39
Šibǝddaɣ šin limaman
1 Tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, a daɣ ǝgan šibǝddaɣ šin tawaqqannen daɣ ǝššǝɣǝlan win ǝlɣibada, ǝgan daɣ-as deɣ šibǝddaɣ šin zaddognen a z'itaqqan Harun, ǝgân awen s ǝmmǝk was omar Amaɣlol Musa.
2 Ǝgan efod daɣ tǝnǝlwa n urǝɣ ǝd tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhây tǝzuɣay, ǝd ta zaggaɣat, ǝd lin wa n ǝlǝsǝl. 3 Iwat urǝɣ har ikna tǝffǝrkǝk iqqal zun šira, ad t-iɣaggad itaggu daɣ-as šinǝlwa ǝknânen tǝsǝdday, tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl. Ǝššǝɣǝl wa meddan a tu-tagginen win ǝssannen azamay. 4 Efod ǝgan ǝššin suɣan win du-z-ǝɣlǝynen izeran, ǝzmayan-tan daɣ tamawen-net fǝl ad t-ǝttǝfan. 5 Ǝsatǝb-net wa n tagazay iga daɣ tǝbdoq ta da daɣ tǝga. Tabdoq ǝntada tǝga daɣ tǝnǝlwa n urǝɣ, ǝd tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl. Iga awen s ǝmmǝk was omar Amaɣlol Musa.
6 Ǝdkalan-du sanatat tǝhun ǝlanen almaqam as itawannu onǝyks ǝhânen tǝssǝwen-nasnat ǝgânen daɣ urǝɣ, ǝwâran-tanat ǝsmawan ǝn maddanǝs ǝn Yaqub, zun ǝmmǝk as isawar awedan ejwal-net y arat. 7 Ǝgan šihun šin fǝl suɣan n efod, imos awen isaktan ǝn marawat tawšeten ǝd sanatat šin Kǝl-Israyil. Awen kul iga s asaway was omar Amaɣlol Musa.
8 Šikǝst ta n tawǝy idmaran, ǝgan-tat aytedan ǝknanen tǝla ǝn madas. Ǝgan-as igi olan ǝd wa ǝgan y efod, gǝr za daɣ urǝɣ, wala tǝduft n ayfǝd tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, wala lin wa n ǝlǝsǝl. 9 Sannatfasan-tat, tǝqqal aganna n ǝɣil fǝl ǝkkullu n aganna. 10 Ǝdlagan-tat s ǝkkoz tattaran ǝn tǝhun ǝlanen almaqam s akkiyyat tǝttibbat daɣ tǝssut-net n urǝɣ. Atattar wa azzaran ǝgan-tu ǝs tǝhunt zaggaɣat as itawannu sardwan, d iyyat araɣat as itawannu tofaz, d iyyat tǝgat taddalǝt ta n yel itawann-as emrod. 11 Atattar wa n ǝššin ǝgan-tu ǝs tǝhunt zaggaɣat tǝtibǝlǝzzet as itawannu rubis, d iyyat tǝgat taddalǝt ta n jǝnnawan irdaɣ asawad, tǝgat esǝm safir, d iyyat tǝhunt amaran tǝlat ǝnnur wǝllen as itawannu dǝyaman. 12 Atattar wa n karad ǝgan-tu ǝs tǝhunt araɣat tǝbilazlazat as itawannu obbal, d iyyat zǝmlǝlat tǝlhay takkawalt as itawannu agat, d iyyat tǝgat taddalǝt ta n jǝnnawan tǝlhây tǝzuɣay as itawannu ametist. 13 Atattar wa n ǝkkoz amaran ǝgan-tu ǝs tǝhunt tǝgat tǝruɣay ta n urǝɣ as itawannu krizolit, tǝlhay-tat taddalǝt ta n yel, ǝd tǝhunt iyyat tǝgât karad ǝlmawan as itawannu onǝyks. Ǝd tǝhunt iyyat irdaɣ asawad dalet tǝgât esǝm jasfa. Šihun šin kul ǝmosnat itattaran ǝttibbatnen daɣ tǝssut n urǝɣ. 14 Ǝkkullu n iyyat daɣ tǝhun šin ǝssǝwaran-tat esǝm n iyyat daɣ tawšeten n Israyil marawat ǝd sanatat, zun d ǝmmǝk as isawar awedan ejwal-net y arat. 15 Šikǝst ta n tawǝy idmaran amaran ǝgan-as ǝššin sassaran n urǝɣ izdaran, ǝgânen ewet a d-isaktin tenallay tǝllâmat. 16 Ǝttǝwatnat sanatat tǝssǝwen n urǝɣ ǝd sanatat tǝzabaten n urǝɣ tawagganat daɣ tǝɣǝmmar šin afalla ǝn šikǝst. 17 Šizabaten šin sanatat-en, ǝssǝrdaɣan daɣ-asnat isassaran n urǝɣ win ǝgan, daɣ tǝɣǝmmar ǝn šikǝst ta n tawǝy idmaran. 18 Tǝzzar ǝrdafan imawan win hadatnen ǝn sassaran win daɣ tǝssǝwen n urǝɣ šin daɣ ǝttǝbbatnat tǝhun sanatat šin ǝwarnen isuɣan n efod fǝl zeran sa sǝr dat. 19 Ǝgan sanatat tǝzabaten n urǝɣ šiyyad ǝrdafan-tanat daɣ tǝɣǝmmar šin ares ǝn šikǝst ta n tawǝy idmaran sa sǝr dat fǝl aganna wa orayan s efod. 20 Ǝgan šizabaten sanatat n urǝɣ šiyyad, ǝrdafan-tanat daɣ suɣan win zeran n efod, ǝllanat sa sǝr dat, dagma n adag wa daɣ ǝrdafnat, ǝhoznat ǝsatǝb wa n tagazay n efod. 21 Šikǝst ta n tawǝy idmaran, ǝrdafan šizabaten šin tat-ǝhanen daɣ šin ǝhanen efod, tosaɣ dǝr-ǝs. Iga awen ǝs tǝsǝwǝt tǝgât taddalǝt ta n jǝnnawan, fǝl ad tǝwǝr šikǝst ta ǝsaɣǝn wa n tagazay n efod, taqqam da wǝr tǝmmǝzzay d efod. Iga awen s ǝmmǝk wa daɣ as omar Amaɣlol Musa.
22 Izda ǝbǝrnuz igan daɣ tǝduft tǝgat taddalǝt ta n jǝnnawan. 23 Ila šinwiri iɣlây ǝbǝl ǝẓdân aytedan win zattinen tabdoq. Abǝl wa ad issuhǝt wǝllen fǝl ad wǝr azzarrat. 24 Eres n ǝbǝrnuz wa, ǝgan daɣ-as ibašakšakan a t-id-ǝɣlaynen, ǝgânen tǝmǝwit a n aratan n ašǝk as itawannu ǝrrumman, amaran ǝgân ǝs tǝduft n ayfǝd tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhây tǝzuɣay, ǝd ta zaggaɣat, ǝd lin wa n ǝlǝsǝl. 25 Iga inaynan n urǝɣ izdaran, ǝkfasnen s aratan n ǝrrumman, har d-iɣlay awen abǝl wa n ares n ǝbǝrnuz. 26 Ad agin anayna, ilkǝm-as ara n ǝrrumman, har d-iɣlay awen abǝl wa n eres n ǝbǝrnuz. Ǝbǝrnuz wen ǝnta a izallag Harun daɣ amazay wa n ǝlɣibada, inimannak awen d awa as omar Amaɣlol Musa.
27 Ǝzdăn šikadkaden ǝn lin ǝganen ǝs madas i Harun ǝd bararan-net, 28 Ǝgan tǝgǝlmust ǝn lin i Harun, tawagganat tǝgǝlmas šiyyad i bararan ǝn Harun, ǝd tǝkarbayen šin ares s ǝntanatay da ǝgânat daɣ lin wa n ǝlǝsǝl. 29 Itawagga ǝsatǝb idlâgan s azamay igân ǝs madas ǝs tǝnǝlwa ǝn lin wa n ǝlǝsǝl, ǝd tǝduft n ayfǝd tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, iga awen s asaway wa daɣ as omar Amaɣlol Musa.
30 Ǝgan ǝzzǝnǝf ǝn širawt ta n aɣaf daɣ urǝɣ wa izdaran, tǝmosat asannal, ǝktaban fall-as: «Iskât y Amaɣlol». Akatab wa iga s ǝmmǝk was itawaggu ajwăl. 31 Ǝqqanan-tat ǝs tǝsǝwǝt tǝgat taddalǝt ta n jǝnnawan, fǝl afalla ǝn tǝgǝlmust, iga awen s asaway was omar Amaɣlol Musa.
Ǝmiwǝy ǝn mutag kul n ahaket i Musa
32 Ǝkkǝsawan ǝššǝɣǝlan kul win ǝqqalnen ahaket wa n ǝmǝnǝy s ǝnta a imosan ehan wa zǝddigan. Arat kul ǝgan-tu maddanǝs Israyil s ǝmmǝk was omar Amaɣlol Musa. 33 Ǝmmewayan-du mutag kul n ahan i Musa ǝmosan: Ahaket, ǝd mutag-net kul. Imutag win ǝgân daɣ sǝrdaf, ǝd gǝttan win faltoɣnen, ǝd zegǝran, ǝd gǝttan-net ǝd tǝbataqqaten-nasan, 34 d ǝsǝfǝl igan daɣ agašek n akar immuɣan daɣ tǝnǝɣmit, d agašek iyyan issohen, d ǝfǝr wa n anaɣer, 35 d ǝssǝnduq wa n tassaq, ǝd tallaɣen-net, d ǝsǝhǝr-net imosan ǝsǝknǝf, 36 ǝd tabǝl ǝd mutag-net kul, ǝd tǝgǝlla ta tǝnassit dat Amaɣlol, 37 d ǝsǝkbǝl ǝn fǝtǝlaten igan daɣ urǝɣ izdaran, a daɣ mitartarnat tǝdangazen-net, ǝd mutag-net kul, ǝd widi was raqqinat fǝtǝlaten. 38 Ǝd majmar wa n ǝsǝqqǝd n aḍutan win ǝzodnen igan daɣ urǝɣ, ǝd widi wa zǝddigan, d aḍutan win ǝzodnen win ǝsǝqqǝd, d ǝfǝr wa z'ikǝrirǝyan ɣur ǝmi n Ahaket, 39 ǝd majmar wa zǝwwǝran igăn daɣ daroɣ, d ǝssǝrir-net wa imašaragragan igan daɣ daroɣ, ǝd tallaɣen-net, ǝd mutag-net kul, d ǝɣlal wa n alwallatan ǝd tǝsǝkbǝlt-net. 40 Ǝd tǝsǝwad šin afarag, ǝd gǝttan-net ǝd tǝbataqqaten-nasan, ǝd sǝdas-net ǝd tǝmǝttǝytay-net, d ǝfǝr wa z'ikǝrirǝyan ɣur ǝmi-net, ǝd mutag kul win as tǝga addararat daɣ ǝlɣibada ɣur ahaket wa n ǝmǝnǝy s ǝnta a imosan ehan wa zǝddigan. 41 Ǝd tǝbǝddaɣ tiwaẓdanen ǝskâtnen y ad tawaqqannat daɣ ǝššǝɣǝlan win ǝlɣibada-nin daɣ adag wa zǝddigan. Šibǝddaɣ šin ǝskatnen s a tanat-itaqqan Harun s ǝnta a imosan ǝlimam wa zǝwwǝran, ǝd šin za taqqanan bararan-net daɣ ǝššǝɣǝl-nasan wa n tišit ǝn limaman.