2 Tesalonika 3

I Paulu merade bona rapekakaeka nu toTesalonika

1 Poka-poka, mewali kaliliuana, kiperade bona nipekakaeka mbui kami. Mpolinguruna, merade komi si Pue Ala bona kalalaua mawori tau ina mampetingai ai modoko Ngkora ni Pue, ewa anu mewali si komi ni banimpia. 2 Niperade mbui bona i Pue Ala mopawia kami lako i tau anu madaa ai anu mepopesiasi, lawi baria ope-ope tau mampotuu Ngkora ni Pue Ala.

3 I Pue Yesu batena mopabukei dandiNa si komi. Ina Napakaroso rarami ai mamperurui komi lako i Datu nu Seta. 4 Ai i Pue mampopewali kami mampotuu mpuu ka nipeulaina apa anu kipatuduka komi, ai ina nipeulai liliu.

5 Kipekakaeka komi bona i Pue Yesu monini komi, duduuna niinsani mpii asi ni Pue Ala si komi, ai bona matetida komi i rara nu kapari, ewa katetida ni Kerisitu.

Inee malose mobago

6 Poka-poka, ai kuasa anu nakiraka kami ni Pue Yesu Kerisitu, kiposawaaka komi: inee sira niposintuwuka pokami sampepepotuumi anu malose sira mobago, ai anu baria mampeulai atura anu nidoko lako si kami. 7 Niinsani mpuu babeiaki, baria kami malose mobago i tempoki simbela-mbela ai komi ni banimpia. Babeiaki etu anu sangangaa nipeulai. 8 Baria kami mangkoni pangkoni anu baria kibaluki. Mabaa ba madedi mobago mantimi kami bona ntena kipakapari katuwumi. 9 Kamonsona, baria kami masala ane merade kami si komi. Agaiana kiunde kipopeitaka si komi pandiri anu malompe anu pensani niula. 10 I tempoki mani simbela-mbela ai komi ni banimpia, riamo sawaa anu kibolika komi, kiuli: tau anu malose mobago, inee rakiraka pangkoni.

11 Tunggaiaki mpane kiuli awetu, lawi kiepe bambari anu manguli kariana tau i olomi anu malose mobago. Mampesuaki liliu sira urusia nu rangara, ai baria mpuu raundera mobago. 12 Mewali, ai kuasa anu nakiraka kami ni Pue Yesu Kerisitu, kipake moparenta tau aretu ai kisuweki rarara bona madota sira mobago, mangkadelo pangkonira.

13 Ai inee komi maluta-luta mobabei apa anu malompe. 14 Ane ria tau anu baria mangunde mampeulai apa anu kiuki i rara nu sura ei, mainga-inga komi. Inee niposintuwuka, bona maea tau etu. 15 Agaiana tau etu inee niimba iwalimi. Sangangaa niimba sira ewa pokami ai nikiraka sira patudu.

Tabea ai pewati

16 Batena i Pue anu pensani mokiraka kita kalompe ngkatuwu. Etumo mpane mekakae kami si Pue bona eo-eona Nakiraka komi kalompe ngkatuwu i pangka-pangkana. I Pue mamporangai komi ope-ope.

17 Tabea lako si aku, i Paulu. Tabea ei kuuki ai paleku. Ei mewali tanda lako si aku i rara nu ope-ope suraku, bona niinsani mpuu kalako si akuna sura ei. 18 Mekakae aku i Pueta i Yesu Kerisitu bona mowati komi ope-ope.