Pepopainga i topebuku
5
1 Eimo patuduku si komi anu pebuku. Aginamo nitumangisi katuwumi, lawi ina narumpa komi nu kapari. 2 Kapebukumi mapaiamo. Sampimi nakonimo nu kabubu. 3 Bulawa ai salakami tagaramo. Tagarana etu mopakanoto kamasalami mampopobundu kapebukumi. Etumo mpane ina rasuku mpuu komi. Komi ina mewali ewa tau anu nakoni nu apu. Morompu komi anu-anu i dunia, agaiana bariamo masae ina dongka kasopoa dunia ei! 4 Tau anu mobago i bondemi, baria nibaiari sarora. Nipetingai pekakaera! Topobago anu mepae i bondemi, mekakae sira merade tulungi, ai pekakaera naepemo ni Pue Ala anu makuasa. 5 I dunia ei, meawamo katuwumi. Matono-tonomo komi ai kapebukumi, kamonsona baria niinsani ina dongka tempona eo pobotusi. Komi rapandiri ewa japi anu rapakarudu, duduuna dongka tempona sira, ina rasambale! 6 Nisuku mpane nipopate sira tau anu baria masala, nauda ewa etu, baria rabukura moewa komi.Sangangaa sabara komi i rara nu kapari
7 Poka-poka, etumo mpane sangangaa sabara komi duduuna dongka mpesola i Pue. Nipeita adiwa kasabara nu topobonde mampegia powua nu tuda-tudara. Sabara sira mampegia uda i tempora mantuda dongka i powuana. 8 Ewa etu mbui komi, sangangaa sabara komi. Sangangaa nipakaroso rarami, lawi bariamo masae ina dongkamo i Pue.
9 Poka-poka, inee komi modeade ai mombesalai, bona ntena komi narumpa nu pesuku ni Pue Ala. Mainga-inga komi, lawi sadua Topobotusi ina dongkamo!
10 Pokaku ope-ope! Nikaendo sira nabi ni banimpia anu mobambari Ngkora ni Pue. Sabara sira ai tetida sira mantodisa kapari. Mewali nipeulai kasabarara. 11 Mewali tau anu ewa aretumo anu rauli tau anu matono, lawi tetida sira i rara nu kapari. Niinsani mpuu tunturaka ni Ayubi anu tetida mpuu i rara nu kapari, ai niinsani i kasopoa nu katuwuna, nawati ia ni Pue Ala. Lawi malompe ai maasi mpuu rara ni Pue Ala.
Inee kita mosumpa
12 Pokaku ope-ope! Lako i ope-ope patuduku, eimo anu paraluu mpii: inee komi mosumpa mokabelai langi ba dunia ba apa ngkida anu ntanina. Ane tunggaiami manguli io, sangangaa niuli “Io.” Ane tunggaiami manguli baria, sangangaa niuli “Baria,” bona ntena komi narumpa nu pesuku.
13 Ane ria i olomi anu mansumba kapari, aginamo mekakae. Ane ria anu matono, aginamo modulua motoia i Pue Ala. 14 Ane ria anu madua, aginamo nironde tadulako nu topepotuu si Kerisitu, bona tadulako aretu pensani mampekakaeka mpane mobasaika woto nu tau madua ai lana i rara sanga ni Pue. 15 Ane mekakae sira lako i pepotuura mpii, batena maosa tomadua etu. I Pue Ala ina mopakaosa wotona, ai salana Naampuni. 16 Etumo mpane sangangaa nipangaku salami i singka rangami, ai mombepekakaeka komi bona maosa komi.
Pekakae nu tau anu mampeulai peundea ni Pue, mabose kuasana pekakaena etu. 17 Nikaendo tunturaka ni nabi Elia ni banimpia. I nabi Elia etu, tau biasa ewa kita mbui. Mekakae ia lako i rarana mpii bona ntena keuda. Baria mpuu keuda i rarana tolu mpae aono mbula kasaena. 18 Roo awetu, mekakae mbuimo ia duduuna mendolu mpuumo uda, mpane tuwumo tuda-tuda.
19 Pokaku ope-ope! Ane ria sadua i olomi anu bariamo mangula patudu ni Pue Ala, mpane tosaduana monini tau etu mesola i patudu ni Pue Ala, 20 bona niinsani: tau etu mosoremo rangana etu, lako i kamate anu baria mokasopoa. Nauda maisi dosana tau etu, agaiana teampunimo. Inee malipa rarami pololitaku ei.