Sura ni Suro
Peturu
anu karombelana
1
1 Sura ei lako si aku i Simo Peturu, tudua ai suro ni Yesu Kerisitu, kupakatuka komi anu mepotuu si Yesu Kerisitu ewa kami. I Yesu Kerisitu iamo i Pue Ala anu mewali Datu Topesoremata, anu mobungkasikamo komi dala bona nipotuu Ia, lawi mobabeimo Ia anu manoto. 2 Mekakae aku si Pue Ala, bona pewati ai kalompe nu katuwu anu Nakiraka komi tetambai, lawi manginsanimo komi i Pue Ala ai i Yesu Pueta.Sangangaa maroso pepotuuta ai tapakalompe babeiata
3 Mampoliungi kuasa ni Pue Ala, Nakiraka kita sinangka anu taparaluu, bona tapake mampolumakoi katuwu anu sintoto ai peundeaNa. Etu pensani tababei nakenimpanginsanitamo Ia, anu morondemo kita mewali anaNa ai kuasaNa anu mabose ai kalompe nu raraNa. 4 Lako i kuasaNa anu mabose ai kalompe nu raraNa etu, Nadandikamo kita pewati anu malompe mpii, anu maisi pobunduana si kita. Lawi mampoliungi dandiNa etu, tepawia komi lako i peundea nu rarami anu madaa, anu mopakadaa manusia i dunia ei. Ai modoko komi pangkeniaka, anu simbela ai pangkeniaka ni Pue Ala.
5 Nakeningkalompe rara ni Pue Ala si komi, etumo mpane nipari-pari mopakaroso pepotuumi. Baria wule pepotuumi, agaiana sangangaa nipari-pari mobabei anu malompe, sangangaa nipakatopa pekirimi, 6 ai sangangaa nibuku morempeki peundea nu rarami anu madaa, ai sangangaa tetida komi i tempomi mantodisa kapari, ai sangangaa mosusu komi katuwumi i kabuke-bukena si Pue Ala, 7 ai sangangaa mampokaasi komi pokami sampepepotuumi. Baria wule etu ngkida, sangangaa mampokaasi mbui komi ope-ope tau. 8 Ane ewa etu liliu pangkeniakami ai babeiami, ina mobundu mpuu katuwumi, ai ina tetambai liliu panginsanimi i Yesu Kerisitu Pueta. 9 Agaiana tau anu baria ewa etu pangkeniakara, bariamo rakaendora ni banimpia teampunimo dosara. Sira ewa tau anu mabilo ba ewa tau anu baria gaga matopa.
10 Mewali poka, nipari-pari mampeulai peundea ni Pue Ala, bona tongawa mpii ka Napelisimi ai ka Narondemimo ni Pue Ala mewali tauNa. Ane nibabei ewa etu, baria komi ina mosapuaka pepotuumi si Kerisitu. 11 Ai i eo anu ina mai, ina Nadoko komi i rara peparenta ni Yesu Kerisitu Pueta, Topesoremata. PeparentaNa etu, baria ria kasopoana.
Tunggaia ni Peturu mouki sura ei
12 Mewali poka, nauda niinsanimo ope-ope aretu, ai nauda maroso peulami i patudu anu mamonso anu nidokomo aretu, agaiana batena kupopaingaaka liliu komi patudu etu. 13-14 Lawi kuinsanimo kabarianamo masae ina mamatemo aku, ewa anu Naulika aku nu Pueta i Yesu Kerisitu. Mewali, tongoku mani tuwu, sangangaa kupopaingaaka liliu komi ope-ope etu. 15 Etumo mpane, kupari-pari mopatudu komi bona ane mamate aku luwu, ina nikaendo liliu ope-ope patuduku aretu.
16 Kami suro ni Yesu, mopadongkaka komi kamakuasaNa ai kadongkaNa mpesola Pueta i Yesu Kerisitu i dunia. Anu kipatuduka komi etu, baria lolita dongko, lawi kiita mata peawana katuwu ni Yesu. 17 Ni banimpia ria kami i se etu i wongko bulu, i tempoNa napopeawa ai nabila ni Pue Ala TuamaNa anu meawa katuwuNa. I tempo etu, nauli ni Pue Ala, “Ia eimo AnaKu anu Kupokakaia ai Kupokatono.” 18 WotuNa anu lako i suruga etu, kiepe ntalinga i tempoki ria simbela-mbela ai i Yesu i wongko bulu anu magali etu.
19 Mewali, nakeningka kiitana ope-ope aretu, etumo mpane maroso mpuu ka kipotuuna Ngkora ni Pue Ala anu napadongka nu nabi-nabi ni banimpia. Ngkora ni Pue Ala anu napadongka nu nabi-nabi aretu, ewa sulo anu mewangka i rara nu kadediana duduuna mensibe eo. Popadongka nu nabi-nabi aretu, sangangaa nipairara liliu duduuna dongka mpesola i Pue Yesu i dunia ei. Lawi kadongka mpesola ni Yesu, ewa pensibe eo ba ewa betue mbai mataeo anu mowangkasi dunia. I tempo etu, i Kerisitu batena mowangkasi rarami.
20 Agaiana, anu sangangaa nikaendo mpii: ope-ope Ngkora ni Pue Ala anu napadongka nu nabi-nabi ni banimpia anu teuki i rara Ngkora Magali, baria mangula peundeara saduduara. 21 Lawi Ngkora ni Pue Ala anu rapadongka nu nabi-nabi ni banimpia, baria mangula peundea nu manusia. Agaiana popadongka nu nabi-nabi aretu, mopadongka Ngkora ni Pue Ala nakenimpenini nu Inosa Magali.