18
1 ئحاسب داود شعب نّا غورس ئلاّن، ئعيّن غيفسن لكمندراث ن-ئيد لولوف د لكمندرات ن-ئيد ميّا.
2 يازن داود شعب تولوث خف ؤفوس ن يوآب د تولوث خف ؤفوس ن أبشاي ممّيس ن صرويا ݣماس ن يوآب د تولوث خف ؤفوس ن-إتَّاي أجيتّي. داي ئنّا ؤݣلّيد يي شعب: «دّيخ أد فغخ ديدون».
3 داي ئنّاياس شعب: «لا، قّيم دا ئتخ وخّا ئجراياخ شا نغد نرول، ئمث زيينخ ؤمناصف هان أياتخ أمي ؤر-يجري شا، ئد شݣ لا تسواث عشر لاف زيݣنخ، يوف مش ثقيميث ݣ ثمدينث أداخ ثفوكاث».
4 داي ئنّاياسن ؤݣلّيد: «أينّاون د يوسان داث والّن نّون أتّيخ». ئيبد ؤݣلّيد طرف ن لباب د شعب كول ئفغ س-يد ميّا د-يد لولوف.
5 ئيوصّا ؤݣلّيد يوآب د أبيشاي د إتّاي ئناياسن: «لعار نّون أعرّيم ئنو أبشالوم». داي ئسلاّ شعب كول يي لوصيث ن-ؤݣلّيد د لكمندراث كول خف أبشالوم.
6 ئفغ لعسكر ن داود غر صحرا أد ئيناغ د-إِسْرَائِيل. ئوقع ئمنغي ݣ لوعر ن عارى ن أفرايم.
7 ئتيارّو لعسكر ن-إسرائيل دينّا داث ن لعسكر ن داود، ئجرو يون ئمنغي أخثار ݣ واسّ نّا. موثن دييس عشرين ن والف.
8 زايدن ئمنغان ي عاري، ياݣر ؤينّا ئنغا لوعر ن عاري أينّا ئنغا سّيف زݣ شعب ݣ واسّ نّا.
9 ديس ئجمع أبشالوم د شا ن-ئرݣزن ن دَاوُد ييلي أبشالوم ئيلاّ ئيني خف ؤسردون، ئرول ئيك دّاو ن-ؤسكلو ن عاري أخاثار يامزاس ؤسكلو أزار ن ئيخف نّس ياݣل، أر ئتلي ئنݣر ئݣنّا د وشال. ئزريث ؤسردون ئيلاّن دّاواس.
10 ينّايث يون ؤرياز، ئعلماس يي يوآب ئنّياس: «هاثين أنّايخ أبشالوم يوݣل ݣ-ؤوسكلو».
11 ئنّاس يوآب يي ؤرياز نا س-ئعلمن: «ألّيݣ تنّايث مّاخ ألّيݣ ؤر توّيت نغد ثامزت؟ ؤما شيخاش عشرا ن لفضّا د سمطا».
12 ئنايّاس ؤرياز: «وخّا ئيوزن خف ؤفوس ئنو ألف ن لفضّا ؤر تّازدخ أفوس ئنو غر ممّيس ن-ؤݣلّيد ئتخ س-ئيمجّان نّخ نّسلا ئسك ئيوصّا أݣلّيد شݣ د أبيشاي د إتّاي ئنّا: "لعار نّون أعرّيم ئينو أبشالوم".
13 أمور نغيخ مميس ن-ؤݣليد، أد إتوحشم غيفي إس عصيخ أوال ن-ؤݣليد نّا مي ور داي تخفو أود شان لحاشث، أود شݣ ثدّيث أتليث دض ئينو».
14 ئنّاياس يوآب: «ؤر نيخ أد ضيْعخ لوقث ئنو ئك!» ياسي شراض ن-يد نبل ݣ ؤفوس نّس ئوتن ݣ وُول ن أبشالوم، ئسول ئدّر ݣ داو ن-ؤسكلو.
15 داي ضوراس عشرا ن-ئيعرّيمن ئيتّاسين سلاح ن يوآب وثن أبشالوم نغينث.
16 ئسوض يوآب ݣ لبوق ئسبد لحرب. عايدند ئريزن ن داود زݣ ثوزعا ضارث لعسكر ن إسرائيل.
17 أسين أبشالوم ݣرنث ݣ ؤحفور أخاثار رارن غيفس أݣرور ن-ئيسلّيون إد-إِسْرَائِيل كول رولن عايدن غر ثخامين نّسن.
18 ئد أبشالوم أليݣ ئكا يدر ئبنا ئيخف نّس تيمثال نّا ئيلاّن ݣ ثالات ن-ؤݣلّيد، ئتخ ئنّا: «ؤر غوري شا ن لعيل يي شتّين ئسم ئنو». ئسمّا سّيريث خف ييسم نّس، داس تّينين: «تاماتارت ن أبشالوم». أر أسّ تخ.
19 ئد أخيمعص مميس ن صادوق ئناياس: «أدجيي أد رولخ عفاش أد خبرخ أݣلّيد، ئتخ يومزاس ربّي لحق ݣ-ئيعداون نّس».
20 ئنّاياس يوآب: «أسّا أد-ور صّاواض شا لخبار. أدج أصيوض أر شا واسّ ياضن، ئتخ ئمّوث ممّيس ن-ؤݣلّيد».
21 ئنّاياس يوآب يي يسمغ نّس أكوشي: «دّو علماس يي ؤݣلّيد س مايد ثنّايث». ئحودر أكوشي داث ن يوآب داي ئرول.
22 ئيعاود ديخ أخيمعص مميس ن صادوق ئنّاياس يي يوآب: «داكما ݣلان، أد-ازلخ عفاش ضارث ؤكوشي أود نك». ئنّاياس يوآب: «ماغر تازلاث أممّي ؤر غورش شان ربح ݣ ؤبشّر نا؟».
23 ئرار يفس ئنّاياس: «داكما ݣ لان، ريخ أد-ازلخ». ئنّياس: «أزل». يازل أخيمعص ݣ-ؤبريد ن لوطا ئيزوُور أكوشي.
24 ئد داود ئقّيما ئنݣر سين لبيبان. يالي ؤعسّاس غر نّيݣ ن لباب خف ؤيادير، ئيهزّا ألّن أها ينّاي أرياز هاث لا د-ئرݣل.
25 ئغراس ؤعسّاس يي ؤݣلّيد ئعلماس، ئنّاياس ؤݣلّيد: «مش ئيلا غاس نتا شان لخبار أيد ييوي». أليي دا دي تقرّاب.
26 ينّاي ؤعسّاس ديخ أرياز ياضن دا د-ئرݣل، ئيغراس يي وبوّاب ئنّاياس: «هاش يان ؤرياز ئداد أر ئتّازلا غاس نتّا». ئنّاس ؤݣلّيد: «أود ؤنّا أمبشّر».
27 ئنّاياس ؤعسّاس: «نك أنّايخ ثازلا ن-ؤمزوارو أم تازلا ن أخيمعص مميس ن صادوق». ئنّاياس ؤݣلّيد: «ونّا أرياز ئغودان أمبشّر ن لخير أيد-ئدّان».
28 ئيغراس أخيمعص يي ؤݣلّيد ئنياس: «سّلام» ئيحودر داث ن-ؤݣلّيد خف ؤدم نّس غر أشال ئنّاياس: «أمبارش ربّي نّاݣ نغان ئرݣزن نّا ئيهزّان ئفاسن نّسن غر سيدي أݣلّيد».
29 داي ئنّاياس ؤݣلّيد: «ماݣا أبشالوم ئد لباس غورس؟» ئنّاياس أخيمعص: «أنّايخ ئيشابار ئيخاثار أليݣ ئد يوزن يوآب ئسمغ ن-ؤݣلّيد ئد نك ؤرسينخ ماݣ جران».
30 ئنّاياس ؤݣلّيد: «بد ديس ݣ طرف». ئيضور ئيبد.
31 هاياش أكوشي ييوض ئينّياس: «فرح أسيدي أݣلّيد ئتخ ش-يفوكّا ربّي أسّا زݣ ؤفوس ن كول وينّا ئيكر دض نّش».
32 ئنّاياس ؤݣلّيد يي وكوشي: «ئيس ثݣا لمان غر ممي أبشالوم؟» ئناياس ؤكوشي: «أد ݣين أم ؤعرّيم ئعداون ن سيدي أݣلّيد د كول وينّا ئكر دض نّش ي توخّوت».
33 ئحرّش وول ن-ؤݣلّيد يالي غر تنصريث ݣ لباب ئيرو كود ئيتدّو ئيتّيني: «ممّي أبشالوم! ممّي أبشالوم! أوايد ئموثن ݣ-ؤدغار نش؟ أبشالوم أممّي».