6
أعايد ن تّابوث ن لعاهد ن ربّي
1 داي ئيقّيمن تّابوث ن لعاهد ن ربّي ݣ تمازيرث ن-ئيفليسطينيين سبعا ن-وايورن.
2 داي سدعاند ئيفليسطنيين ئيكهّان د ئيشوّافن نّاناسن: «مايد نتݣا ئتّابوث ن لعاهد ن ربّي؟ سنعثاثاخ ما نيمش تنترارا غر أدغار نّس».
3 داي نّاناسن: «مش ثرام أتراريم تّابوت ن لعاهد ن ربّي ن-إسرائيل أدورث ترراث ئيخوا والاينّي أزناث ئيتس ثامغروصث خف دّنب نّا تݣام، حما أتجّييم أها ثيسينم ماخ ألّيݣ ؤوراون ئحيّد أوفوس ن ربّي؟»
4 أها سقسانثن ئفليسطينييين نّاناسن: «مانيمش أيْ تݣا ثمغروصث نّاس نتّازن؟» داي نّاناسن ئيكهّان د ئيشوّافن: «حاسباث ئيخاتار ن-ئيفليسطينيين، ثازنم خمسا ن لا شكال ن-لبّاسر زݣ دّهب د خمسا ن لاشكال ن-ئغرضاين زݣ دّهب ئتخ يوت ن لمصيبت أيد كون ياغن كونّي د ئيخاتار نّون».
5 دغي، عذلاث لاشكال ن لبّاسرد لاشكال ن-ئيغرظاين نّا ئسخصرن ثامازيرث نّون، أها ثسمغورم ربّي ن-إسرائيل بارأد ئسوهن ثيثي ن-ؤفوس نّس غيفون ذ خف ئد ربّي نّون د تمازيرث نّون.
6 ماخ أليݣ ثرام أتسقسحم ؤلاون نّون ئمشينّا ثن سقسحن ئمصرين ذ-ؤݣلّيد نّسن فرعون؟ ئسوراسن رزيمن فّير ن-مايد هن ئعاقب ربّي أعاقب ئيوعرن أها أزنثن ئيبردان نّسن أها دّون؟
7 خف ؤوينّا، عذلاث يوث ن-لكرّيصا ثوجديت أها ثقنمت ئسناث تفوناسين نّا ئسّوطوضن، ؤر دجّين غيفسنت تّوݣري تزݣلوت أها ثراريم ئعجليين-نّسنث غر لكوري،
8 داي ثسرسم تّابوث ن لعاهد ن ربّي جاج ن لكرّيصا د يسكّين ن دّهب نّاس ثوزنم أم ثامغروصت ن دنب. تݣيمتن ݣ صندوق ثما ن-تّابوث ن ربّي، داي ثازنم كولشي أداس ئدّو.
9 ثراريماس لبال، مش ثدّا ݣ أوبريد ن تمازيرت ن-إسرائيل غر تمدينت ن بيت شمس، ثيسينم ئد ربّي ن-إسرائيل أيداخ ئوثن ثيثي تخ ئيوعير، والاينّي مش ثكّا أبريد ياضنين أياد أخ ئيجران ؤور-يد زݣ ربّي ن-إسرائيل غاس زهر-نخ أݣ ئلاّ شا.
تّابوث ن لعاهد ن ربّي ئعايد س لهذيّاث أݣيتس.
10 داي ݣين ئيرݣزن نّا أينّاسن ئتّونان، أمژن سنات ثفوناسين ئسّوطّوضن أها قّنهنت غر لكرّيصا، ئد ئعجليين قنن غيفسن ݣ لكوري.
11 داي سرسن تّابوث ن لعاهد ن ربّي جاج لكرّيصا، ذ صندوق ݣ لاّن ئيغرظاين ن دّهب ذ لاشكال ن لبّاسر نّسن.
12 داي دّونث ثفوناسين نيشان ݣ أوبريذ أختار ن تمدينث ن بيت شمس أر سونݣونت، ؤر ظورنث لا خف ؤفاسي وﻻ خف ؤژلماض. داي تفورهنت ئيخاتار ن-ئيفلسطينييين ألّيݣ نيوضنث غر لحد ن تمدينث ن بيت شمس.
13 أها ئيلين ئيمزداغ ن تمدينت ن بيت شمس دا مݣّرن ئيردن ݣ تالات، هزّان ألنن نّسن أنّاين تّابوث أها فرحن شيݣان أر تناّيْن.
14 داي ثدّو لكرّيصا غر ئيݣر ن يهوشع نّا ئيݣان زݣ بيت شمس، داي ثبد دينّا ݣ ئيلاّ يان ئسلّي أخاثار. داي قشّرأݣشّوظ ن لكرّيصا، غرصن يي ثفوناسين أها ݣنثن د ثامغروصث ئيتغوسن يي ربّي.
15 سوݣزن أراون يعقوب ئلاويين تّابوث ن لعاهد ن ربّي د صندوق ئيتس ئيلّان س مايد ديݣس ن لاشكال ن دّهب، خف ئسلّي أخثار ݣ واسّ نّا شان أيت بيت شمس تيمغراص د تمغراص ئيتغوسن يي ربّي.
16 ألّيݣ أنّاين ئيخاثارن ن-ئيفلسطينِيْن س خمسا نّسْن ماݣ جران عايدن غر تامدينث عقرون ݣ واسّ نّا نّيث.
17 ئد لاشكال ن لبّاسر زݣ دّهب نّا شان ئيفلسطينييين أم توكّي خف دّنوب نّسن يي ربّي، تّوشا يوت خف أشدود، د يوت خف غزة، د يوت خف أشقلون، د يوت خف جت، د يوت خف عقرون.
18 ماشان لاشكال ن-ئغرظاين زݣ دّهب شانتن ئيفلسطينين خف لحساب ن تمدينين ن-ئيخاتار نّسن س خمسا، زݣ تمدينث نّا مي ئيضور صّور أر أدوّار أمزيان. ئد ئسلّي أخاثار نّا خف سرسن تّابوث ن لعاهد ن ربّي ئسول أر أسّا ݣ-ئݣر ن يهوشع نّا ئيݣان زݣ بيت شمس.
أعاقب ن-ئمزداغ ن تمدينت ن بيت شمس
19 داي ئيوث ربّي أيت تمدينت ن بيت شمس داي ئينغ زݣ ديكسن خمسين ألف د سبعين ن-ؤورݣاز ئتخ حقّان مايد ئيلاّن ݣ تّابوث ن لعاهد ن ربّي، داي ئحزن شعب ئتخ تن ئيوثا ربّي ثيثي تختارت.
20 داي نّان أيت تمدينت ن بيت شمس: «مايد ئغين أد ئيبد منيد ن ربّي، ربّي دخ ئقدسن؟ أغر مي نتّازن تّابوثا أداخ ئيبعد؟
21 داي أزن ئيمازان غر أيت قريات يعاريم نّاناسن: "روراند ئيفليسطينين تّابوث ن لعاهد ن ربّي، أدّود أوياتّين».