Inee kita madosa i sinangka pololitata
3
1 Pokaku ope-ope! Inee komi maisi anu mampenoka mewali guru agama i topepotuu si Pue Ala. Lawi tainsanimo poka, kita anu mewali guru agama sangangaa mampeulai peundea ni Pue Ala, ai ane masala kita ina melumbu pesukuNa si kita mpane pesukuNa i tau ntanina. 2 Lawi kita ope-ope, maisi salata. Agaiana ane rapana ria sira tau anu baria mobabei sala i pololitara, sira etumo anu magali katuwura ai anu pensani mokuasai ope-ope peundea nu rarara.3 I dunia ei, anu kokoi pensani mokuasai anu mabose. Pandirina pensani kita mosamai dara bona mampeulai peundeata. Mewali, nauda sama anu kokoi ngkida tapake, pensani kita mokuasai wotona anu mabose. 4 Ewa etu mbui kapala tasi. Naudapae ria sambua kapala anu mabose anu nawui nu pambui marimbuku, agaiana kapala tasi etu pensani napopolumako topangkeni imba ngkida peundeana, lawi ia mopake pegulia anu kokoi. 5 Ewa etu mbui dila nu manusia. Naudapae kokoi ngkida, agaiana pensani tapake mampemabose i pololitata kono i pangka-pangkana anu mabose.
Apu anu kokoi pensani mangkoni kakau anu maemba. 6 Ewa etu mbui lolita anu tapadongka ai dilata. Pololitata etu ewa apu, lawi pensani tapake mobabei daa. I wotota ei, dilata anu moparia sinangka dosa anu mopakakeraki sumalele wotota. Lolita anu tapadongka ai dilata pensani rapandiri ewa apu lako i naraka anu mopakarugi ope-ope katuwuta.
7 Ope-ope binata anu maila, malompe anu i laerawa, i lore ai i rara ue, pensani rapakanondo, ai ria tau anu mopakanondo sira. 8 Agaiana baria ria mogalo sadua tau anu pensani mopakanondo dilana saduduana! Dila manusia madaa mpuu, ai baria pensani rakuasai. Lolita anu tapadongka ai dilata ewa petilo nu ule anu moipo. 9 Dilata pensani tapake motoia i Pue Ala Tuamata. Agaiana pensani mbui tapake mopakoi rangata, anu simbela-mbela kita nateru ni Pue Ala, anu simbela pangkeniakata ai i Pue Ala. 10 Lako i ngudu nu sadua tau, mensuwu lolita petoia ai lolita petunda-tunda. Pokaku ope-ope! Kamonsona, baria pensani ewa etu! 11 Ane rapana ria sambua ue anu tumbu, pensanipae mensuwu lako i se etu, ue anu matawoo ai ue anu mapai? Baria! 12 Kau ara baria mowua saitun. Ai anggoro baria mowua ara. Tibubu anu kebure baria moparia ue anu matawoo. Ewa etu mbui poka, baria sintoto ane tapake dilata mampololita apa anu malompe mpane mampololita mbui apa anu madaa.
Katopa anu lako si Pue Ala
13 Ane ria tau i olomi anu matopa ai anu malompe rarara, etu sangangaa rapatongawa i babeiara anu malompe anu mensuwu lako i rarara anu mengkaiwoi mangula apa anu sintoto i tau anu matopa. 14 Agaiana ane ria i rarami anu masina i rangami ai anu mampenoka mopailodo wotomi saduduami, inee komi mampemabose ai inee nipenoka komimo tau anu matopa. Lawi babeiami etu mosisala ai patudu anu mamonso. 15 Kamatopa anu ewa etu, baria lako si Pue Ala, agaiana lako i dunia anu madaa, lako i peundea nu rarata ai lako i seta! 16 Lawi ane ria sira tau anu masina ai anu wule mampekiri wotora saduduara, batena ina ria pobungka-bungka ai mampopengaa babeia anu madaa.
17 Agaiana tau anu mansumba sira katopa lako si Pue Ala, ewa ei babeiara: malompe rarara, raundera mosintuwu ai rangara, maalusu pangkeniakara, mangula sira peundea nu rangara ai paka motulungi sira tau. Malompe babeiara, baria sira mampopontani tau ai pangkeniakara mangula kabula nu rarara. 18 Tau anu mangkadelo posintuwu, babeiara mangula mpuu peundea ni Pue Ala.