28
1 داي ئجرو ݣ-وسّان نّا، ئس دجمعن ئفليسطينيين لعسكر نّسن يي ئمنغي أد نّاغن د-إسرائيل ئنّا أخيش يي داود: «ئسيناث ئس تدّام أتفغم أݣدي غر لموخيّام شݣ د-يريزن نّش».
2 ئنّاس داود يي أخيش: «ستيت تسّند ئد ئسمخ نّش ئدّا أد-يݣ أينّاخ». ئنّاس أخيش يي داود: «ئوا دّيخ أشيݣخ د-اعسّاس خف ئخف ئنو ؤسّان-اد كول».
3 ئد صَمُوئِيل ئمّوث حزن غيفس آيث إسرائيل كول نّسن، مضلنث ݣ تمدينث نّس رّاما، شاول نتّا ئسّوفغ وينّا دا د-ئسحاظار لارواح د-يشوافن زݣ تمازيرت.
4 جمعند ئفلسطينيين بنون ئخامن ݣ تمدينث ن شونم داي ئجمعد شاول إسرائيل كول نّس بنون ئخامن ݣ جلبوع.
5 ينّاي شاول لموخيّام ن-ئفليسطينيين داي ئخلع ئرݣيݣ وُول نّس أر لحد.
6 ئسال شاول ربّي أها ؤر ثيجاوب لا س توارݣيت ولا س-ئيكهّان ولا س لانبييا.
7 ئنّاسن شاول يي ئسمخان نّس: «قلباثي خف تمطوت ئيتحقّان أتيݣ م-رّوح حما أدغورس دّوخ أد-ئ ثحقّا». نانّاس ئسمخان نّس: «هاياش ياث تشوافث ݣ عين دور».
8 ئسنثل شاول ئخف نّس ئنسا ئعبان ضنين ئدّو نتّا د سين ئرݣزن ديدس، دّوند غر تمطوت ݣ-ييض ئنّاس: «حقّايي س رّوح تنزغييد واد نّا دّيخ أد-ام ئنيخ».
9 ثنّاس ثمطوت هاثين تسّند مايد ئيݣا شاول نّا ئسوفغن وينّا د-ئسحاضار لارواح د-ئشوّافن زݣ تمازيرت؟ ئوا ماخ أد ئتبنود تاسقّورث يي تودرت ئنو حما أد-ئ ثنغد؟
10 ئيݣّولاس شاول س ربّي ئينّا: «شيخام لعاهد ن ربّي يا شان ؤسكين ؤرام ئتجرو».
11 ثنّاس ثمطوت: «مايد ئيمس واتخ أش ديسّلايخ؟». ئنّاياس: «ريخ صَمُوئِيل».
12 ثنّاي ثمطوت صَمُوئِيل ثسغويي أغويي أخثار ثنّا يي شاول: «ماخ ألّيݣ ئتݣيد تاخدّاعث-اد أها شݣ شاول».
13 ئنّاس ؤݣلّيد: «أدور تݣد، ماي ثنّايث؟ ثنّاس ثمطوت ئ-شاول يان روح يوليد زݣ وشال».
14 ئينّاياس: «ميمش ئݣا ؤراعا نّس؟». ثنّاس: «أرياز ئيوسّيرن يوليد هاثين ئتل ݣ ؤزنّار». داي ئسين شاول ئد صَمُوئِيل ئسحودر ؤدم غر أشال ئسجد،
15 ئنّاس صَمُوئِيل يي شاول: «ماخ ألّيݣ ئتصضعث أها تسّاليتيد؟» ئنّاس شاول: «لمحاين ئينو عدّانث شيݣان ئفليسطينين دا يي تحارابن ربّي ئيضور غيفي ؤر دا يي ئتجاواب لا خف ئفاسن ن لانبييا ولا س تويرݣا غريخاش أد ئسينخ ماي تݣاخ؟»
16 ئنّاس صَمُوئِيل: «ماخف داييتسالث لّيݣ غيفش ئضور ربّي أها ئݣ أعداو نّش؟
17 أها ئييّاس ربّي أم ؤينّا س ساولخ س ئمي ئنو أها ئيبّي ربّي ثاݣلّيت زݣ ؤفوس نّش ئشت ئ-ومدّاكل نّش داود.
18 شݣين ؤر تسليت يي واوال ن ربّي أها ؤر ثصميت لغاضاب نّس، خف ؤينا أساش ئيݣا ربّي أينّاش ئݣا أسّاتخ.
19 ئدّا ربّي أكيش د-إسرائيل غر ئفاسن ن-ئفليسطينيين، أسكّا شݣ د واراو نّش أتيليم ئدي، أود لعسكر ن-إسرائيل ئدّا أتيش ربّي غر ئيفاسن ن-ئفليسطينيين».
20 فيمرّا ئتوتّي شاول س تامونث ن لقد نّس غر أشال ئݣد أر لحد زݣ ئواليون ن صَمُوئِيل أود لجهد ؤر ديݣس ئقيمي ئتخ ؤر ئتشي أغروم أسّ نّا د-ئض كول نّس.
21 ثدّود تمطوت غر شاول تانّايث ئخلع أر لحد ثنّاياس: «هاثين تسلاّ تسمخث نّش ئ-صّوت نّش تبتخ ئخف ئينو أها سفلدخ ئيواليون نّش نّايي ثنّيث.
22 دغي سفلد عفاش ئ-ووال ن تسمخت نّش أدجي أد سرسخ دثاش شان شوي ن-ؤغروم أتشّد أداش ديعايد لجهد أتّيغيد أتدّود ݣ-ؤوبريد».
23 ؤر ئقبيل ئنّاس: «ؤر نّيخ أد تشخ». حاولنث ئسمخان نّس د تمطوت أود نتّاث ئعايد يݣ س واوال نّسن ئكر زݣ واشال ئقّيم خف ثيسي.
24 يلي غر تمطوت يان ؤعجلي يقّن ݣ ثادّارث فيمرّا ثغرصاس ثاويد أݣر تݣث ثسنود أغروم وار ثامثونث،
25 ثسقربد ؤتشّي غر داث ن شاول د ئسمغان نّس تشّين كرن دّون ݣ-ئض نّا.