13
1 ضارث ن-ؤينّا، ثلاّ غر أبشالوم ممّيس ن دَاوُد ياث ؤلتماس ئݣّان زّين: ئسم نّس ثامار. ئيعشقت أَمْنُون ݣماس ؤر-يݣين أشقيق نّس.
2 يلي ياغ شا أمنون مميس ن داود س ثايري ن ؤلتماس تامار، ئتخ نتّاث ثݣا ثاعرّيمث داي ئوعراس لحال يي أمنون ݣ لخاضر نّس أداس ئݣ شان لحاجث ؤر-يحلين.
3 يلي غر أمنون يان ؤمدّاكل ئسم نّس يوناداب ممّيس ن شمعياه ݣماس ن دَاوُد، ئد يوناداب ئݣا أرياز ئشوان شيݣان.
4 ئنّاياس: «ماش ياغن ثعايت ثوحلث أممّيس ن-ؤݣلّيد؟ ئيني ماش ياغن؟» ئنّاياس أمنون: «تامار ؤلثماس ن أبشالوم ݣما دا ت تّيريخ».
5 ئنّاياس يوناداب: «ݣن ݣ ثيسي نّش ثيث ئيخف نّش أمي كياغ شا، ئدّا أد ئدّو بّا نّش أش ينّاي تينيثاس: "أدج عفاش تامار ؤتما أد ييي تسنوى أغروم أها ثݣ داث ن والن ئينو ؤتشّي حما أد أنّايخ أها تشخ زݣ ؤفوس نّس"».
6 ئيݣن أمنون ئيݣ ئخف نّس أمي ثياغ شا ئدّود ؤݣلّيد أت يانّاي ئنّاياس أمنون يي بانس داود ريخ أتادجث عفاش تامار ؤلثما أد يي ثݣ شان لݣاطو داث والّن ئنو أتن ثتشخ زݣ ؤفوس نّس».
7 يازن دَاوُد غر تامار غر تدّارث نّس ئينّياس: «أدّود عفام غر تدّارث ن أمنون يمام تݣثاس شان ووتشّي».
8 ثدّود تامار غر تدّارث ن أمنون ݣماس نتّا يلاّ ئيݣن ثاسيد أݣر ثݣث تسنوياس ما ݣ تتّا داث ن والن نّس.
9 ثاسي لمقلا تسرساست داثاس ؤر ئيري أد-يتش. ئنّاس أمنون: «سّوفغ مدن كول غيفي». فغن كول ميدن غيفس.
10 ئنّاياس أمنون يي ثَامَار: «أويد ؤتشّي غر لبيث حما أد تشّخ زݣ ؤفوس نم». تاسي تامار ؤتشي نّا ثݣا ثاويثيد يي أمنون ݣماس غر لبيث.
11 ؤراس ئݣي أت تسيرس ؤتشي أليݣ ئتيومز س لجهد ئنّاياس: «أدّود ݣن غوري أولتما».
12 تنّاياس: «لا أݣما أد ؤر ئتسخصارت. ؤر دا ئتجرو أم ؤياد ݣ إسرائيل عفاش أد ؤر تݣا أينّا ؤر ئزيل.
13 نك ماغر تّاويخ لعار ئينو؟ ئد شݣ أتّݣد أم يون زݣ ئيحياض ݣ-إِسْرَائِيل! عفاش دغي إنياسث يي وݣلّيد ئتخ ؤر ئينّي أداش ييني ؤهو».
14 داي ؤر ئري أداس ئسفلد، يامزت س لجهد ئݣن غورس.
15 ياغول ئيشرهت أمنون لشره ئعدّان شيݣان لشره نّا تيشره يوݣر ثايري نّا تيرا داي ئنّاياس: «كر دّو».
16 ثنّاياس: «ماخ أليي دا يي ثزعث؟ ثوزعا يا لعيب أخاثار ثوݣر أزوار نّا يي ثݣيث». داي ؤر ئيري أداس ئسفلد.
17 ئيغرد يي وخدام نّس ئنّاياس: «عفاش سّوفغ زيݣي ثامطوطا غر برّا ثقنث لباب فيراس».
18 ثيلي ثلسا أعبان أبرباش ئتخ أياد أيد لسّانث ثرباثين ن-ؤوݣلّيد ثعرّيمين. داي ئسّوفغت ؤخدّام نّس غر برّا ئيقن لباب فيراس.
19 ثݣر ثامار ئيغد خف ئيخف نّس، ثبّي أعبان أبرباش نّا غيفس ئلاّن ثݣ أفوس نّس خف ئيخف نّس كو تدّو تسغويّو.
20 ألي ئتيناي ݣماس أبشلوم ئسالت: «ئسي كم ئسخصر أمنون؟ فست دغي أوتما أد ؤر تامز أياد ݣ وول نم». داي تزدغ تامار ݣ تادّارث ن أبشالوم ݣماس غاس نتاث ثحزن.
21 ئسل ؤݣليد داود يي ؤينا يجران كول ئيحرّوياس لحال شيݣان.
22 إد أبشالوم ؤر ئسيول يي ݣماس أمنون لا س-ؤوينّا ؤر ئحلين ولا س-ؤوينّا ئزيلن، ئتخ ئيشره أبشالوم أمنون خف ؤينا ئݣا ئتخ ئسخصر تمار ؤولثماس.
23 يلي ضارث ن سين ئسݣاسن، ثلاّ ثلاسا غر أبشالوم مميس ن داود ݣ بعل حاصور طرف ن لحد ن ثمدينث ن أفراييم ئيغرد أبشالوم يي وراو ن-ؤݣليد كول نّسن.
24 ئدّو أبشالوم غر أݣلّيد ئنّاياس: «دغي ثيوض لوقث ن ثلاسا ن وولي ن-ئسمغ نش، ريخ أد-يدو ؤݣليد د ئرݣزن نس غر ئسمغ نش».
25 ئنّاس ؤݣلّيد يي أبشالوم: «لاأممّي ؤر نتدّو شا كول نّخ أد غيفش نتقل». ئيعاود ئحاولث أبشلوم، إد با نس وخا ؤريري أد ئدّو إݣاس لخاضر.
26 ئنّاياس أبشالوم: «ئيس ؤر ئيتدّو عفاش أمنون يما ئدنخ؟» ئنّاس ؤوݣليد: «ماخ أديك ئمون؟»
27 ئنض أبشالوم ݣ واوال نس ألي يوزن ؤݣليد ئيتس أمنون د ورّاو نس كول.
28 ئيوصّا أبشالوم ئيعرّيمن نّس ئنّاياسن: «حظوياث عفاون أدّاي ئسكر أمنون س شراب ئنيغاون وثاث أمنون ثنغيمث، أد ؤور تݣداث، ها ثين نك أون ثينان جرداث ئخفاون نّون ثݣيم إرݣزن».
29 ݣناس ئيعرّيمن ن أبشالوم يي أمنون أم ؤينّا س-ئوصّا أبشالوم كرن واراو ن-ؤݣليد نين ئسردان نّس رولن.
30 قبل أنّاوضن إزوُور لخبارغر داود نّاناس: «ئنغا أبشالوم أراو نّش كول ؤر ئراح ديݣسن أود يون».
31 ئكر ؤݣليد ئفلي ئعبان نّس ئݣن ݣ واشال، أود ئسمغان نّس كول نا بدّانين فلين ئعبان نّسن.
32 ئيجاوب يوناداب ممّيس ن شمعي ݣماس ن داود: «أد ؤر ئيتّيني سيدي ئد كول ئيعريمن ن-وݣلّيد مّوثن. ئتخ غاس أمنون أيذ ئيمّوثن، ئتخ أبشالوم ئيلاّ ئيعول أد يي أينّا زݣ واس نّا ئدلاّ تامار ؤلثماس.
33 أد ور تامن إس موثن وراو نّش كول، ئتخ غاس أمنون أݣ ئمّوثن».
34 ئرول أبشالوم. ئهزّا وعرّيم أريترقابن س تيط نّس يانّاي شعب ئعدّان ݣ-ؤبريد ضاراس زݣ تمناط ن عاري.
35 ئنّاس يوناداب يي ؤݣلّيد: «هاياش أراو نّش دّاند، أم ؤينا شنيخ نك أسيدي».
36 غاس أينّا س-ئشمل أوال هاش أرّاو ن-ؤݣلّيد دّاند هزّان أيرض أر ترون أود أݣلّيد د ئسمخان نّس كول ؤلان شيݣان.
37 ئد أبشالوم ئرول غر تلماي مّيس ن عمّيهود أݣلّيد ن ݣيشور. أر يلا داوود خف ممّيس أوسّان نّا كول.
38 ئد أبشالوم ئيرول ئدّو غر ثقبيلث ن ݣيشور، ئيقيم ديس شراض ئسݣاسن.
39 يلي داود ئنغاث ؤمارݣ ن مميس أبشالوم ئرا أث ياناي، ئتخ ئجي زݣ لحزن ن أمنون.