Mainga-inga iko lawi i eo kasopoa dunia, madaa mpuu babeia nu manusia
3
1 Bona nuinsani, i eo-eo kasopoa dunia, batena narumpa kita maisi pantodisa. 2 Mawori tau ina mampekiri wotora saduduara ngkida, ai mampenombai sira doi, mampopetoia sira, mampemabose sira, ai mosalai sira rangara. Baria sira mengkoru i tomanara, baria rainsanira manguli maisi kalompena si Pue Ala, baria rainsanira mobila i Pue Ala, 3 baria sira maasi, ai baria raundera mombesingkalompe. Mokaisii lolita liliu sira rangara, baria sira morempeki peundea nu wotora, maseke sira, ai mokasisi sira apa ngkida anu malompe. 4 Mopakanawu sira rangara, baria karao pampekirira, ai mengkaiwongko sira. Baria sira mampokaasi i Pue Ala, mampeulai ngkida sira peundea nu wotora. 5 Ane babeiara raita nu rangara, mampeulai mpuu sira atura-atura agama, ewa tau anu mengkoru si Pue Ala, agaiana rasapuakara ngkida kuasa ni Pue Ala, anu pensani mobaliki rarara.Inee sira nupogaloka tau anu ewa etu babeiara. 6 Ria sira anu mesua ngkandii i tombi nu tau, mpane rapakanawura towawine anu malede, anu maisi dosara, ai anu nakuasai nu peundea nu rarara anu madaa. 7 Towawine aretu, raundera mampetingai liliu patudu, agaiana baria rainsanira patudu anu lako si Pue Ala.
8 Moewa sira patudu anu mamonso, ewa i Yanes ai i Yambres anu moewa i nabi Musa i tana Masiri ni banimpia.a Pekirira madaa ai baria tetida pepotuura ane dongka pekelo. 9 I Yanes ai i Yambres etu, baria rabukura moewa kuasa ni Pue Ala anu ria si Musa. Apa anu mewali si sira, etu mbui anu mewali i guru-guru anu mepakanawu. Baria rabukura moewa patudu anu mamonso, nakeningkadoiora batena rainsani nu ope-ope tau.
Sangangaa meula kita i patudu anu teuki i rara nu Sura Ngkora Magali
10 Agaiana iko Timotiu, lawi masaemo iko kuporanga, nuinsani mpuumo patuduku ai babeiaku ai tunggaia nu raraku. Nuita mpuumo pepotuuku, kasabaraku, kamaasiku, ai ka kubukuna mantodisa kapari. 11 Nuita mpuu ka kubukuna mantodisa pesiasi ai kapari anu morumpa aku i kota Antiokia, i Ikonium ai i Listra. Maruminsi mpuu kapari etu! Agaiana i Pue mopawia aku lako i sinangkana etu. 12 Tainsanimo: ope-ope tau anu meula si Yesu Kerisitu ai anu mengkoru si Pue Ala, batena ina rapopesiasi. 13 Agaiana tau anu madaa ai anu mebagiu, ina tetambai kadaana babeiara. Mopakanawu sira rangara ai patudura anu baria makono, agaiana tepakanawu mbui sira.
14 Agaiana iko Timotiu, sangangaa nupatoro liliu patudu anu roomo rapatuduka iko ai anu nupotuumo. Ai nupotuu mpii patudu etu, lawi nuinsani kaimara anu mopaguru iko. 15 Lako kokoi mani iko, nuinsani amimo apa anu teuki i rara nu Sura Ngkora Magali. Sura Ngkora Magali etu anu mopakanoto rarata duduuna mepotuu kita si Yesu Kerisitu, ai tesoremo kita lako i suku nu dosata. 16 Ope-ope anu teuki i rara Sura Ngkora Magali, mepuu lako si Pue Ala, ai mobundu i rara pepatudu anu mamonso, moewa patudu anu baria makono, mopakalompe babeia anu madaa, ai mopaguru tau bona manoto babeiara. 17 Ai Sura Ngkora Magali etu, sondo karaparewaita ope-ope tau anu mengkoru si Pue Ala, bona mampopolumako sinangka bago anu malompe.