Nupopolumako lompe pobagomu mopadongka Ngkora ni Pue Ala
4
1 Timotiu! Patuduku ei kupadongka lako i raraku mpuu. Ane i Pue Yesu dongka mpesola i dunia ei, ina meparenta Ia mewali sadua Datu, ai mampomeso-mesoka kara-kara nu ope-ope tau, malompe anu tuwu mani, awetu mbui anu mamatemo. Etumo mpane i lio ni Pue Ala ai i Yesu Kerisitu kukiraka iko lolita ei: 2 Nupadongka liliu Ngkora ni Pue Ala. Sangangaa masilolonga mpuu iko mopadongka NgkoraNa i tempo anu malompe ba i tempo anu mapari. Nukambarokamo sira anu mangkeni patudu anu baria makono, nusombo sira anu madaa babeiara, ai nupakaroso rara nu pokamu sampepepotuumu, bona malompe babeiara. Sangangaa sabara liliu iko mopaguru sira. 3 Lawi ina dongka tempona, tau bariamo sira ina mangunde mampetingai patudu anu mamonso. Ina mangkadelo sira guru-guru anu mopatuduka sira lolita anu mopakatono ngkida rarara, bona pensani sira mampeulai apa peundea nu rarara. 4 Mengkadoio sira ane mangepe sira patudu anu mamonso, agaiana matono sira ane mampetingai patudu anu rapatunda ewa lolita mpaturu. 5 Etumo mpane kukiraka iko lolita Timotiu, bona nurempeki liliu peundea nu raramu. Tetida iko mokolo kapari. Nupadongka liliu Bambari Malompe i tau anu baria mani sira mangepe. Nupasopo lompe ope-ope bago anu nakiraka iko ni Pue.6 Kukiraka iko patuduku ei, lawi kuinsani bariamo aku masae i dunia ei; ina dongkamo eoku. Ai ane rapopate aku i luwuna, kususu katuwuku ei si Pue Ala ewa popenombaku si Ia. 7 Kupeulai lompemo dala anu napakanotoka aku ni Pue. Kupasopomo bagoku. Baria tebaliki pepotuuku duduuna i kasopoana. 8 Mewali ei-ei, tepasilolongamo i suruga surungina penangiku, lawi kupeulaimo peundea ni Pue. Surungina penangiku etu ina nakiraka aku ni Pue i eo pobotusi kasopoa dunia, i tempona mampomeso-mesoka kara-kara nu ope-ope tau i kanoto-notona. Ai baria aku ngkida anu mansumba hadia etu. Ina Nakiraka mbui sira i ope-ope tau anu mampokakaia i Pue, ai anu mampegia kadongkaNa mpesola.
I Paulu merade bona i Timotiu maliga mai mensonda
9 Timotiu, kuperade bona maliga iko mai mosondaki aku. 10 Lawi napalengimo aku ni Demas, laumo ia i Tesalonika lawi mampomabose mani katuwu i dunia. Ane i Kreskes, lau i Galatia. I Titu lau i Dalmatia. 11 Batena ngkida i Lukasi anu simbela-mbela ai aku. Ane mai iko luwu, nudoa liu mai i Markus nu poranga mai i se ei, lawi pensani ia motulungi aku i rara bagoku. 12 I Tikikus kutudumo lau i Epesu. 13 Kuperade mbui bona nukenika aku mai jubaku, lawi nipalengiku i kota Troas i tombi ni Karpus. Nukeni mbui mai suraku aretura, pelumbunamo sura anu rababei lako i kolimba.
14-15 Mainga-inga iko si Aleksander, topobabei parewa lako i tambaga, lawi ia moewa patuduta. Maisi babeiana anu madaa si aku. Babeiana etu ina nasurungi ni Pue.
16 Mpolinguruna ni tempona kara-karaku rapomeso-mesoka, ai ni tempo etu mampololita aku notoku, baria ria sadua anu motulungi aku. Ope-ope sira mopalengi aku. Mekakae aku si Pue bona ntena Nasurungi babeiara etu. 17 Agaiana nauda baria ria rangaku anu mamporangai aku, i Pue mamporangai liliu aku. Nakiraka aku karoso mopasopo bagoku mopadongka Bambari Malompe, bona ope-ope tau anu baria sira toYahudi pensani mangepe bambari etu. Kasopoana, Napawia aku lako i pale nu tau anu mampenoka mampopate aku. 18 Ai batena ina napawia aku ni Pue lako i ope-ope anu madaa, ai ina Nakeni aku mesua i rara nu peparentaaNa i suruga. Tapakabosemo sangaNa duduuna i kasae-saeana. Amin!
Tabea
19 Nupadongka tabeaku si Priskila ai si Akwila, ai i santombia ni Onesiporus. 20 I Erastus, ria mani i kota Korintu. I Tropimus, kupalengi i boea Miletus lawi madua ia. 21 Nugagu mai lako baria mani dongka tempo malengi!
Maisi tabea lako si Ebulus, Pudes, Linus ai si Klaudia, ai lako i ope-ope pokata sampepepotuuta anu ria i se ei.
22 Timotiu, i Pue mamporangai iko. Ai i Pue mowati komi ope-ope anu mepotuu si Ia.