16
وݣلّيد ؤجديد ن-إسرائيل
1 داي ئنّاس ربّي يي صَمُوئِيل: «أر مي أيد تّامزد لحزن خف شاول؟ هاتين نك ݣريخ س لمولك نّس خف إسرائيل عمر ئيش نّش س زّيث تدّود أش ازنخ غر يسّى ئلان ݣ تامدينت بيت لحم ئتخ أوفيخ يي يخف ينو أݣلّيد ݣ واراو نّس».
2 داي ئنّاياس صَمُوئِيل: «ممش تݣاخ أد دوخ؟ مش ي ئسلاّ شاول ئدّا أد-ي ئنغ». داي ئناس ربّي: «أوي ݣ ؤفوس نّش ثاعجليث زݣ ئزݣار ثينيد: "دّيخد أت غرصخ يي ربّي".
3 ثغرد يي يسّى غر ثامغروصت، نك دّيخ أداش نعثخ ماي تݣّاث، تمسحد س زّيث أݣلّيد ؤجديد نّا ريخ».
4 داي ئݣ صَمُوئِيل أينّاس ئينّا ربّي. ئدّود غر بيت لحم، أر ترݣيݣين ئيمغار ن تمدينت أينّا ݣ ديدّان أد-يتس مجماعن ئينّا يون: «ثاوادا ن لمان؟».
5 ئنّاسن صَمُوئِيل: «ثݣا لمان! دّيخد أد ݣخ ثامغروصث يي ربّي. زازديات ئخفاون نّون ثدومد ديدي غر ثمغروصث». داي ئزازديي صَمُوئِيل يسّى د وراو نّس داي ئغراسن غر ثمغروصث.
6 داي أليݣ ديوضن، ينّاي صَمُوئِيل أليآب، داي ئنّا: «ستيت ونا يخطار ربّي أݣلّيد ؤجديد ها يمسحث س زيت هات داثاش».
7 ئنّاس ربّي يي صَمُوئِيل: «أد-ور تراعا غر لقد نّس ولا غر ثاغزي نّس ؤر ثقبيلخ، ئتخ ؤريد أمّ وينّا دا يترعا بنادم نتّا دا يتراعا غر برّا ئد ربّي دا يتراعا غر وول.
8 داي ئغرد يسّى يي أبيناداب ئزّريثيد غر داث ن صَمُوئِيل، ئنّاياس: «أود واد ؤر ثيخثار ربّي».
9 أها ئزريد يسّى شمّا. داي ئنّاس صَمُوئِيل: «أود واد ؤر ثيخثار ربّي».
10 ئزّريد يسّى سبعا ن-وراو نّس داث ن صَمُوئِيل، ماشان صَمُوئِيل ئنّاياس يي يسّى: «ربّي ؤر-يخثار أود يون زݣ ويد».
11 ئنّاس صَمُوئِيل يي يسّي: «ئيس قضان ئيعرّيمن؟» ئنّاس: «ئسول ؤمزيان ئيلاّ دين دا ئكسّا ؤلّي». ئنّاياس صَمُوئِيل: «أزن مايثّيد ئتّاوين، ئتخ ؤر ننّي أنضور يي طبلا أر دّيدّو غر ديتخ».
12 داي يازن أوينثيد. هاثا ئزݣاغ ݣ-ودم نّس، غودانث والّن نّس. د لقد ئغودان. داي ئنا ربّي يي صَمُوئِيل: «كّر مسحث س زيث هاثين نتّا أيا».
13 داي ياسيد صَمُوئِيل ئيش ن زّيث، داي ئمسحث أمّاس ن-أيثماس. داي ئݣزد رّوح ن ربّي خف داود أها ييلي أݣّيتس زݣ واسّ نّا. ئيكر صَمُوئِيل ئدّو غر تمدينت ن رّاما.
14 داي ئفّغ رّوح ن ربّي زݣ شاول أر ثيسمحان يان رّوح ؤر-يحلين نا ديوزن ربّي.
15 داي نّاناس ئسمخان نّس يي شاول: «عفاش هاثين ئيلاّ يان رّوح ؤر-يحلين ديوزن ربّي، دا ش-يسمحان.
16 أدجاخ أداش نيني أسيدي، نكني ئسمخان نّش دثاس أندّو أنقلّب خف شان يون ئسّن أديلاها س لݣيتارا. أدّاي ش يامز رّوح ؤر-يحلين ديوزن ربّي ئدّا أد-يلاها س-يفاسن نّس لݣيتارا داي ئيغودوياش لحال».
17 داي ئنّاسن شاول يي يسمخان نّس: «رعاثي عفاون، شان يون ئسّن أديلاها ثاويمثيد غوري».
18 ئجاوبث يون زݣ ئعرّيمن ئنّا: «هاثين أنّايخ مّيس ن يسّى أوبيت لحمي، ئسّن أد-يلاها، يون ئجهدن أرياز ن لحرب، ئسن أد-يفصّل أوال، ئݣا زّين أها يلي ئيتس ربّي».
19 داي يازن شاول ئمازان غر يسّى ئنّاياس: «أزنييد داود ممّيش، ونّا ئكسّان ؤلّي».
20 داي يامژ يسّى أغيول ئعمر أشواري س-وغروم د-ويدّيد ن شراب د يون ئغجد ن تاغّاط، يازنهن خف أفوس ن ممّيس داود غر شاول.
21 داي ئدّود داود غر شاول، ئقّيم داثاس داي ئحوبّاث شاول شيݣان، داي ئݣيث د-امساي ن سلاح نّس.
22 داي يازن شاول غر يسّى ئنّاياس: «عافاش أدج داود أد ئدنخ ئبد يتس ن وُوسّان هاثين رضيخ غيفس».
23 أدّاي يامز رّوح ؤر-يحلين د يوزن ربّي يي شاول، داي ياسي داود لݣيتارا أر تيسلاها ݣ-ئفاسن نّس داي سݣونفا، ئغوداياس لحال، داي ئفّغ زيكس رّوح ؤر-يحلين.