15
1 يلي ضارت ن-ؤينا يومز أبشالوم يي ئخف نّس لكرّوصا د-ييسان د خمسين ن-ؤرياز ئرݣل داثاس.
2 أرئتكرأبشالوم زيك ئبد ݣ-ؤبريد طرف ن لباب ن ثمدينث داي تحطار يي كول ونّا غر ثلاّ دعوث ئدا غرأݣلّيد أد غيفس ئيحشم، داس ئقار أبشالوم ئسالث: «ما تّا ثمدينث نّا زݣ ثݣيث؟» داث ئتجواب: «ئسمغ نّش زݣ ياث ن ثقبيلين ن-إسرائيل».
3 داس ئتيني أبشالوم: «ئلا غورش لحق ي-وينا ثنيث، ولاينّي ويناش ئيتسلان زݣ ؤݣلّيد ؤر لّين».
4 داي يينياس أبشالوم: «أمور ݣيخ لقاضي ݣ تمازيرت ئدّود غوري كول ونا غر ثلاّ دعوث أداس شخ الحق».
5 أدّاي ثيد ئيقرب شان يون أداس ئسجد دا يتّازض أفوس نّس ئسبداث ئسّودمث.
6 ئيݣ أبشالوم أياتخ يي كول آيث إسرائيل نّا ديدّان أد غيفسن ئحكم ؤݣلّيد ئكشم أبشالوم ؤلاون ن-ئرݣزن ن-إسرائيل س لحيلثا.
7 أليݣ ئشمّل أبشالوم ربعين ؤسݣاس ئنّاياس يي ؤݣليد: «أدجي أد دّوخ عفاش أد خلصخ لقاويل نّا قّاولخ يي ربّي ݣ حبرون».
8 ئتخ أقاول نّاݣ قّاول ئسمخ نّش ألّيݣ زدغخ ݣ ݣيشور ݣ أرام نّيخ: "مشي ئرورا ربّي غر ؤورشليم أد-اويخ يي ربّي ثيمغراص غر حبرون"».
9 داي ئنّاياس ؤݣلّيد: «دّو ݣ لمان». داي ئدّو غر حبرون.
10 يازن أبشالوم ئمزان س ثوفرا غر ثقبيلين كول ن-إسرائيل ئنّياسن: «أداي تسلام يي صوط ن لبوق ثينيم ئيݣا أبشالوم أݣلّيد ݣ حبرون».
11 ئدو أبشالوم ئيمون د ميثاين ن-ؤرياز زݣ لقدس ݣيناس لخاضر ؤر سّين كول ماخف دّان.
12 أليݣ ئبذا لا ئغرّص يي ثمغراص يوزن غر أخيتوفل أݣيلوني أمشاور ن داود زݣ ثمدينث ن ݣيلوه، ثكّر ثيريت ثخثارث ئزايد شّعب ئثفور أبشالوم
13 ئدّو ؤمزان غر داود ئينّياس: «ؤلاون ن-ئرݣزن ن-إسرائيل عايدن ثفور أبشالوم».
14 داي ئينّياس داود يي يسمغان د كول وينّا غورس ئلاّن ݣ لقدس: «كراث، أنرول ئتخ ؤر غورخ ماخ ئيتفوكّان داث ن أبشالوم سدرفاث أندّو أد ؤراخ ئصحصل أداخ يامژ أداخ ئنغ ئنغ ئمزداغ ن ثمدينث».
15 داي نناس ئسمغان ن-ؤݣلّيد: «أم ؤوينّا ثنيث أينتݣا».
16 ئيفغ ؤݣلّيد د-ايث تدّارث نّس كول خف ئيضار نّسن يادجن عشرا ن ثعيالين مي ؤر ئݣي لشارض أد حظون ئيغرم.
17 أليݣ ئقرب ؤݣلّيد د كول شعب نا ثيفار أد ئفغ زݣ ثمدينث بدّين غر تادّارث ثانݣاروت.
18 نضون كول ئسمغان نّس دثاس د ستميا ن ؤرياز نّا ثيتفار زݣ ثقبيلث ن جت.
19 ئنّاياس ؤݣلّيد يي لإتّاي أجيتّي: «ماخ أت تدّوث أود شݣ ئدنخ؟ عايد تقّيمث غر ؤݣلّيد ؤجديد ئتخ أبرّاني أيثييث أود شݣ نفانش زݣ تمازيرت نّش.
20 غاس أسناط أيتديث، مّاخ أكّاويخ أسّا أك زلخ ئدنخ؟ نكين ؤر سينخ ماغر ديخ، عايد ثاويث أݣيش أراو ن تمازيرت نش، مون د لمان أكي عاون ربّي».
21 ئيجاوب لإتّاي أجتي أݣلّيد ئنّياس: «ݣوليخ س ربّي ئدرن تمونخ أݣيش، مغار ثلا لموث نغد تودرت».
22 داي ئنّاياس داود يي لإتّاي أجيتي: «أدّود نضو». ئنضو لإتّاي أجيتّي د ئرݣزن نّس كول د ئيشيرّان ئيمزيان نّا غورس ئيلاّن.
23 أر-ئترو شعب كول س-ئغويان ئيعلاّن، أليݣ ئنضو لعسكر د-ؤݣليد أسيف ن قدرون، أمزن أبريد ن صحرا.
24 ئدود صادوق أكهان د إلاويين ؤسين تّابوث ن لعاهد ن ربّي، سّرسنث. أر-يغرص أبياثار يي ثمغراص أليݣ ئفغ ؤݣليد د شعب كول زݣ ثمدينث.
25 ئنّاياس ؤݣلّيد يي صادوق: «برّم تّابوث ن لعاهد ن ربّي غر ثمدينث، مش ئرى ربّي ئدا أد يي ديرار ئسنعثي تابوت د أزدوغ نّس.
26 ئد مش ور ئييري، ئدا أد-يݣ ئسي أينا يرا».
27 ئنّاياس ؤݣلّيد يي صادوق أكهان: «إس ؤريد شݣ أمكاشف ن ربّي أيثييث؟ دّو عايد غر ثمدينث ݣ لمان شݣ د أخيمعص ممّيش د يوناثان ممّيس ن أبياثار. ثاويم أرّاو نّون.
28 إد نك دّيخ أد ݣّانيخ ݣ صّحرا أر د ديدّو شان لخبار زيݣون ثخبرمي».
29 ئرار صادوق د أبياثار تّابوث ن ربّي غر لقدس قيمن ديس.
30 ئد داود يولي تساونث ن عاري ن زّيتون، س لحفا أر ئترو ئدل يي ئخف نّس، ئثفورث كول شعب نّا غورس ئيلاّن دلن يي ئخفاون نّسن أر ترون.
31 داي علمناس يي داود نّناس: «ئيلا أخيتوفل ݣ ئيغواغن د أبشالوم». داي ئزال داود ئينّا: «سحويض أربّي أمشوار ن أخيتوفل».
32 أليݣ نييوض داود غر ئيخف ن عاري أد-يسجد يي ربّي، ئجمع يس حوشاي أراكي س-ئيعبان نّس بين د وشال خف ئيخف نّس.
33 ئنّاس داود: «مش ثنضوض ئدي ثدّيث أد غيفي ثتقلد.
34 والاينّي مش ثعايت غر ثمدينث ثينيثاس يي أبشالوم: نك أغورش خدمخ أياݣلّيد، أمشي كّيخ لاخدمخ غر باب نّش زݣ زمان، مش ئقبل ئسل يي ووال نّش ثديث أد يي ثعاونث أد-يخصر شوار ن أخيتوفل.
35 هان صادوق د أبياثار ئكهّان لان غورش ديس؟ خبرثن س كول أينا مي تسليث ݣ لقصر ن-ؤݣلّيد.
36 هان أود أراو نّسن لان ديس سّين أخيمعص ن صادوق د يوناثان ن أبياثار أزناسند أينا مي تسلام».
37 ئعايد حوشاي أمدّاكل ن داود غر ثمدينث ن لقدس، يافن أبشالوم دا غورس ئكجّم.