22
1 ئسيول دَاوُد يي ربّي س ثمديازث ݣ واسّ نّاݣ تيفوكّا ربّي زݣ ؤفوس ن-ئعداون نّس كول د-ؤفوس ن شاول،
2 ئينّا: «ربّي ئنو ئݣا أم ؤژرو ئصحان، أفراݣ ئنو، أفكّاك ئنو،
3 ربّي ئنو أم ئسلي ن لساس ئنو زيݣس أزݣ دا سنثالخ، أمسنال-ئنو ئيش ن-ؤفكّا ئنو، أنسانو نا غر رݣلخ، أفكّاك ئنو، دا يي تفوكّاث زݣ ئينضلامن.
4 دا تحمادخ يي ربّي س-ؤهلل، نّا دا إتفوكان زݣ ئيعداون-ئنو.
5 لموجات ن لموث ضورنثي، د لحملاث ن لفنا سخلعنثي.
6 ئشوراف ن ليخرا ضورّي. ثيسقّورين ن لموث بدّانث داثي.
7 ݣ ژيّار ئنو غريخ يي ربّي، ئسفلد يي ثغوري ئنو زݣ ئݣنا، ثاوض ثغويّيت ئنو غر ئيمجّان نّس.
8 داي ئيرݣيݣ واشال، د لساسات ن-ئيݣنوان حرشنت زݣ ئضغارنسنت ئيرييي، ئتخ أس ئيحرّا لحال.
9 يوليد واݣو ݣ ثينزار نّس، د لعافيت زݣ ؤقمو نّس شعلنث ديݣس ثيريين.
10 ئيرزم ئيݣنا ئيݣزد زييس، ثيلي ثاووت ئعدان دّاو ن-ئيضار نّس.
11 ئينيد خف لملاك أها يافرو، ئيبايند خف وافريون ن-ؤوزݣو.
12 ئيݣ ثالست د إسيينو أداس ثضور سترنث.
13 ئيݣ ثيݣناو د-ؤسمان دثاس غورسن أسيد أم لعافيت.
14 إسيول ربّي س ثيݣناو زݣ ئيݣنا، إتوسلا ووال.
15 يوزند ئد نبل ئيزلعثن، يازند ؤوسماون ئيرّوثن.
16 ئضهر ؤبوض ن لبحر عرّان لساساث ن دّونيت س ؤنهاض ن ربّي زݣ نفس ن-ؤزوُو ن ثينزار نّس.
17 يوزند زݣ وافلا يامژيي، ئنزغيد زݣ وامان ئيعدّان.
18 ئيفوكّايي زݣ ؤعداو ئيجهدن، زݣ وينّا ؤر ئيحميل ئتخ غيفي جهدن.
19 هجمند غيفي ݣ واسّ ن لمحاين ئينو، ئيي ربّي أمفكو ئينو.
20 ئسّوفغيد غر أرحبي، ئيفوكّايي ئتخ ئيفرح ئسّي.
21 ئيخلصي ربّي خف نييث ئينو، خف ثازديي ن-ئيفاسن ئينو أس دا يي ئترارا لخير.
22 ئتخ حضيخ أبريد ن ربّي، أها ؤر ثعصيخ.
23 ئتخ لحشام نّس كول ييخث داثي، د شّرع نّس ؤر داس تبعادخ.
24 ييخ أرياز ئيشمل غورس، حضيخ ئيخف ينو زݣ دّنوب ئنو.
25 ئخلصييي ربّي خف سيدق ئنو، د ثازديي ييخ داث ن والّن نّس.
26 مون د ونا يحنان أتيث أحنين، مون د ونا يصلحن أتيث ونا يصلحن.
27 مون د ونا يصفان أتصفوث، ئد مش ثمونتث د ونا ئفرغن أتفرغث.
28 شݣ دا تفوكّاث شعب نا ئلان ي لمحاين، ئد ونّا ي ئلا لكيبر دا تسخساي.
29 ربّي أݣان أسيد ئينو، نتا أدا ئسادّان ي ثالسث.
30 س شݣ أربي أس دا تروخ ئعداون. س ربّي نُو أس دا تاليخ ئوودار.
31 ربّي ئيصفا ؤبريد نّس، لامر ن ربّي ئيزدّيݣ، أمسنال أݣا نتّا يي كول وينّا غورس د دانين.
32 ئتخ ماتّا ربّي ئيلاّن بلا ربّي نّخ، د ماتّا ؤژرو ئيصحان بلا ربّي نّخ.
33 ربّي دا يي ئدزياد لجهد، ئيرار أبريد ئينو أد ئيصفو.
34 ئيرار ئضار ئنو أم ثملالين، ئسبدّي خف لعواري.
35 دا ئسعلام ئفاسن ئنو ئيمنغي، سفرغن ئيغاريون ئنو لقوس ن نحاس.
36 تشيثي أمسنال ناس تروخ، أعاون نّش إسخاثرييي.
37 تسّوسعث إسوريفن ئينو دّاوي، ؤر شّيضن ئورزان ئنو.
38 أت ثفورخ ئيعداون ئنو فضّاخثن، ؤر د تعايادخ أر ثن فنوخ.
39 أت ثن فنوخ زضخثن، ؤر دتكر، تّوتّين دّاو ن-ئضار ئينو.
40 دزايتي لجهد ݣ ئيمنغان، تروريث وينّا يكر دض ئنو دّاوي.
41 أت تروث ئيعداون نا ئلّان داثي، خلوخ وينا ؤر يي حميل.
42 راعان، والو مايثن ئتفوكان، غرن، والو مايثن ئدجوابن.
43 أت تن ژضخ ين أم ؤݣضرور ن واشال، يين أم والوض ن لاسواق أت تن دزخ عصرخثن.
44 تسراحثي زݣ مشرضول ن شعب ئينو، تادجثي أنباض خف لّومّاث. شعب نا ؤر سّينخ ئعايد أسا دا يي خدم.
45 أراو ن-ئيبرّانيين دا يي سحوزور، أداي ئسلان س-ئمجّان ضاعني.
46 أراو ن-ئبرّانيين ئتيوكساسن لجهد، لا تفغن أر ترݣيݣين زݣ ئيغرمان نّسن س ثيݣت.
47 ئدّر ربّي، ئيتّوبارش ؤژرو نو ئصحان، ئتّوسعلاّ ربّي ن-ؤفوكّا نو.
48 ربّي يومزيي لحقّ، ئسضاعي ثيقبلين داوي.
49 ونّا يي ئسّوفوغن زݣ وامّاس ن-ئعداون ئنو، ئهزّايي نّيݣ ن وينّا ئكر دض ئنو، ئفوكّايي زݣ ؤرياز بويمنغان.
50 خف ؤينّا داك تحمادخ أربّي ݣ واماس ن لّومّاث، أر تهلالخ س-ئسم نّش.
51 نصر أخاثار أيشيث يي وݣلّيد نّش، تسضهرث رحمث يي ونا ثخثارث، يي دَاوُد د ثاروا نّس أر أبدا ن دّونيت.