Sura ni Suro Paulu anu karombelana napakatuka jumaa i kota
Tesalonika
1
1-2 Sura ei lako si kami: i Paulu, i Silas ai i Timotiu. Kipakatuka komi pokaki sampepepotuuki i kota Tesalonika, anu menomba komi si Pue Ala Tuamata ai si Pue Yesu Kerisitu! Mekakae kami si Pue Ala Tuamata ai si Pue Yesu Kerisitu bona Nawati komi, ai Nakiraka komi kalompe nu katuwu.I Paulu manguli maisi kalompena si Pue Ala nakenimpepotuu nu toTesalonika
3 Poka-poka, sangangaa manguli liliu kami maisi kalompena si Pue Ala, nakeningka komina. Ai sintoto mpuu kibabei awetu, lawi kalalaua marosomo pepotuumi si Pue Yesu, ai kalalaua tetambaimo asimi sadua ai sadua. 4 Etumo mpane, i pearia ntanina kitoia komi i pokata sampepepotuuta. Nakeningkatonoki, etumo mpane kiulika sira, “ToTesalonika aretu, nauda sira rapopesiasi ai narumpa nu kapari, batena mepotuu liliu sira si Kerisitu.”
5 Mewali, nakeningkamarosona pepotuumi, tongawa kamanotona pobotusi ni Pue Ala. Mangula pobotusiNa, sintoto komi mewali tauNa i rara peparentaNa, lawi tetida komi i rara nu kapari anu morumpa komi ei-ei, nakenimpeulami si Pue Ala. 6 I Pue Ala mobabei apa anu manoto ai batena mosurungi babeia nu tau sira, anu mampopesiasi komi. 7 Ai ina Napawia komi lako i kaparimi, awetu mbui kami. Sinangkana etu ina Nababei i kadongkaNa mpesola i Pue Yesu anu ina mendolu mai lako i suruga ai malaekaNa sira anu makuasa simbela-mbela ai apu anu mambugi-mbugi. 8 Ai Iamo anu ina mosuku tau anu baria sira madota manginsani i Pue Ala, ai anu baria mangunde mampeulai Bambari Malompe anu mopadongka ka i Yesuna Pueta. 9 Sira etumo anu mansumba pesuku anu baria mokasopoa, ai ina ratende sira karao lako si Pue, duduuna bariamo sira mangepeka kamakuasaNa ai peawaNa anu mabose. 10 Ope-ope etu ina mewali i kadongkaNa mpesola i Pue Yesu. I tempo etu, ope-ope tauNa ina motoia sangaNa ai ina mololita sira, “Tongawa mpuu peawaNa!” Awetu mbui komi poka-poka, ina motoia i Pue Yesu i eo etu, lawi nipotuumo bambari anu kipadongkaka komi.
I Paulu mampekakaeka toTesalonika
11 Etumo mpane kipekakaeka liliu komi. Kiperade bona i Pue Ala mampopewali komi sintoto bona tuwu mampeulai peundeaNa; etumo tunggaiaNa moronde komi. Kiperade i Pue Ala, i rara kamakuasaNa, mopabukei peundeami mobabei anu malompe, ai baria ria kamakurana sinangka bago anu nipobago nakenimpepotuumi si Pue Yesu. 12 Tunggaiaki mekakae bona nakeni nu babeiami anu malompe, sanga ni Yesu Pueta ratoia, ai bona tuwu mbui komi i rara nu sanga ni Pue Yesu mansumba pepomabose. Ope-ope etu ina mewali nakeningkabula rara ni Pue Ala ai i Pue Yesu Kerisitu.