Inee kita mampopontani tau
2
1 Pokaku ope-ope! Pueta, i Pue Yesu Kerisitu, meawa mpuu katuwuNa. Mewali, ane mepotuu mpuu komi si Pue Yesu, inee komi mampopontani tau. 2 Ane rapana ria rodua tau anu dongka i pogulu-guluami, sadua mesinsi bulawa ai mesampi anu makara, mpane anu sadua mesiasi katuwuna ai mesampi anu masenseleo. 3 Ane melumbu pebilami i tau anu makara pesampina etu, mpane niulika, “Maingko momeso i pomesoa anu malompe i se ei.” Agaiana i tau anu mesiasi katuwuna niuli, “Peongkomode i se etu,” ba niulika, “Momesomo iko i lobo,” 4 lempona, mampopontani-ntani komi singka rangami, ai mosoka komi katuwu nu tau etu, mangula tunggaiami anu madaa.5 Pokaku anu kupokaasi! Petingai lompe: tau anu mesiasi katuwura i dunia ei, napelisi mbui ni Pue Ala bona mewali pebuku sira i pepotuura, ai mansumba sira pewati lako i peparentaNa, mangula dandi ni Pue Ala i tau anu mampokaasi Ia. 6 Agaiana mopakoimo komi tau sira anu mesiasi katuwuna! Kamonsona, tau anu pebuku aretumo anu mampopesiasi komi ai anu mopaso komi lau i lio nu topoparenta. 7 Siramo anu mopakoi sanga ni Pue Yesu anu tabila, ai anu mewali Pueta.
8 Manotomo kalompe nu babeiami, asala nipeulai parenta ni Pue Yesu anu tabasa i rara Sura Ngkora Magali anu manguli, “Nipokaasi rangami ewa pampokaasimi wotomi saduduami.” 9 Agaiana ane mampopontani-ntani komi tau mangula apa anu niita i rara nu katuwura, madosamo komi. Tongawamo kamadosami, lawi moliungimo komi atura ni Pue Ala.
10 Ane rapana ria sadua tau anu mangula ope-ope parenta anu teuki i rara atura ni Pue Ala, agaiana ria sampangka ngkida anu naliungi, batena masala ia, ai batena Napasimbela ai tau anu moliungi ope-ope parenta etu. 11 Lawi nauli ni Pue Ala, “Inee mebualosi.” Ai Nauli mbui, “Inee mepopate.” Mewali, naudapae komi baria mebualosi, agaiana ane mepopate komi, moliungi mani komi atura ni Pue Ala. 12 Mewali i pololitami ai i babeiami, sangangaa mainga-inga ewa tau anu ina rapomeso-mesoka kara-karana, mangula atura ni Pue Ala anu mopawia komi lako i dosa 13 Lawi ima anu baria ria asina i rangana, i Pue Ala mbui baria ina mampokaasi ia i eo pobotusi dunia. Agaiana tau anu mampokaasi rangana, inee ia maeka i eo pobotusi dunia, lawi i Pue Ala ina mampokaasi ia, ai baria ina Nasuku.
Pepotuuta ai babeiata
14 Pokaku ope-ope! Apamo bunduna ane tauli mepotuu kita si Pue, agaiana babeiata baria mangula peundeaNa. Ane ewa etu pepotuuta, baria kita ina tepawia lako i suku nu dosata. 15 Pandirina, ria sadua pokata anu moparaluu pesampi, ai baria mbui sondo pangkonina eo-eona. 16 Adiwa ane nuulika ewa ei, “Malompe-lompe iko i dala! Kusarumaka mansumba iko badu anu malompe ai mangkoni iko dongka mabosu!” Agaiana ane baria nikiraka apa anu naparaluu, apamo bunduna? 17 Ewa etu mbui ai pepotuuta. Ane tauli mepotuu kita si Pue, agaiana babeiata baria mangula peundeaNa, lempona mbero-mbero ngkida pepotuuta. Pensani mbui rauli mamate pepotuuta.
18 Manoto riamo anu ina manguli ewa ei, “Sadua tau mesarumaka i pepotuuna, ai tosaduana mesarumaka i babeiana anu malompe.” Agaiana kuuli: ane baria malompe babeiamu, baria ina kuita pepotuumu etu. Lako i babeiaku anu malompe, ina kupopeitaka mbui iko pepotuuku si Pue. 19 Ba nipotuu kasaduduaNa ngkida i Pue Ala? Mamonso mpuu etu. Agaiana ane awetu ngkida, baria sondo! Lawi mogaloda seta, mampotuu mbui sira kasaduduaNa ngkida i Pue Ala. Etumo mpane morada sira nakeningkaekara. 20 Madoio mpuu komi! Ba niuli sondomo pepotuumi si Pue Ala nauda baria ria babeiami anu malompe? Ane ewa etu pepotuumi, baria ria pobunduana! 21 Sangangaa nikaendo tunturaka ni Burahima: ia naimba ni Pue Ala tau anu manoto nakeningkalompena babeiana, lawi ia mampopenomba i Isaki anana si Pue Ala i wongko watu potunua popenomba.* 22 I tunturakana etu, tongawamo pepotuu ni Burahima lako i babeiana. Mewali, nakeni nu babeiana anu malompe, baria ria kamakurana pepotuuna. 23 Etumo mpane tepabukei apa anu teuki i rara nu Sura Ngkora Magali anu manguli:
“I Burahima mepotuu si Pue Ala,
etumo mpane naimba ni Pue Ala tau anu manoto.” (Pewalina 15:6)
Mewali, i Burahima rauli simada ni Pue Ala. 24 Tainsanimo tau anu malompe babeiara naimba ni Pue Ala manoto i petotokiNa, agaiana tau anu wule mepotuu ngkida baria Naimba manoto i petotokiNa.
25 Ewa etu mbui tunturaka ni Rahab ni banimpia, sadua towawine anu baria malompe adana. Basangkia surudado toYahudi ratudu lau i boea nu iwalira mampendenga. I Rahab etu anu mampopensopi sira i tombina ai motulungi sira i kalambura mangula dala anu ntanina. Nakeni nu babeiana anu malompe, etumo mpane naimbamo ia ni Pue Ala tau anu manoto.*
26 Mewali, ane ria sadua tau anu bariamo moinosa, taulimo mamate. Ewa etu mbui, ane pepotuuta si Pue baria tongawa i babeiata, lempona matemo pepotuuta, baria ria pobunduana.