24
داود ئيرحم شاول
1 ياليد داود زݣ دينّا، ئيزدغ ݣ لعواري ن عين جدي.
2 أينّا ݣ ديعايد شاول زݣ ضارث ئيفليسطينيين عاودناس مدن، نّان: «هاياش داوود ݣ صّحرا ن عين جدي».
3 ياويد شاول تلتا لاف ن-ؤرݣاز ئتّوخثار زݣ إسرائيل كول نّس، ئدّود أد ئيقلب خف داوود ديرݣزن نّس ݣ ثژروثين ن تملالين،
4 ئدّود غر تازريبث ن-وُولّي ݣ ؤوبريد دينّا ئيلاّ يان ئيفري ئيكشمث شاول أديݣس ئيفغ غر برّا يلي داوود ديريݣزن نّس ݣ وابوض ن-ئفري قيمان.
5 نّاناس ئرݣزن نّس يي داوود: «هاثين أسّا أيداش ئينّا ربّي هايّي دّيخ أداش شخ أعداو نّش غر أفوس نّش ݣيس أينّا تريد». ئكر داوود ئيبّي أشضّور ن-ؤوزنّار ن شاول س لحس.
6 ضارث ن ؤينّا ئيقيما دينّا لحال خف وُبّويي ن-ؤشضّور ن-ؤزنّار ن شاول.
7 ئينّا ئيرݣزن نّس: «ئسحرم غفي ربّي أدور تاسيخ أفوس ئنو خف ونا ئخطار ربّي أݣلّيد اها ئمسحث س-زيت».
8 ئينهى داوود ئيرݣزن نّس س ووال ؤورتن يودجّي أد كر غر شاول ئكر شاول ئيفغ زݣ ئيفري ئدّو ݣ ؤوبريد.
9 ئيكر داوود ضراس ئيفغ زݣ ئيفري ئيغراس: «أسيدي، أياݣلّيد!» ئيراعا شاول ضراس ئيحودر داوود س-وُودم غر أشال ئسجد.
10 ئنّاس داوود يي شاول: «ماخ ألّيݣ داتسفليد يي ووال ن مدن دا تّينين هاثين ئيرا داوود أش ئيضارّا؟
11 هاثين أسّا تخ ثانّيد س والن نّش ئس شي ديشا ربّي أسّا غر أفوس ئينو ݣ ئيفري نّاني نغث حنّاخ غيفش نّيخ ؤر تّازضخ أفوس ئينو غر سيدي ئتخ نتّا ئيمسحث ربّي.
12 ئيوا دغي أبانو حقّاد راعا أشضّور ن-وزنّار نّش ݣ-ؤوفوس ئينو ئتخ بّيخ أشضّور ن-ؤوزنّار نّش أها ؤورش نغيخ ئسين تحقّاد ئس ؤر ئيلّي ݣ-ؤوفوس ئنو ماس ش تضارّاخ ولا تعدّاخ غيفش هاثين ؤر خضيخ ݣ لحق نّش والاينّي شݣ مور تحاضرد يي رّوح ئينو أتفضاض.
13 أد ئحشم ربّي ئنݣري ئيك أداش ئيخلس ربّي أينّا يي تݣيد، أفوس ئينو ؤر ثين تّاژضخ غورش
14 ئمشينّا دا يتيني لمتال ن-يمزوورا: زݣ ونا ؤر ئحلينين دا دتفّغ تيخّيت.
15 ضراس ن مي أݣ فغ أوݣليد ن-إسرائيل؟ مايد تتفورد زݣ ضارث ئيݣدي ئيموثن؟ تازلد ضارت يان أݣوردو.
16 ربّي أيد ياكّان لحق أها ئحشم ئنݣري ديك أها ينّاي أطواعر-ئينو أها ئيفوكّي زݣ ؤوفوس نّش».
17 غاس أينّا سيشمل داوود أوال تخ نّس، ئساول شاول ئينّا: «ئد صوت تخ وينش أممّي داوود؟» ئيعلا شاول أحرسي نّس أريترو
18 ئنّاس يي داوود: «شݣين توفتي نكين ݣيخاش لعار شݣين ئد تݣيت ديݣي لخير.
19 شݣ تسنعتيي أسّا أينّا تݣيد ئدي لخير ئتخ ئيشايين ربّي غر أفوس نّش أها ؤر ئيتنغيد.
20 ئد أد ياف شا أعداو نّس أها ئيرژماس؟ ربّي أداش ئيݣ لخير نّا ديدي تݣيد أسّا تخ.
21 دغي هاثين سنخ ئس ثݣيث أݣلّيد أها تّوشياس تݣلّيت ن-إسرائيل ݣ أوفوس نّش.
22 ئوا دغي ݣالّي س ربّي أد ؤر تبّيد زرّيعث ئينو ضاري أدّاي متخ أها تمحود ئسم ئينو زݣ تادّارث ن باب ئينو».
23 ئيݣال داوود يي شاول ئدّو شاول غر تادّرث نّس ئد داوود د-يرݣزن نّس أولين غر لعواري.