Lolitaka nu Suro ni
Pue Yesu
1
1 Teopilu anu kubila, i rara nu suraku anu mpolinguruna, kuukimo ope-ope anu nababei ai anu napaguru ni Pue Yesu, mepuu i pepuuaana pobagoNa, 2-3 duduuna dongka i eo pengkaoreNa lau i suruga. Awetu roomo Ia rapopate mpane tuwu mpesola, i Yesu mopatongawa wotoNa i suroNa. I rara iba mpulu eona, mawori mbelamo Ia mopatongawa wotoNa bona tongawa katuwuNa mpesola. Ni tempo etu, ria sira simbela-mbela ai Ia, mpane Napaguruka sira kono i dala ni Pue Ala meparenta i rara nu katuwu nu tau anu mepotuu. Lako baria mani Ia mengkaore lau i suruga, Nakiraka sira parentaNa ai kuasa nu Inosa Magali i suroNa anu Napelisimo. 4 Sambela tempo, tongoNa mogulu simbela-mbela ai sira, Naulika sira, “Inee sala nipalengi Yerusale. Nipegia sala i se ei duduuna TuamaKu mokiraka komi apa anu Nadandi ai anu Kuulika komi ni banimpia. 5 Lawi i Yohane meriu ai ue, agaiana dongkamo tempona, komi ina rariu ai Inosa Magali.”I Yesu mengkaore lau i suruga
6 Ni tempo nu suroNa aretu simbela-mbela ai i Yesu, mekunemo sira, raulira, “Pue, ba i tempo eimo ina Nuwangu mpesola poparenta nu toSaraeli anu maroso ewa ni banimpia, ba baria mani?”
7 Nasonoi ni Yesu, “Baria paraluu niinsani, TuamaKu ngkida anu mopakanoto ba impia ina mewali ope-ope tunggaiaNa anu Nababei ai kuasaNa. 8 Agaiana ina nisumba kuasa ane mendolu mai Inosa Magali si komi. Ai komi ina mewali sabiKu i Yerusale, i sumalele tana Yudea ai i Samaria, dongka-dongka i sumalele dunia.” 9 KarooNa mololita ewa etu, teongkomo Ia lau i suruga. Mengoamo sira mampeita Ia duduuna bariamo raitara lawi nabungkusimo nu gawu.
10 Tongora mani mengoa liliu i langi mototoki pengkaoreNa, ungangkidamo mangita sira rodua tau anu mesampi mabula anu meongko i olora. 11 Rauli nu tau anu rodua etu, “Ee toGalilea! Mangkiada komi meongko i se etu, mpane mengoa liliu i langi? I Yesu anu niita teongko lau i suruga, ina mesola mpesola lako i suruga ewa anu niitamimo ni mpongone.”
Mampelisi pasuru ni Yudasi
12 Roo ni se etu, mesolamo sira suroNa lako i Bulu Saitun lau i Yerusale. Bulu Saitun etu, sakilo kakaraona lako i Yerusale. 13 Kadongkara i Yerusale, mempone sira lau i lonta anu i wongko i tombi anu raposambengiira. Suro ni Pue Yesu aretu iamo: i Peturu, i Yohane, i Yakobu, i Andaria, i Pilipu, i Tomas, i Bartolomeus, i Matiu, i Yakobu ana ni Alfeus, i Simo toSelot, ai i Yudasi ana ni Yakobu. 14 Terusu liliu sira ope-ope, sampepekiri sira, ai mekakae simbela-mbela sira. I se etu ria mbui simbela-mbela ai sira basangkia dua towawine ntanina. Awetu mbui i Maria tina ni Yesu ai poka-pokaNa ria simbela-mbela ai sira.
15 Sambela tempo, ria sira kira-kira sangatu rompulu tau anu terusu. Ni tempo etu, meongkomo i Peturu mololita, nauli, 16 “Poka-poka, apa anu teuki i rara nu Sura Ngkora Magali sangangaa mewali. Nakenimpokale nu Inosa Magali si Datu Daudi, napadongka kono si Yudasi anu motadulakoi tau mosoko i Yesu. 17 I Yudasi etu, napopewalimo ni Pue Yesu topeguruNa, ai mobago ia simbela-mbela ai kami.”
18 (I Yudasi etu mobaluki tana ai doi saro nu babeiana anu madaa. I se etumo ia tepalumba mamate, mapise ai mabubu ope-ope isi nu taina. 19 Ope-ope toYerusale manginsani apa anu mewali etu. Etumo mpane tana etu rasangara i rara basara “Hakal Dama”, lempona: Tana Raa.)
20 Nauli mbuimo ni Peturu, “I rara nu Sura Dulua Petoia, teuki ewa ei:
‘Pogeakamode peariana maboa.
Inee ria anu mampearii.’ (Dulua Petoia 69:25)
Ai ria mbui anu teuki ewa ei:
‘Aginamo pomesoana naala nu tau ntanina.’” (Dulua Petoia 109:8)
21-22 Napaliliu ni Peturu pololitana, nauli, “Poka-poka, etumo mpane sangangaa tapelisi sadua rangata, bona simbela-mbela ia ai kita mewali sabi katuwuNa mpesolamo i Pue Yesu. Tau anu tapelisi etu, sangangaa sadua anu saweweinamo simbela-mbela ai kita i tempona i Pue Yesu ria i olota, mepuu lako i periu ni Yohane si Yesu duduuna dongka i pengkaore nu Pueta lako i dunia.”
23 Mewali ria rodua tomoane anu ratudoka sira nu tau wori anu ria i se etu. Sangara, i Yusupu anu rauli Barsabas (rasanga mbui i Yustus), ai i Matias. 24-25 Roo awetu, mekakaemo sira, raulira, “Pue, Nuinsani ope-ope rara nu tau. I Yudasi anu mewali suroMu ni banimpia, ei-ei rasuku mamatemo ia sintoto ai babeiana. Etumo mpane kiperade Pue bona Nutudoka kami kaimana lako i tau anu rodua arei anu Nupelisi amimo mopasuru i Yudasi.” 26 Roomo sira mekakae, raundiramo. Anu kono iamo i Matias. Raongkomo ia mewali suro ni Pue Yesu, bona sondo sira sampulu rodua ewa anu mpolinguruna.