I Peturu mampopaingaka kita kaina dongkana mpesola i Yesu Kerisitu
3
1 Pokaku anu kupokaasi! Ei suraku anu karombelana si komi. I rara nu suraku anu mpolinguruna ai karombelana ei, kusuweki rarami ai kupopaingaaka komi patudu anu mamonso bona manoto pekirimi. 2 Tunggaiaku, bona nikaendo apa anu rapadongka nu nabi-nabi anu natudu ni Pue Ala ni banimpia, ai bona nikaendo mbui parenta nu Pueta i Pue Yesu Kerisitu, Toposorema kita. SawaaNa etu niepemo lako si kami suroNa.3 Ria anu sangangaa nikaendo mpii: i eo-eo kasopoa dunia ei, ina dongka sira tau anu nakuasai peundea nu rarara anu madaa. Tau aretu ina mosasalai komi, 4 raulira, “Rauliwo, i Yesu Kerisitu modandi kaina dongkaNa mpesola. Mewali imbamora? Baria kipotuu, lawi mamatemo sira nu ulububuta ni banimpia, ai mepuu lako i pewali nu dunia duduuna ei-ei, baria ria katebalikina dunia ei.” 5 Tau anu mololita ewa etu, raoakara motuko pampekirira. Baria raundera mokaendo adiwa i Pue Ala moteru langi ai dunia ni banimpia, lako i NgkoraNa. Dunia ei Nateru lako i ue, ai tana anu mabangi i dunia ei mensuwu lako i ue. 6 Ai ue mbui, napake ni Pue Ala mopakaropu isi nu dunia ei ni banimpia. 7 Agaiana langi ai dunia anu duduuna ei-ei ria mani, nakenimpekadipuraka ni Pue Ala ai NgkoraNa dongka i eo pobotusi luwu. I eo pobotusi, langi ai dunia ei ina Napakagero ni Pue Ala ai apu, ai ope-ope tau anu baria mengkoru si Ia, ina Nasuku.
8 Poka-poka anu kupokaasi, sampangka ei inee mpuu malipa rarami: i rara petotoki ni Pue Ala, saeoa ba sansobu mpae simbela ngkida, baria ria posisalana. 9 I Pue baria mawewe mopabukei dandiNa, naudapae ria sira tau anu manguli, “masae gaga kadongkana mpesola i Pue Yesu”. Agaiana, nakeningkasabaraNa si komi, etumo mpane duduuna ei-ei baria mani Ia dongka. Lawi baria naunde ni Pue ane ria sadua tau anu mansumba kagero. PeundeaNa bona ope-ope tau menonso lako i dosara. 10 Agaiana batena ina dongka mpuu i Pue! Ai i kadongkaNa etu, ewa kadongka nu sadua topanangka anu baria rainsani kaimpiana ina dongka. I eo etu, ina raepe sambua pomomoni anu mepakaeka, ai i tempo etu mbui, langi ai sinangka anu ria i langi mapumpu nakoni nu apu. Dunia ai sinangkana isina ope mbui mapumpu.
11 Ane ewa etu kagerona sinangka-nangkana anu ria, mewali adiwamo katuwuta? Sangangaa tuwu kita i rara nu kamagali ai mengkoru kita si Pue Ala, 12 tongota mampenoka bona polo dongka, Eo kadongka ni Pue Ala etu. Lawi i Eo etu, langi ina magero nakoni nu apu. Ai nakeningkakulana sinangkana anu ria ina magonu. 13 Agaiana kita, mampegia kita apa anu nadandika kita ni Pue Ala, iamo langi anu bou ai dunia anu bou, anu ina napearii nu tau anu mampeulai apa anu manoto i petotoki ni Pue Ala.
Lolita kasopoana
14 Mewali poka anu kupokaasi, tongomi mampegia eo etu, nipari-parimode mosintuwu liliu ai Ia, ai tuwu komi i rara nu kamanoto anu baria ria kamakurana i petotoki ni Pue Ala. 15 Sangangaa takaendo, tunggaia nu kasabara ni Pue Ala si kita iamo ope-ope tau Nakiraka sira tempo bona mansumba sira katesorema. Patudu ei naukika mbui komi nu sadua pokata anu tapokaasi iamo i Paulu. Ai apa anu nauki ni Paulu i rara nu surana mangula katopa anu nakiraka ia ni Pue. 16 I rara nu ope-ope surana, teuki patudu kono i kadongkana mpesola i Pue Yesu, ewa anu kupadongkakamo komi. Agaiana, ria basangkia patudu ni Paulu anu mapari karainsanina lempona. Patuduna aretumo, anu rabaliki nu tau anu baria manoto pampekirira, ai anu baria maroso pepotuura. Ewa etu mbui, isi nu Sura Ngkora Magali rabalikira mbui. Lako i babeiara etu, ina moparia karopu si sira.
17 Agaiana komi poka anu kupokaasi, niinsani mboto ope-ope aretu. Mewali, mainga-inga komi i guru-guru anu mepakanawu, ntena komi mala rapakanawura i patudura anu masala, duduuna nipawia pepotuumi anu maroso. 18 Kuperade, bona kalalaua nitambai panginsanimi i Pue Yesu Kerisitu, Topesoremata. Ai kalalaua niepeka kabose nu asiNa. Tetoiamo Ia ei-ei duduuna i kasae-saeana. Amin.