تدّارث ن شاول د ئنݣر تدّارث ن دَاوُد، ئزايد دَاوُد ݣ لجهد ئد تدّارث ن شاول تدّا غاس ݣ ؤناقس.
2 يارو دَاوُد ئشيرّان ݣ ثمدينت حبرون: أمنزو نّس أَمْنُون، ثوروث أخينوعَم ثايزرعيليث،
3 ويسّين ثوروث كيلاب ن أبيݣايل نّا مي ئمّوث نابال أكرملي، ئد ويس شراض أَبْشَالُوم ممّيس ن مَعْكَة ئلّيس ن تلماي أݣلّيد ن جَشُورَ،
4 د ويس ربعا أدونيا ن حجيث، ئد ويس خمسا شفطيا ممّيس ن أبيطال،
5 د ويس ستّا يثرعام ثوروث عجلة ثامطوت ن دَاوُد، ويتخ يوروثن دَاوُد ݣ حبرون.
6 أليݣ ئكّا ئمنغي ئنݣر تدّارث ن شاول د تدّارث ن دَاوُد، أَبْنَيْر نتّا أدّاي كاثن رّاي أر ئتمغور شان نّس ݣ تدّارث ن شاول.
7 ثيلي غر شاوُل يوث ن ثمطوت مي ؤر ئݣي لشارض ئسم نّس رِصفَة ئيلّيس ن أياه، ئنّاياس إيشبوشث يي أَبْنَير: «ماخ ألّيݣ ثݣنث غر ثمدّاكلث ن بّا؟»
8 داي ئيحرّوياس لحال يي أَبْنَيْر شيݣان خف ئواليون ن إيشبوشثَ ئنّاياس: «ئيس ضونّات ئس متافاقخ د يهوذا؟ أسّا نك شيخ لعاهد يي تدّارث ن شاول باب نّش، د أيث ماس د ئمدوكال نّس، أها ؤر ك ؤدجيخ أت تّوتيث ݣ ئيفاسن ن دَاوُد، ثݣيرد غيفي لباطل ن ثمطوتّا أسّا؟
9 أد ئيعاقب ربّي أَبْنَيْر أها ئزايداس مش ؤور-اس عاونخ يي دَاوُد أم ؤوينا ئرا ربّي،
10 أد ئيكس تاݣلّيت يي تدّارث ن شاول أها ئتبث لعرش ن دَاوُد خف إسرائيل د يهوذا زݣ دان أر بير سبع.
11 داي ؤر ئغي ئيشبوشت ياد أد ئعاود أوال يي أَبْنَيْر ئتخ أس ئݣد.
12 يازن أَبْنَيْر ئمازان غر دَاوُد ئينّاياس: «مامي ئݣا وشال وينس؟ شي لعاهد ها يافوس ئينو ݣ وينش أن رارخ إسرائيل كول غورش».
13 ئنّاياس دَاوُد: «ئژيل واوال نّش دّيخ أداش شخ لعاهد ولايني نك دا تترخ يوث لحاجث إخصاش أد يي تاويث إليس ن شاول ميكال، مش ور تيت تيويث ؤر ثنيث أت تنايث ؤودم ئينو».
14 يازن دَاوُد ئيمازان غر إيشبوشث ممّيس ن شاول ئينّاياس: «شيد ثامطوط ئينو ميكال نّا ترخ س ميا ن لارواح ن-ئفلسطينيين أويخد ليمارث ن ؤزين نسن».
15 يازن غورس ئيشبوشت ياويتيد زݣ ؤرݣاز نّس فَلْطِيئِيل ممّيس ن لايش.
16 ئثفورتيد ؤرݣاز نّس أر يالّى ضراس أر ثمدينث ن بحوريم، ئنّاياس أَبْنَيْر: «دّو عايد». داي ئعايد.
17 داي ئسيول أَبْنَيْر يي يمغار ن-إسرائيل ئينّاياسن: «شحال أياد دا تقلاّبم خف دَاوُد أد ئعايد أد غيفون ئيݣ أݣلّيد.
18 ئوا دغي، ݣاث أم ؤوينّاس ئساول ربّي يي دَاوُد أليݣ ئنّا: س-ؤوفوس ن دَاوُد ئسمغ ئينو أس تفوكّاخ شعب ئنو إسرائيل زݣ ؤفوس ن-ئفلسطنيين د ؤفوس ن-ئعداون نّسن كول».
19 ئسيول أَبْنَيْر ديخ ألثو يي ئيخاثارن ن تقبيلث ن بنيامين، فير ن-ؤوينا، ئدّو أد ئمشوار د دَاوُد ألثو ݣ حبرون، س كول أينّا س-ئمسوال د بنيامين د تدّارث نس د-ئخثار ن-إسرائيل.
20 ئدّو أَبْنَيْر غر دَاوُد غر حبرون، ئلين ديتس عشرين ن-ؤرياز. ئيݣ دَاوُد زردا يي أَبْنَيْر د ئرݣزن نّا أݣيس ئلاّن.
21 ئنّاس أَبْنَيْر يي دَاوُد: «أدجي دغي أد دّوخ أد سمونخ يي سيدي أݣلّيد ثيقبليين ن-إسرائيل كول. أداش شين لعاهد أتݣث أݣلّيد غيفسن ثݣث كول أينّا ثريث». ئصّيفد دَاوُد أَبْنَيْر ئدّو ݣ لمان.
22 شوي، هان ئسمغان ن داود د يوآب عايدند زݣ يون ئمنغي أويند شيݣان ن لمال. ئد أَبْنَيْر ئفّغ زݣ حبرون، ئتخ ثيوزن داود ئدّو ݣ لمان.
23 ئدّود يوآب د كول ئعسكرين نّا ئلّان أݣيدس، داي نّناس يي يوآب: "ئدّاد أَبْنَيْر ممّيس ن نير غر أݣلّيد يازنث. ئدّو ݣ لمان».
24 ئكشم يوآب غر أݣلّيد ئنّاياس: «مايد ثݣيث؟ ئدّاد أَبْنَيْر غورش، ماخ ألّيݣ تّودجيث ئدّو ݣ لمان؟
25 تسّنث أَبْنَيْر ممّيس ن نير ئدّاد أك ئيغدر، أد يسين ؤفوغ نّش د ئكشّومن نّش يسين كول أينّا دا تݣاث».
26 ئيفغ يوآب زݣ غور دَاوُد أها يازن ئمازان ضارث أَبْنَيْر. تفورنت برّمنثيد زݣ وانو ئسم نّس سيرَةَ، بلا لخبار دَاوُد.
27 ليݣ ديعايد أبنير غر حَبْرُون، ئزّوغرت يُوآب غر أمّاس ن لباب، أم ئيرا أداس ئسيول س لحس. ئيوت دينّا غر أديس ئنغث، ئتخ أس ئنغا عسائيل ݣماس.
28 ئسلّا دَاود يي مايد ئجران أها ئنّا: «ئشاهد ربّي غيفي ئد نكّين د تݣلديت ئنو نتّوبرّا زݣ ئدامن ن أَبْنَيْر ممّيس ن نيرأبدا ن دّونيت.
29 أد ئلين دّنوب نّس خف ئخف ن يوآب د أيث تدّارث ن باب نّس كول! ؤسار ئيفّيغ زݣ تدّارث ن يوآب ونّا ئتّازلان س-ئيدامن د بولبرص د ونّا ئتعكّازن س-ؤعكّاز د ونّا ئتّمثاثن س سّيف د ونّا ئيتتّر أغروم».
30 يوآب د أبيشاي ݣماس نغان أَبْنَيْر، خف لموث ئݣا يي عسائيل ݣماتسن ݣ جبعون ݣ ئمنغي.
31 داي ئينّا دَاوُد يي يوآب د كول شعب نّا ئيتس ئلاّن فلياث ئعبان نّون، تنسيم تخنشيين، ثحزنم خف أَبْنَيْر. أها ئدّو ؤݣلّيد دَاوُد أود نتّا ضارت ن ؤومتّين.
32 مضلن أَبْنَيْر ݣ حبرون، ئسغوي ؤݣلّيد أر ئترو خف ؤوسمظل ن أَبْنَيْر، ئرو شعب كول.
33 ئيحزن ؤݣلّيد خف أَبْنَيْر، ئنّا: «ئد أم لموث ن-ؤحيوض أيث ثمّوت أياَبْنَيْر؟
34 ئفاسن نّش ؤر تّوشريفن، ولا ئيضار نّش ؤر تّوشريفن س سناسل ن نحاس. ثݣيث أم ونّا ئتّوتين ݣ ئفاسن ن-ئقطاطعين». ئزايد شّعب كول أر غيفس ئترو.
35 ئدّو شعب كول غر دَاوُد حما أثستشن ماحد ئسول واسّ، ئݣال دَاوُد ئينّاياس: «أد ئيعاقب ربّي أها ئزايدي مش ؤرمخ أغروم نغد شان لحاجث داث أوغلّوي ن ثافويث».
36 كول شعب أنّاين أينّا ئݣا ؤݣليد ئيغودا داث ن والّن نّسن، داي إعجباس لحال،
37 ييسين شعب ن إسرائيل كول ئد منغيوث ن أَبْنَيْر ميس ن نير ؤريد زݣ ؤݣلّيد.
38 ئينّياس ؤݣليذ يي ئسمغان نّس: «تسنم ئس ئموث زّعيم ئݣان أرياز أختارأسّا ݣ إسرائيل؟
39 نك أسّا ضعفخ، وخّا ݣيخ أݣلّيد، ئرݣزنا أرّاو ن صرويا جهدن غيفي، أد ئيخلص ربّي يي وينّا ئيتݣان أينّا ؤر ئحلين خف ثيخّوت نّسن».