Sangangaa mainga-inga kita i guru-guru agama anu mepakanawu
2
1 Ni banimpia, ria sira nabi anu mepakanawu i olo nu tau ni Pue Ala. Ewa etu mbui ei-ei, batena ina ria sira i olomi guru-guru anu mepakanawu. Ai ina mopadongka sira patudu anu baria mamonso anu mopakadaa tau, ai mosapuaka sira Pueta anu mosompomo sira. Nakenimpesapuakara etu, ina moparia karopu i wotora saduduara, anu baria masae ina morumpa sira. 2 Agaiana nauda ewa etu, mawori tau ina mangula babeiara anu merikati. Ai nakeni nu babeiara etu, mawori tau mopakoi patudu ni Yesu anu mamonso. 3 Nakeningkawule doina ngkida anu rakadelora, etumo mpane rapadongkaka komi lolita anu rabababeira saduduara, bona mansumba sira rasi lako si komi. Agaiana nakeni nu babeiara etu, riamo pesuku anu masaemo napatimamaka sira ni Pue Ala, anu bariamo masae ina mopakaropu sira.4 Mogaloda malaeka anu madosa ni banimpia, baria sira Napawia lako i ka Natarungguna i rara nu kalolu anu madedi i naraka, mampegia sira karabotusina kara-karara i eo pobotusi. 5 Ewa etu mbui manusia anu madaa ni banimpia, baria sira napawia ni Pue Ala lako i pesukuNa. Dunia anu ni banimpia Napakagero ai ue, duduuna mamate sira ope-ope tau anu mosapuaka Ia. Batena ngkida i nabi Noho sampoanakara anu Natulungi, bona sira walu dua baria sira mamate. Lawi i Noho etu, mopadongka ia lolita ni Pue Ala i ope-ope tau, mopakanotoka sira dala mangula peundeaNa. 6 Ewa etu mbui i Pue Ala mosuku tumpu kota Sodomo ai Gomora ni banimpia, lawi madaa sira. Kotara Nagero ai apu, bona i ka Nagerona kotara etu, mewali pepopainga i tau anu baria sira mengkoru si Ia. 7 Agaiana ria sadua tau anu rasanga i Looti, anu Natulungi ni Pue Ala. I tempo ni Looti meari i kota etu, mapari mpuu rarana mangita babeia nu tumpu kota anu madaa ai anu baria manoto. 8 I tempo etu, karao mpuu rarana, lawi ia tau anu manoto, eo-eona naita ai naepe babeiara anu madaa. 9 Mewali, lako i ope-ope pepopainga anu kupadongka ni mpongone, tongawamo adiwa dala ni Pue Ala motulungi tau anu mampeulai peundeaNa, ntena sira napakanawu nu pekelo. Ai tongawa mbui kuasaNa motarunggu ope-ope tau anu madaa, mampegia eo pobotusi anu ina mai. 10 Pelumbunamo i tau anu wule mampeulai peundeara mobabei babeia nu tomoane ai towawine anu merikati, ai mopakoi kamakuasa ni Pue Ala.
Guru-guru anu mepakanawu aretu, pebai ai mampemabose sira, etumo mpane baria sira maeka mopakoi malaeka-malaeka i suruga. 11 Molentano mogaloda malaeka anu melumbu kamakuasara lako i guru-guru aretu, baria sira pebai mopapakoi ba mosasalai malaeka-malaeka ntanina, i lio ni Pue Ala. 12 Agaiana guru-guru anu mepakanawu aretu, baria manoto pampekirira, etumo mpane rapakoira apa anu baria rainsanira. Sira ewa binata anu maila anu baria keakala anu rapakala ai rapopate. Nakeni nu babeiara etu, moparia sira kagero i wotora, ewa karapopatena binata anu maila. 13 Ai ina narumpa sira nu kapari, anu sintoto ai babeiara anu madaa.
Babeia nu tau aretu mepakaea mpuu. Mogaloda i tempo mabaa, raundera mobabei daa mangula peundea nu rarara saduduara, mopakatono sira rarara. Ane mangkoni sira simbela-mbela ai komi i posusaami, mopakadaa sira sangami lawi wule mangula ngkida sira peundea nu rarara anu madaa. 14 Baria sira maluta mobabei dosa, ai ane mototoki sira towawine, peundeara kasaliu mobabei sira anu merikati. Ane ria tau anu malede pepotuura, rakelora bona mampeulai peundeara. Mampokailu liliu sira anu-anu nu tau ntanina, lawi rapobiasaramo. Sira aretumo tau anu nasuku ni Pue Ala! 15 Mopalengimo sira dala anu mamonso, mangula sira dala anu mepakapusa. Mangula sira pangkeniaka ni Bileama ana ni Beor. I Bileam etu, tau anu naunde mansumba doi lako i babeiana anu madaa. 16 Agaiana, i Pue Ala mokiraka kuasa i kalidena bona nabuku mololita ewa manusia, mpane mokambaroka ia, duduuna bariamo mewali tunggaiana mobabei anu madaa.
17 Guru-guru anu mepakanawu aretu, pensani rapandiri ewa mata ue anu mabangimo, ai ewa gawu anu nawui nu pambui mabose anu mewui masimbuku, agaiana baria moparia uda. I Pue Ala mopasilolongakamo sira pearia anu melumbu mpii kadedina, anu ina Napambolii sira. 18 Lawi mampemabose sira mampololita kono i ope-ope babeiara, agaiana pololitara etu baria mobundu. Modii sira rara nu rangara ai peundeara anu merikati bona mopakanawu tau aretu anu baria mani masae mopalengi babeiara anu madaa. 19 Rauli nu guru aretu, “Ane nipeulai patuduki, baria komi napobatua nu atura-atura, ai pensani komi mobabei apa ngkida peundeami.” Molentano sirada anu napobatua peundea nu rarara anu madaa, lawi ima anu nakuasai peundea nu rarana, iamo anu napobatua peundea nu rarana etu. 20 Tau anu manginsanimo i Pue Ala ai Toposoremata i Yesu Kerisitu anu mopawiamo sira lako i babeiara anu madaa i dunia ei, agaiana roo awetu mesola mpesola sira i babeiara anu madaa etu, batena maruminsi karugira mpane lako i mpolinguruna. 21 Aginamo baria sira manginsani dala anu manoto lako si Pue Ala, mpanena rainsanira agaiana baria sira mangula parenta ni Pue Ala anu rapadongkakamo sira. 22 Dala nu katuwura sintoto ai ngkora pandiri anu manguli ewa ei, “Dike mangkoni mpesola luana, ai boe anu radoi lau mpesola modanto i lombu.”