Sura anu nauki ni
Yakobu
1
1 Tabea lako si aku i Yakobu, tudua ni Pue Ala ai tudua ni Pue Yesu Kerisitu. Kupakatuka sira toSaraeli anu sampulu rontina anu masawu i sumalele dunia.Inee mapari rarami i rara nu kapari
2 Pokaku ope-ope! Ane narumpa kita mampopengaa kapari ai pekelo, aginada tapokatono. 3 Lawi tainsani: ane mepotuu liliu kita si Pue i rara nu kaparita, ina tetida kita. 4 Kampai liliumode katetida nu rarami duduuna i kasopoana, bona maroso mpuu pepotuumi ai baria ria kamasalami ba kamakurami.
5 Ane ria komi anu baria matopa mokadipuraka katuwumi, aginamo niperade katopa lako si Pue Ala, batena Nakiraka komi. Lawi apa anu nakira ni Pue Ala, Nakiraka i ope-ope tau lako i kabula nu raraNa ai kamaasiNa. 6 Agaiana ane merade kita si Pue Ala, sangangaa lako i rarata anu mepotuu. Baria pensani bata-bata rarata. Lawi sadua tau anu bata-bata rarana, pensani rapandiri ewa balumba nu tasi anu nawui nu pambui wilau wimai. 7-8 Lawi tau anu ewa etu, baria tetida pampekirira, baria rabukura mopakanoto apa ngkida anu rababeira. Etumo mpane ineemo rasarumakara ba ina mansumba sira ba apa-apa lako si Pue.
Patudu i topesiasi ai i topebuku
9 Pokaku sampepepotuu! Topepotuu si Kerisitu anu mesiasi katuwura, katuwura etu sangangaa rapokatonora, lawi nauda ewa etu katuwura, batena napaiwongko sira ni Pue Ala. 10 Ewa etu mbui topepotuu si Pue Ala anu pebuku, sangangaa matono mbui sira, lawi i Pue Ala ina mopaiwoi katuwura. Lawi tau anu pebuku pensani rapandiri ewa bunga owo: sampalai ngkida katuwura. 11 Ane bunga owo etu nasimbaki nu eo anu makere, kasaliu malele, duduuna maundu bungana, bariamo merae. Ewa etu mbui tau anu pebuku, ina mamate sira tongora mourusi kapebukura.
Lako imba pepuua pampetandaka
12 Matono mpuu sira tau anu tetida i rara nu kapari ai pampetandaka. Lawi ane tetida sira, ina mansumba sira katuwu malompea anu nadandi ni Pue Ala i tau anu mampokaasi Ia. 13 Ane ria kita anu rakelo bona mobabei daa, inee tapenoka pekelo aretu lako si Pue Ala. Lawi i Pue Ala baria pensani rakelo bona mobabei daa, ai baria mbui kita napetandaka ni Pue Ala bona mobabei kita daa. 14 Agaiana ope-ope tau tekelo i tempora nadii nu peundea rarara anu madaa. 15 Ane mampeulai kita peundea nu rarata, batena kita mobabei dosa. Ai ane etu anu tababei liliu, kasopoana ina nakeni kita i kamate.
16 Pokaku anu kupokaasi! Inee nipogeaka tau ntanina mopakanawu komi! I Pue Ala baria mampetandaka komi bona mobabei komi anu madaa. 17 Ope-ope anu malompe ai anu baria ria kamakurana, tasumba lako si Pue Ala. Iamo anu mampopewali ope-ope anu mewangka i langi. Ope-ope anu mewangka etu, ria katebalikina. Agaiana i Pue Ala, baria ria katebalikina, ai si Ia baria mbui ria kamadedi. 18 I Pue Ala mopadongkaka kita NgkoraNa anu mamonso, ai nakeni nu NgkoraNa etu, Napopewalimo kita anaNa. Etu Nababei mangula peundeaNa saduduaNa, bona lako i ope-ope anu Nateru, kita anu tepomabose lako i ope-ope etu.
Mampeulai kita Ngkora ni Pue Ala
19 Pokaku anu kupokaasi! Nipetingai lompe pololitaku ei: kita ope-ope sangangaa tapetingai lompe sala lolita nu tau ntanina, inee kasaliu tasonoi ai inee kita polo marumpu. 20 Lawi tau anu marumpu, baria sira pensani mobabei anu malompe, mampeulai peundea ni Pue Ala. 21 Etumo mpane sangangaa nipawia ope-ope anu madaa. Sangangaa mengkaiwoi komi mampopolumako Ngkora ni Pue Ala anu riamo i rarami, lawi Ngkora etu anu makuasa mosore komi lako i suku nu dosami.
22 Mewali, ane niepe Ngkora ni Pue, sangangaa nipeulai. Inee wule nipetingai mbero. Lawi ane ewa etu, nipakanawu wotomi saduduami. 23 Tau anu mampetingai Ngkora ni Pue agaiana baria rapeulaira, sira pensani rapandiri ewa sadua tau anu mampeita lensena i pampebaoa. 24 Awetu roomo napeita lensena, awetu ia malambu bariamo nakaendo ba adiwa lensena. 25 Etumo mpane sangangaa nipairara lompe Ngkora ni Pue Ala ai nipeulai liliu. Lawi Ngkora ni Pue baria ria kamakurana, ai ria kuasana mopawia kita lako i dosa. Mewali, inee nipetingai ngkida NgkoraNa mpane nikalilingakada i rarami. Sangangaa nipeulai NgkoraNa, lawi ope-ope tau anu mobabei ewa etu, batena nawati sira ni Pue Ala i ope-ope anu rababeira.
Poagama anu mamonso i petotoki ni Pue Ala
26 Ane ria sadua tau anu manguli ka iana anu matundu moagama, agaiana baria nabuku mengkaroo mampololita lolita anu baria malompe, mopakanawu ia wotona saduduana. Poagamana etu baria ria pobunduana. 27 Ane tapenoka mewali tau anu moagama mpuu ai anu baria ria kamakurana ba kamasalana i petotoki ni Pue Ala Tuamata, eimo anu sangangaa tababei: motulungi kita anakoi anu ilu pusa ai tobemba anu mesiasi katuwura, ai inee kita mangula babeia nu tau anu baria manginsani i Pue Ala.