17
جوليات ئيحݣر لعسكر ن ربّي
1 جمعن ئفلسطينيين غر لموخيّام يي لحرب، مصافّان ݣ ثمدينث ن سوكوه نّا ئݣان ثين يهوذا، خيمن ئنݣر سُوكُوهَ د ئينݣر عَزِيقَةَ ݣ أَفَس دَمِّيم.
2 ئد شاول د ئرݣزن ن-إسرائيل جمعند خيمن ݣ ثالات ن ثاسافث، أر سّوجيدن ئيمنغي د ئفلسطينيين.
3 بدّان ئفلسطنيين نّيݣ ن عاري زݣ يوث لجيهث، ئد أرّاو ن إسرائيل بدّان نّيݣ ن عاري ݣ لجيهث ياضن، ثلي ثالات ئنݣراسن.
4 ئفّغد يون ؤرياز ئجهدن زݣ لموخيّام ن-ئفلسطنيين ئسم نّس جوليات، زݣ ثمدينث ن جتّ، ݣ ثاغزي نّس شراض ن لميتروياث،
5 ئيݣا خف ئخف نّس لكاصك ن نحاس، ئيلس أمسنال بويفرشا لعبار نّس خمسا لاف ن شّاقل ن نحاس (أتّاين ن 60 كيلو).
6 د ؤومسنال ن نّحاس خف ئيضار نّس، د ؤوحريش ن نّحاس ئنݣر ئيغاريون نّس.
7 لقوس ن-ؤحريش نّس أم ؤفݣاي ن-ئيدرّازن، لمضا ئلّان ݣ ؤوحريش نّس لعبار نّس ستميا ن شاقل ن-وُوزّال (أتّاين 7 كيلو). ييلي ونّا دايتّاسين أمسنال نّس دا يتّدو دثاس.
8 داي ئبد أر ئيقّار ئ-لصفوف ن لعسكر ن-إسرائيل ئنّياسن: «مّاخ ألّيݣ تݣام صّف أتبدوم لحرب؟ نك أفليسطيني، كنّي غاس ئسمغان ن شاول، خثراث يون ؤريازأد ئيفغ غوري أن محراب.
9 مش ئغيي أد ئدي ئنّاغ أها ئينغي، ندّا أنݣ ئسمغان-نّون. ئد مش ثرّيخ أها نغخث أتݣم ئسمغان-نّخ أراخ تعبادم.
10 ئنّياسن ؤفلسطيني نكين حݣرخكن أسا أ لصفوف ن لعسكر ن-إسرائيل، شاثيد أرياز أديتس نّاغخ».
11 ئسفلد شاول د كول إسرائيل يي واليون ن-ؤفلسطيني، دُويْن داي ݣدن شيݣان.
12 ييلي غر داود ممّيس ن يسى زݣ ثقبيلث ن-أفراتا إزدغن ݣ بيت لحم ن يهوذا، سبعا ن ووماثن نا ثيوݣر. ئد بانس ن داود يسى ئوسير ݣ لحشام ن شاول.
13 داي دّون ورّاون ن يسّى ئخثارن س شراض ثفورن شاول غر لحرب، ئسماون-نسن: أليآب أمنزو، ويسيّن أبيناداب، ئد ويس شراض شمّة.
14 داود أيد ئݣان أمژيان ديݣسن. ئد شراض ئيخاثار ثفارن شاول أݣلّيد،
15 ئد داود دا ئتدّو غر شاول ئعايد حما أديكس ؤلّي ن بّا نّس ݣ بيت لحم.
16 ئد جليات أفلسطيني ئزايد ݣ ؤحݣّرنّس خف لعسكر ن-إسرائيل ثيفاوت د تدݣات ربعين ن واسّ.
17 ئنّاياس يسّى يي داود ممّيس أوي عفاش يي أيثماش شان بندق د عشرا ن توغريفين ن ؤغروم ثرولث سّيݣ غر أيثماش.
18 ئد عشرا ن-تكمسين ن-لجبّن شيثن يي لقبطان ن لكبّانيّا ن-ئيد والف، تحقّاث أيثماش ئس غورسن تݣا لمان، ثاويد أوال ئيصحان غيفسن.
19 نيثني د شاول د كول ئرݣزن ن-إسرائيل ئلاّن ݣ ثالات ن تسافث نّاݣ دا تناغن د ئفلسطينيين.
20 ئكّر داود ثيفاوث زيك، ئيزري ؤولّي ئ-مايتن ئيحطّون ئيفغ ئدّو ئيݣ أم ئمشينّا ثيوصّا بّا نّس يسّى ياوضن تما ن لموخيّام ها لعسكر فغند غر ئمنغي سغوين أد كشمن لحرب.
21 داي مصفّان أيت إسرائيل د ئفلسطينين صف منيد ن صف.
22 يادج داود لعوين نّا غورس ئلاّن ݣ ؤفوس ن-وعسّاس ن لعوين، يازّل غر صّف ن-ئمنغي ياوضن ئسال خف آيثماس ئس غورسن تݣا لْمان.
23 نتّا داييسن ئتمساوال، هان جوليات أفلسطيني ئفغد زݣ صف ن-ئفيليسطينيين، أها أرثن ئتعيارس ووال نّا داسن ئتّيني ديما، داي ئسلاس داود.
24 كول ئرݣزن ن-إسرائيل غاس أنّاين أريازا رولن زݣ دثاس ئتخ ݣدناس شيݣان.
25 داي نّان ئرݣزن ن-إسرائيل: «ئيس ثنّايم أريازا ئفّغد؟ حما أد ئيحقّر آيث إسرائيل هان ونّا ثينغان ئدّا أتيغنو ؤݣلّيد شيݣان أها ئشاس ثاربات نّس ئد آيت تخامث نّس ئدا أد غيفسن ئيكس ضريبا».
26 داي ئسال داود ئرݣزن نّا ئيتس ئيبدّان: «مايداس ئتّوݣان يي ورياز نّا ئدّان أد ئينغ أفلسطيني-اد أها ئيكس لعار خف إِسْرائِيل ئتخ مايد ئيمس أوفلسطيني ياتخ ؤر ئزيين ئتحقار لاصفوف ن لعسكر ن ربّي ئدّرن؟»
27 ئنّاس لعسكرأم ؤينّا مي تسلاث أيد ئيتوݣان ئ-ورياز نّا ثي نقّان.
28 داي ئسلاّ أليآب ݣماس أخثار ئ-ووال ن داود د ئرݣزن داي ثطايراس يي أليآب خف داود ئنّياس: «ماخ ألّيݣ تدّيث؟ مامين ثودجّيد أينّا ن تقضيعت ن-وُولّي ݣ صحرا؟ نك سنخ لكيبر نّش د توخّوت ن-وُول نّش، ئتخ غاس ثدّيد أتفرجد ݣ ئمنغي».
29 داي ئنّاس داود: «مايد ݣيخ دغي؟ ئد أود أوال ؤر سوالخ؟»
30 ئيفغ زݣ دثاس غر داث يون ياضن ئيعاود ئسالث ئيرار غيفس لعسكر س-أم ووال أمزوارو.
31 ياوضن ووال ن داود غر شاول، يازن غورس.
32 داي ئنّاياس داود يي شاول: «أد ؤورئترݣيݣي وُول ن-أود يون، ئسمغ نّش أد ئيفغ غورس أد ديتس ئنّاغ».
33 ئنّاس شاول يي داود: «ؤور تيغيث أتفغث غر أفلسطيني، أديتس تنّاغث ئتخ تسولث ثمزّييث ئد نتّا بويمنغان أيد ئيݣا زݣ مايد ئسول ئمزّيي».
34 داي ئجاوبت داود: «أمكسا أيد ئيݣا ئسمغ نّش، ئدّود غوري ئيژم د دّب نزغن ثيخسي زݣ ثقضيعث ئنو،
35 رولخ ضراس، هجمخ غيفس فوكّاخد تيخسي زݣ ؤقمو نّس، داي هان نتّا ئيكرد غوري شنقخث زݣ ثمارث وثخث نغخث.
36 ئيژم د دب س سين نّسن أيد ئنغا ئسمغ نّش أد ئيݣ أوفلسطيني ؤر ئزيين أم يون ديݣسن ئتخ ئعاير لصفوف ن لعسكر ن ربّي ئدّر».
37 داي ئنّاياس داود: «ربّي نّايي ئفوكّان زݣ ؤقمو ن-ئيزم د دّب ئدّا أد يفوكّا زݣ ؤفوس ن-ؤفلسطيني-اد». داي ئنّاياس شاول يي داود: «واخا دّو، ربّي ئدّا أدّيك يلي».
38 ئسّلساس شاول يي داود ئعبان نّس ئݣاس لكاصك ن نحاس خف ئيخف نّس ئسلساس أود أمسنال نّس.
39 ئحزماس يي داود سيف خف ئعبان نّس ؤر ئيغي أديدّو داود ئتخ ؤر دجين ئجرّيب. داي ئنّاس داود يي شاول: «ؤور غييخ أد دّوخ س-ؤوياد، ئدخ ؤر دجين ثن جريبخ». داي ئكسثن غيفس.
40 داي ياسي ثاغريث ݣ-ؤفوس نّس، ئخثار خمسا ن-ئسلّيون ملّسنين زݣ واسيف ئݣثن ݣ ؤقراب نّس، ياسي ئلّݣ ݣ ؤفوس نّس داي ئواعد أفلسطيني.
41 ئدّود ؤفلسطيني ئقربد غر داود نتا د ونّا داس ئتّاسين أمسنال نّس دثاس.
42 نتا ئسّيݣد ؤفلسطيني ينّاي داود ئيحقّرث، ئتخ ئيݣا أشهبون أها ئمژيّي، ئيغودا لقد نّس.
43 داي ئنّاياس ؤفلسطيني يي داود: «ئد ئݣدي أيد ݣيخ ألّيݣ غوري توسيث ثاغريث؟» داي ئنعل ؤفلسطيني ربّي ن داود.
44 ئنّاياس ؤفلسطيني يي داود: «أدّود غوري أدفخ أكسوم نّش يي طّيور ن-ئݣنّا د لوحوش ن لخلا».
45 داي ئنّاياس داود: «شݣ ثديد غوري س سّيف د نبل د ؤحريش، نكّين أندّوخ غورش س-ئسم ن ربّي ن لجيوش ن لملايكا ربّي ن لصفوف ن لعسكر ن-إسرائيل نّا ثعايرث.
46 أسّا ييويشيد ربّي غر ئفاسن ئنو، أك نغخ، بّيخ ئخفنش. أها شخ أسّا لݣنازات ن-ئيمتّين ن لموخيام ن-ئفلسطنيين يي طّيور ن-ئݣنّا د لحوش ن وشال، ثيسين دّونيت كول ئس ئيلاّ ربّي غر إسرائيل.
47 أها ئسينن كول وينّا لّانين دا، ؤر ئد س سّيف د أوحريش أس دايتفوكّا ربّي، ئتخ لحرب وين ربّي أݣا ئدّا أكن ئديش غر ئيفاسن نّخ».
48 ئكّرد ؤفلسطيني ئقربد غر داود، فيمرّا ئرول غورس داود أديس ئيمواث.
49 ياژض داود أفوس نّس غر أقراب ياسيد زيݣس ئسلّي ئݣث ݣ ئيلݣ ئوثيس أفلسطيني غر ئنير، داي ئژّون ئسلّي ݣ إنير نّس، ئتّوتّي خف ؤدم نّس غر أشال.
50 س-ؤياد أس ئينغا داود أفلسطيني س-ئيلݣ د ئسلّي، ئوّث أفيلسطيني ئنغاث بلا سّيف ݣ ؤفوس نّس.
51 داي يازّل داود ئبد خف ؤفلسطيني، ئسروض سّيف نّس زݣ لغلاف أها ئشملاس منغيوث ئ-وفلسطيني، ئبياس ئخف. أليݣ أنّاين ئفيلسطنين ئس ئيمّوث ونّا ئجهدن ديݣسن، أسين ثارولا.
52 كّر ئرݣزن ن-إسرائيل د يهوذا س-ئيغويّان، ثفور ئفلسطنيين أليݣ ن-يوضن ثالات، سيوضنثنين أر لبيبان ن ثمدينث ن عقرون. تّوتّين ئمتّيين ن فلسطين ݣ ؤبريد ن ثمدينث ن شعرايم أر ثامدينث ن جت د ثمدينث ن عقرون.
53 داي عايدند وارّاو ن-إسرائيل زݣ ثوزعا ن-ئفلسطنيين أسيند سلاح د-ؤينا ؤدجان زݣ لموخيام نّسن.
54 داي ياسي داود ئخف ن-ؤفلسطيني ياويثيد غر ثمدينث ن لقدس، ئد سلاح نّس ئسرسث ݣ ؤخام نّس.
55 ليݣ ينّاي شاول داود ئفغ أد ئنّاغ د ؤفيليسطيني، ئنّاس يي أَبْنَيْر لكمندار (لكمانضار) ن لعسكر نّس: «وين مي أݣا ؤعرّيما؟» داي ئنّاياس أَبْنَيْر: «ݣوليخ س تودرت نّش أياݣلّيد مش ثسنخ».
56 ئنّاياس ؤݣليد: «سال شݣ مميس ن مي أݣا ؤعرّيم-اد».
57 غاس ئعايد داود زݣ منغيوث ن-ؤفلسطيني يامژث أَبْنَيْر ياويثيد غر شاول س-ئخف ن-ؤفلسطيني ݣ-ؤفوس نّس.
58 ئنّاس شاول: «ماش يورون أياعرّيم-اد؟» داي ئنّاس داود: «مميس ن-ئسمغ نّش يسّى زݣ بيت لحم».