Inee kita mangula peundea nu rarata anu madaa
4
1 Poka-poka, mangkiada komi mpane mobungka-bungka ai mombesonoi? Etu mewali lawi mangula komi peundeami anu madaa anu mombeala liliu i rarami. 2 Apa anu niunde, baria nisumba. Etumo mpane mepopate komi. Masina komi i anu-anu nu rangami, agaiana apa anu nipokailu etu, baria nisumba. Mewali, mombesonoi ai mobungka-bungka ngkida komi. Kamonsona, baria nisumba anu nikadelo, lawi baria niperade si Pue Ala. 3 Naudapae niperade, baria ina nisumba, lawi baria malompe tunggaiami. Lawi apa anu niperade etu, nipenoka nipake mopabukei ngkida peundea nu rarami saduduami. 4 Komi tau anu baria matundu si Ia. Bariapae niinsani, ane mampeulai kita babeiata anu madaa i dunia ei, batena mewali kita iwali ni Pue Ala. Sambela mani kuuli: ima anu mangunde babeia anu madaa i dunia ei, iamo iwali ni Pue Ala!5 Inee nipenoka baria ria tunggaiana anu teuki i rara nu Sura Ngkora Magali ewa ei: i wotota ei, nakiraka kita ni Pue Ala inosata, peundea ni Pue Ala bona inosa anu ria si kita etu, mangula peundeaNa. Agaiana inosata etu mampenoka mobabei apa anu madaa. 6 Agaiana nauda ewa etu, petulungi ni Pue Ala anu Nakiraka kita, melumbu kabosena, mpane lako i peundea nu rarata mobabei anu madaa. Etumo mpane ria anu teuki i rara nu Sura Ngkora Magali ewa ei:
“I Pue Ala moewa tau anu mampemabose,
agaiana tau anu mengkaiwoi, Natulungi sira nakeningkabula nu raraNa.” (Pepatudu ni Salomo 3:34)
7 Etumo mpane kukiraka komi lolita: mengkoru komi si Pue Ala. Niewa mpii Datu nu Seta, bona ntena komi nakuasai. 8 Sangangaa nigompilisi i Pue Ala, bona Ia mbui ina gompi si komi. Ane ria dosami, sangangaa nipenonsoi ai nipangaku. Ane mopenga rarami, sangangaa nipakabula rarami. 9 Motumangi komi nakeningkamadosami. Sangangaa nipenonsoi babeiami anu madaa. Ane niinsani kariana dosami, baria malompe ane nipokatono, sangangaa nipenonsoi lako i kasusa nu rarami, 10 ai mengkaiwoi komi i lio ni Pue. Ane ewa etu, ina Napomabose komi.
Inee kita mosalai rangata
11 Poka-poka, inee komi mombesalai. Ane ria sadua tau anu mosalai rangana ba pokana, lempona mosalai mbui ia atura ni Pue Ala. Tau anu mosasalai pokana, baria mangula atura ni Pue. Nakeni nu babeiana anu masala etu, pensani ia rapandiri ewa sadua topobotusi kara-kara anu mampomeso-mesoka atura ni Pue Ala. 12 Kamonsona ria sadua ngkida anu sintoto mokiraka atura i manusia ai anu mewali topobotusi kara-kara, iamo i Pue Ala. Ria kuasaNa mosuku kita ba mopawia kita lako i suku dosata. Mewali, sintotopae komi mewali topobotusi kara-kara nu rangami?
Ope-ope anu tatunggai sangangaa tapaninda si Pue
13 Eimo patuduku si komi anu mampemabose, ai anu manguli ewa ei, “Eo ei ba i neile, ina mangoka kami lau i sambua kota. Ina meari kami i se etu sampae kasaena mobalu-balu duduuna mansumba kami rasi anu maisi.” 14 Adiwa kamonsona katuwumi? Kamonsona katuwumi baria niinsani apa anu ina mewali i neile. Katuwumi ewa rambu ngkida, sampalai ngkida raita, mpane mapaia! 15 Kamonsona sangangaa niuli ewa ei, “Ane sintoto ai peundea ni Pue, ina tuwu kami ai ina kibabei ewa etu ai ewa ei.” 16 Agaiana ei-ei, mampemabose komi ai mengkaiwongko pololitami. Ope-ope babeiami anu ewa etu, masala mpuu.
17 Mewali, ima anu manginsani mobabei apa anu malompe agaiana baria nababei, tau etu batena madosa.