2
1 Mewali, Timotiu anaku! Nupakaroso mpuu raramu lako i karoso anu tasumba lako si Yesu Kerisitu, mangula kabula rara ni Pue Ala. 2 Banimpia nuepe mpuumo ope-ope patuduku, ai mawori mbui tau anu mosabiki ai mampetingai patuduku etu. Mewali, patudu etu sangangaa nupotuuka mbui sira tau anu pensani rapotuu, ai anu mapande mopaguru tau ntanina.Sangangaa masilolonga iko mokolo kapari ai mobago mantimi
3-4 Sangangaa masilolonga mbui iko mokolo kapari, nakenimpobagomu si Yesu Kerisitu. Tau anu mampopolumako bago ni Pue pensani rapandiri ewa sadua surudado. Sadua surudado sangangaa mampeulai liliu parenta nu tadulakona. Naudapae mansumba kapari, baria ia mengkaroo. Ai baria mbui ia mokadipuraka liliu urusiana saduduana, lawi mampenoka ia mopakatono rara nu tadulakona. 5 Awetu mbui, tau anu mampopolumako bago ni Pue, rapandiri ewa sadua topowadi anu sangangaa mampeulai ia atura-atura powadi, lawi ane baria napeulai, baria ia ina menangi. 6 Ai tau anu mampopolumako bago ni Pue, pensani rapandiri ewa sadua topobonde. Ane madota ia mobago, sangangaa ia anu mpolinguruna mangkoni wua nu tuda-tudana. 7 Nupairara patuduku ei, lawi i Pue ina mopakanoto raramu bona nuinsani ope-ope etu.
8 Nukaendo ei. I Yesu Kerisitu, Datu Topesorema, pemulea ni Datu Daudi, anu tuwu mpesola lako i kamate. Etumo isi nu Bambari Malompe anu kukeni. 9 Nakeningka kupadongkana Bambari Malompe, etumo mpane narumpa aku nu kapari, duduuna rasilu aku i se ei i rara nu tarunggu, ewa sadua tau anu madaa. Agaiana Ngkora ni Pue Ala baria tesilu. 10 Etumo mpane kubuku mokolo ope-ope kapari ei. Nauda rapopesiasi aku, kubambari liliu Ngkora ni Pue Ala, bona tau anu Napelisi ina mampetingai ai mampotuu Bambari Malompe etu, duduura mansumba katuwu malompe, ai katuwu anu meawa anu baria mokasopoa nakenimposintuwura ai i Yesu Kerisitu.
11 Mamonso mpuu lolita kono si Yesu anu manguli:
Ane mate kita simbela-mbela ai Ia,
ina tuwu mbui kita simbela-mbela ai Ia.
12 Ane sabara kita mokolo kapari nakenimpeulata si Ia,
ina meparenta mbui kita simbela-mbela ai Ia.
Agaiana ane tasapuaka Ia,
ina Nasapuaka mbui ka kitana tauNa.
13 Naudapae baria kita matundu si Ia, agaiana Ia mopabukei liliu ope-ope dandiNa si kita,
lawi baria Ia pensani mosapuaka pololitaNa saduduana.
Nupakalompe-lompe babeiamu ai patudumu bona mewali iko topobago ni Pue anu malompe
14 Timotiu! Ope-ope anu kuuli ei, sangangaa Nupopaingaka sira. Kiraka sira lolita i lio ni Pue Ala bona inee sira mampombesesei basangkia mpangka patudu i rara agamata. Lawi pombesese etu baria mobundu i rara nu katuwuta, agaiana wule mopakarugi pepotuu nu tau anu mampetingai. 15 Agaiana iko Timotiu, nupadongka patudu anu mamonso i kanoto-notona. Nupakaroso mpuu pampopolumakomu bago etu, ntena iko maea. Ane nubabei awetu, i Pue Ala ina mampokatono bagomu ai moimba iko topobagoNa anu malompe.
16 Inee sira nuposintuwuka tau anu mangkeni lolita anu baria mobundu. Lawi patudura etu baria mangkeni tau i katuwu anu magali, agaiana mopakakarao mpii sira lako si Pue Ala. 17 Patudura etu ewa saki anu melelesi ai anu mopakadaa katuwu nu tau wori. Anu mangkeni patudu etu tepesua i Himeneus ai i Filetus. 18 Mensopi sira lako i patudu anu mamonso, raulira liumo pemata nu ope-ope tomate. Patudura anu baria mamonso etu, mopakawuli ngkida basangkia dua tau, duduuna bariamo mobundu pepotuura. 19 Agaiana nauda awetu, tau ni Pue Ala rapandiri ewa sambua bulu watu anu maroso peongkona. I rara Ngkora ni Pue Ala teuki ewa ei, “Nainsani ni Pue ima anu Napelisimo mewali tauNa,” ai “Ima ngkida anu mopangaku ka i Pue Yesuna anu motumpui sira, sangangaa mopawia sira babeiara anu madaa.”
20 I rara nu tombi anu mabose, ria maisi mpangkana parewa. Ria parewa anu malompe, pandirina ria anu rababei lako i bulawa ai salaka. Ria mbui anu rababei lako i kau ba lako i tana pulu. Anu malompe, rapake i kadongka nu torare anu rabila. Anu baria malompe wule rapake, i bago i eo-eona. 21 Mewali, ane tapawia babeiata anu madaa, mewali kita ewa parewa anu malompe, anu rapake mobila torare. Lempona, mewali kita tau anu Napelisi ai anu mobundu si Pue, ai masilolonga mpuu kita mampopolumako sinangka bago anu malompe. 22 Mewali Timotiu, etumo mpane kukiraka iko lolita, inee nupeulai peundea nu raramu ewa anu paka nababei nu pamuda. Nupari-pari mampeulai babeia anu naunde ni Pue. Nupakaroso pepotuumu si Pue, ai kamaasimu i rangamu. Mosintuwu iko ai ope-ope tau anu mekakae sira si Pue, lako i kabula nu rarara.
23 Inee nupesuaki posisala nu tau sira anu baria mobundu, lawi nuinsani babeiara etu, wule moparia pobungka ngkida. 24 Ai baria sintoto ane kita anu mewali batua ni Pue, baria mosintuwu ai rangata. Sangangaa tapakaalusu pangkeniakata i ope-ope tau. Sangangaa mapande kita mepatudu, ai sabara kita. 25-26 Ane ria sira tau anu raundera moewa topangkeni Ngkora, ai baria raundera mampeulai Ngkora ni Pue, sangangaa tapakaalusu pololitata mokambaroka sira, babila nakiraka sira ni Pue tempo menonso lako i peewara. Lawi ane menonso sira, ina manginsani sira patudu anu mamonso duduuna manoto pekirira, ai tepawia sira lako i kuasa Datu nu Seta anu mopari-pari sira mampeulai peundeana.