Sura ni Suro Paulu anu karombelana napakatu si
Timotiu
1
1-2 Sura ei lako si aku i Paulu, kupakatu dongka si iko Timotiu, anaku anu kupokaasi. Mangula peundea ni Pue Ala, Naongkomo aku mewali suro ni Yesu Kerisitu, bona mobambari aku Bambari Malompe i ope-ope tau. I rara Bambari Malompe etu, i Pue Ala modandi ewa ei: ima anu mepotuu si Yesu Kerisitu, batena mansumba katuwu anu malompe anu baria mokasopoa.Mekakae aku si Pue Ala Tuamata ai si Pueta i Yesu Kerisitu, kuperade bona Nawati iko, ai Napatongawaaka iko asiNa, ai Nakiraka iko kalompe nu katuwu.
I Paulu manguli maisi kalompena si Pue Ala nakenimpepotuu ni Timotiu
3 Mpolinguruna, kuuli maisi kalompena si Pue Ala anu kupenombai, lako i kabulana nu raraku, ewa penomba nu ulububuku ni banimpia. Manguli liliu aku maisi kalompena si Pue Ala nakeningka ikona Timotiu. Kukabelai liliu iko i rara mpekakaeku, malompe mabaa awetu mbui madedi. 4 Kukaendo poili nu ue matamu i pogaata. Mabila aku si iko, etumo mpane kupenoka kuita iko, bona mabuke mpii katonoku. 5 Lawi kukaendo pepotuumu si Pue Yesu lako i raramu mpuu. Mpolinguruna tutuamu i Lois ai tinamu i Eunike mepotuu sira si Yesu. Ai kuinsani pepotuumu batena ina mangula pepotuu nu tinamu ai tutuamu.
I Paulu mosuweki rara ni Timotiu bona mampopolumako bago ni Pue
6 Mewali, Timotiu! Kupopaingaaka iko kono i pewati ni Pue Ala, i bago anu nakiraka iko ni banimpia, i tempona kuona paleku i tanuanamu moongko iko mewali tadulako nu topepotuu si Kerisitu. Etumo mpane kuperade bona monso-monso mpuu ka nupopolumakona liliu bagomu etu. 7 Inee iko maeka mampopolumako bagomu, lawi ane maeka kita, kaeka etu baria lako si Pue Ala. Lawi i Pue Ala mokiraka kita Inosa Magali, bona mansumba kita karoso mampopolumako bago anu Nakiraka kita, mampokaasi kita rangata ai morempeki kita peundea nu wotota.
8 Etumo mpane kukiraka iko lolita, bona inee iko maea mewali sabi ni Pue Yesu, ai inee mbui iko maea manguli ka akuna rangamu, nauda ratarunggu aku. Aku ei ratarunggu, lawi mopadongka aku Bambari Malompe. Mewali iko mbui sangangaa masilolonga mokolo kapari nakenimpobagomu mobambari Bambari Malompe. I Pue Ala anu mokiraka iko roso mokolo kapari etu. 9 Nasoremo kita lako i suku dosata, ai Naronde kita mewali tauNa anu magali. Baria kita Nasore ai Naronde ni Pue Ala, nakeni nu babeiata anu malompe. Agaiana etu Nababei nakeningkabula nu raraNa mangula tunggaiaNa. Lawi lako baria mani dunia ei rateru, riamo tunggaia ni Pue Ala mopasintuwu kita ai Ia mampoliungi i Yesu Kerisitu. 10 Ai ei-ei, Napatongawaaka mpuumo kita kabulana raraNa, lawi dongkamo i Yesu Kerisitu anu mosorema kita lako i suku dosata. I Yesu monangi kamate. Lempona: nauda kita mamate, ane mepotuu kita i Bambari Malompe, i Yesu ina mopatuwu mpesola kita ai Nakiraka kita katuwu malompe anu baria mokasopoa.
11 Etumo mpane naongkomo aku ni Pue Ala mewali suro ni Pue Yesu, bona mopadongka aku Bambari Malompe ei i tau, ai mopaguru sira bona mepotuu sira si Yesu. 12 Mewali, nakenimpobagoku mobambari Bambari Malompe etu, etumo mpane mansumba aku kapari duduuna ratarunggu aku. Agaiana nauda awetu, baria aku maea. Lawi kuinsani ai kupotuu ka Iana anu makuasa anu mokampai apa anu Napotuukamo aku, duduuna dongka i eo pobotusi kasopoa dunia.a
Sangangaa nupeulai liliu patudu anu mamonso
13 Timotiu! Kupopaingaaka iko patudu anu nuepemo lako si aku. Patudu anu mamonso etu sangangaa nupeulai. Inee nupawia pepotuumu si Yesu Kerisitu. Sangangaa nupokaasi singka rangamu nakenimposintuwumu ai i Yesu. 14 I Pue Ala mampotuu kita mangkeni patudu anu mamonso. Mewali, nakeningkamakuasa nu Inosa Magali anu meari i rarata, nukampai lompe patudu etu; inee nupogeaka tau ntanina mobaliki.
15 Nuinsani mpuu, lako i ope-ope topepotuu si Kerisitu i propinsi Asia, ina bariamo ria anu simbela-mbela ai aku. Simadaku sira mopalengimo aku, tepesua i Figelus ai i Hermogenes. 16-18 Agaiana santombia ni Onesiporus, mawori mbelamo mopakalene aku. Lawi nauda aku ratarunggu, baria ia maea mensonda si aku. Kadongkana i se ei i Roma, napari-pari mangkadelo aku, duduuna napomberumpaka aku. Ai nuinsani kaisi nu petulungina si aku ni banimpia, tongoku i Epesu. Mekakae aku si Pue, kuperade bona Nawati i Onesiporus, ai bona asiNa Napatongawa si Onesiporus i eo pobotusi kasopoa dunia.