8
ثامديازث ثيسّ 8
ئي وخاثار ن ـ ئمديازن س ـ لوطار ن ـ ݣيثيث. ثايفّارث ن ـ داوود.
1 يا مولانا سيدي ربّي نّخ،
مشثا أيد ئمقّور ييسم نّش ݣ دونيث س ـ ماس ثلّا!
لعزّ نّش ثسّيكّيتّيد نّيݣ ن ـ ئݣنوان.
2 زݣ ئقما ن ـ ثسلمييوين د ـ ئشيرّان
ثسرصّاد ثيغيت نّش خف نّيرث ن ـ وينّا ؤرش ئحميلن،
حما أداسد ثݣد لحدّ ئي ونّا يݣان أنضليب د ـ ؤنّا دا يتّامژن لحسيفث.
3 أدّاي دا تّراعاخ ݣ ـ ئݣنوان نّش نّا ثعديلد س - ئفاسن نّش،
ݣ ـ وايور د ـ ييثران نّا ثسرصّاد ݣ ـ وانسيون نسن،
4 دا تّينيخ: مايد ئمس بنادم حما أديكس ثخمّمد؟
د ـ مايد مسن ميدّن حما أديكسن تّثاويد؟
5 بنادم ثسّمژيتّ غاس شوي خف لملخلوقاث ن ـ ييݣنّا،
ثݣداس لعزّ د ـ شّان.
6 أها ثوشداس ثانباط خف ؤينّا ثݣيد كولّ.
مايد ئݣان شا ثݣيتّ دّاو ن - ئفاسّن نّس:
7 ؤلي د ـ ئزݣار كولّ،
د ـ لوحوش أود نثني،
8 د ـ ئجضاض ن ـ ييݣنّا،
د ـ ئسلمان
د ـ ئمودار كولّ نّا لّانين ݣ ـ لبحور.
9 يا مولانا سيدي ربّي نخ،
مشثا أيد ئمقّور ييسم نّش ݣ ـ دّونيث س ـ ماس ثلّا!