I Paulu mopatuduka sira apa anu ina mewali i kadongkaNa mpesola i Pue Yesu
2
1-2 Poka-poka, kaliliuana kipenoka kiulika komi patudu kono i apa anu ina mewali ane dongka mpesola Pueta i Yesu Kerisitu ai i tempona kita ina Nagulu ope-ope simbela-mbela ai Ia. Ria sira tau anu mangulika komi, dongkamo eo kadongkaNa mpesola i Pue. Agaiana baria mamonso pololitara. I olo nu tau aretu, ria sira anu manguli Inosa Magali anu mampopainsanika sira ewa etu. Ba lako i patudu nu tau, ba raulira mbui kariana sura lako si kami anu mopakanoto kadongkanamo eo ni Pue. Agaiana kiperade mpuu poka-poka, inee komi kasaliu maeka ba mawuli rarami, lawi baria mamonso bambari etu. 3-4 Naudapae ba adiwa lolita nu rangami, inee komi rapakanawu. Lawi lako baria mani dongka eo etu, anu rompangka ei sangangaa mewali nsalaa: mawori tau sangangaa mosapuaka i Pue Ala, ai sangangaa dongka sadua tau anu rasanga Manusia anu Madaa. Manusia anu Madaa etu iamo iwali ni Pue Ala. Ina mampemabose ia, ai mengkabatu, mengkaiwongko lako i ope-ope anu rapenombai i dunia. Ai ina pebai mpii ia momeso i rara nu Tombi ni Pue Ala, manguli ka iana i Pue Ala. Mewali, manoto mpuu ina ratende ia i rara naraka.5 Poka-poka, sangangaa nikaendo mani ope-ope anu kupatudukamo komi ni banimpia, i tempoku simbela-mbela ai komi. 6 Ane ei-ei, baria mani dongka Manusia anu Madaa mpii etu, lawi ria mani anu mosomboki ia. Agaiana, ane dongkamo tempona anu napakanotomo ni Pue Ala, Manusia anu Madaa etu ina dongka. 7 Ai i tempo ei, kuasana anu madaa mobago ngkandii-ndii i dunia. Agaiana baria mani taita ia, lawi ria mani anu mosomboki. Mewali, ane rawesikamo topesomboki etu, 8 lako taitada Manusia anu Madaa etu. Tempo ni Pue Yesu dongka ai kuasaNa anu meawa, ina ope kuasa nu Manusia anu Madaa etu, lawi ia ina napopate ni Pue Yesu ai inosaNa anu Natawuika lako i nguduNa.
9 Manusia anu Madaa etu ina dongka ai kuasa Datu nu Seta, ai kuasa etu ina napake mobabei mampopengaa tanda kuasa anu mepakanawu. 10 Ope-ope akalana anu madaa ina napake mopakanawu sira tau anu tepakanotomo rasuku. Ina marugi sira, lawi baria sira madota mampotuu ai baria mangunde Ngkora ni Pue, anu pensani mosore sira lako i suku dosara. 11 Etumo mpane, i Pue Ala mampopewali pekirira mewali mampekiri anu masala duduuna mepotuu sira i lolita anu mepakanawu, anu nakeni nu Manusia anu Madaa etu. 12 Etumo mpane, i Pue Ala ina mosuku ope-ope tau anu mangunde mobabei dosa ai anu baria sira mampotuu NgkoraNa anu manoto.
Napelisi komi bona Nasore
13 Mewali, poka-poka anu napokaasi ni Pue, sangangaa kiuli liliu maisi kalompena si Pue Ala nakeningka komina. Lawi i Pue Ala mampelisi komi lako i mpolinguruna, bona tesore komi lako i suku dosami nakenimpepotuumi i bambari anu mamonso lako si Pue Ala. Napelisimo komi bona Nasore nakeningkamakuasa nu Inosa Magali anu mampopewali komi tau ni Pue Ala anu magali. 14 Narondemo komi i tempomi mampetingai Ngkora Magali anu kipadongkaka komi, bona mansumba komi kirami i peawa ngkatuwu nu Pueta i Yesu Kerisitu.
Nipakaroso pepotuumi i patudu anu mamonso
15 Mewali poka-poka, nipakaroso pepotuumi, nipatoro mpuu sinangka anu kipatuduka komi, malompe anu kiulika komi, awetu mbui anu kiukika komi i rara nu suraki.
16-17 Mekakae kami i Pueta Yesu Kerisitu ai si Pue Ala Tuamata bona Natudoka kita asiNa, ai Napakaroso rarata duduuna kasae-saeana, ai Nakiraka kita pesarumaka anu malompe, nakeningkabula nu raraNa. Ai bona Napakaroso ai Napatetida rarami, bona malompe ope-ope pololitami ai babeiami.