40
Ǝmmǝk was z'ikrǝs ehaket
1 Inna Amaɣlol i Musa: 2 «Ijilan win azzarnen daɣ tǝllit ta tazzarat daɣ awatay, sǝkrǝs daɣ-san ehan wa zǝddigan, a t-imosan ahaket wa n Ǝmǝnǝy. 3 Tassansa daɣ-as ǝssǝnduq wa n tassaq, dǝffǝr ǝfǝr wa n anaɣer fǝl ad t-aqqarat. 4 Tawǝya-du tabǝl, tassansa fall-as šigǝlwen šin di-tawagganen tǝnafut, tawǝya-du ǝsǝkbǝl ǝn fǝtǝlaten, tassarɣa fǝtǝlaten-net. 5 Tawǝya-du majmar wa n ǝsǝqqǝd n aḍutan win ǝzodnen, igan daɣ urǝɣ, tassansaq-qu daɣ tǝnǝmiwǝla ǝssǝnduq wa n tassaq, illa gar-essan ǝfǝr wa n anaɣer. Tagaɣ afǝr wa z'ikǝrirǝyan daɣ ǝmi n ahan. 6 Tassansa majmar wa zǝwwǝran dat ǝmi n ahan wa zǝddigan imosan ahaket wa n ǝmǝnǝy. 7 Tassansaɣ aɣlal wa n alwallatan gǝr ahaket ǝd majmar wa zǝwwǝran, tǝdnǝyaq-qu aman. 8 Tawǝya-du šisǝwad šin z'ǝɣlǝynen afarag n ahaket, tǝssǝɣlǝyaq-qanat, tagaɣ ǝfǝr wa z'ikǝrǝyrǝyan ɣur ǝmi n afarag. 9 Tabǝza-du widi wa zǝddigan, taga sǝr-ǝs šinǝfas y ahan, d aratan kul win t-ǝhanen, ǝmmǝk wǝdi da as tu-za-tǝzzǝzdǝga ǝnta ǝd mutag-net kul. A obazan ɣur amazay wǝdi da ad ǝqqalan arat a sǝr-i iskâtan. 10 Tǝnfǝsaɣ ǝntada s arat daɣ widi wen majmar wa zǝwwǝran, ǝd mutag-net kul, ǝmmǝk wen daɣ as sǝr-i z'ǝskǝtan ǝqqǝlan arat iknân tazdak. 11 Tǝnfǝsaɣ ǝntada ǝs widi wen aɣlal wa n alwallatan ǝd tǝsǝkbǝlt-net fǝl ad ǝqqǝlan arat a sǝr-i iskâtan. 12 Tidawaɣ ǝd Harun ǝd bararan-net s ǝmi n ahaket wa n ǝmǝnǝy, tǝšširǝdaɣ-asan. 13 Tassalsa Harun isǝlsa-net zaddognen, tǝnɣǝla fall-as widi wa zǝddigan fǝl a sǝr-i iskǝt iqqǝl ǝlimam a di-iɣbâdan. 14 Tannaɣ i bararan ǝn Harun a d-ihazan, tǝzzǝzlǝgaq-qan šikadkaden-nasan; 15 tǝnɣǝla fall-asan widi wa zǝddigan, zun awa tǝge y abba-nasan, fǝl ad ǝqqǝlan ǝntanay da ilimaman-in a di-ǝɣbadnen. Ǝtǝwǝnɣal wa iga widi wen fǝl ɣafawan-nasan a tan-igan ilimaman win sannafrana har faw ǝntanay d ǝzzurrǝyya-nasan.» 16 Iɣrad Musa igi n aratan win da s ǝmmǝk wa daɣ as t-omar Amaɣlol:
Akaras n ahaket
17 Ǝzǝl wa azzaran daɣ tǝllit ta tazzarat, imos awen awatay dǝffǝr agamad ǝn Masar, ǝnta ad ikras ahaket. 18 Iggaz Musa šin ǝsǝkrǝs n ahaket: Ǝmmǝdkalan-du gǝttan win faltoɣnen, tawasaɣtan fǝl tǝbataqqaten-nasan, tawassadan daɣ-san zegǝran-nasan, ǝmmǝdkalan-du gǝttan win ǝmi n ahan, tawasaɣtan ǝntanay da daɣ tǝbataqqaten-nasan. 19 Obaz-du ahaket, issǝfal-t-id, issǝwar-t-idu šisalsaten-net. Aratan win den ǝgan s asaway wa daɣ as omar Amaɣlol Musa. 20 Obaz-du ǝššin sǝlluman ǝn tǝhunt win ǝwaran alwajiban win maraw s ǝntanay a mosnen tǝgǝyya, ig-en daɣ ǝssǝnduq, issad daɣ ɣabatan n ǝssǝnduq tallaɣen šin as z'itamadkal, issǝwar-tu ǝsǝhǝr wa n ǝsǝknǝf. 21 Eway ǝssǝnduq ig-ay daɣ ahaket, iqqan afǝr wa n anaɣer, igâ awen s asaway iman-net was t-omar Amaɣlol. 22 Iga tabǝl daɣ ahaket wa n Ǝmǝnǝy, fǝl aganna wa n tamasna, daɣ adag wa zǝddigan; 23 issǝnsa fall-as šigǝlwen, dat Amaɣlol, iga awen s ǝmmǝk was t-omar Amaɣlol. 24 Issǝnsa ǝsǝkbǝl ǝn fǝtǝlaten daɣ ahaket wa n Ǝmǝnǝy, isannamaswad-tu ǝd tabǝl, daɣ aganna n ahaket wa n agala. 25 Iɣrad ǝsǝrɣi ǝn fǝtǝlaten, dat Amaɣlol, s ǝmmǝk was t-omar Amaɣlol. 26 Idkal-du majmar wa n ǝsǝqqǝd n aḍutan win ǝzodnen igan daɣ urǝɣ, issǝns-ay daɣ ahaket wa n Ǝmǝnǝy, dat ǝfǝr wa n anaɣer. 27 Issǝqqad daɣ-as aḍutan ǝzodnen, s ǝmmǝk was t-omar. 28 Iqqan afǝr wa z'ikǝrirǝyan ɣur ǝmi n ahaket. 29 Issǝnsa majmar wa zǝwwǝran daɣ aɣarɣar wa illan dat ahan wa zǝddigan imosan ahaket wa n ǝmǝnǝy daɣ ihǝz n ahaket en da. Issǝqqad fall-as takutay ta tǝtirǝkǝmmet, ǝd tǝnafut ta n tǝbzǝst. Arat wen iga s ǝmmǝk was t-omar Amaɣlol. 30 Issǝnsa aɣlal gǝr ahaket wa n Ǝmǝnǝy ǝd majmar wa zǝwwǝran, iga daɣ-as aman win alwallatan. 31 Ad išarad Musa ǝd Harun ǝd bararan-net ifassan-nasan, ǝd daran-nasan s aman win den. 32 As taggazan ahaket wa n ǝmǝnǝy madeɣ takkin ɣur majmar wa zǝwwǝran, kundaba ǝzzǝzdagan s ǝmmǝk was omar Amaɣlol Musa. 33 Inkar Musa s afarag wa iɣlayan ahaket ǝd majmar, issǝɣlay-t-id šisǝwad-net, iššolay afǝr wa z'ikǝrirǝyan ɣur ǝmi n afarag. Ǝmmǝk wen daɣ as ǝndan ǝššǝɣǝlan win akaras n ahaket.
Ǝzǝbbi ǝn tanaya n Amaɣlol
34 Tǝzzar ilsa agarak ahaket wa n ǝmǝnǝy, tǝzzǝbbat-du tanaya n Amaɣlol tǝdnay-tu. 35 Ab-as ifrag Musa iguz n ahaket wa n ǝmǝnǝy fǝlas ils-ay agarak wen, amaran tǝdnay-tu tanaya n Amaɣlol. 36 Ab-as tagalen maddanǝs n Israyil iket wǝr d-igmed agarak ihhukǝt dǝnnǝg ahan. 37 Iket wǝr d-ihhokat agarak wen, ǝntanay da wǝr z'aggalen. Ǝqqalan y agarak wen har d-awǝd ǝzǝl wa daɣ du-z-ihhukǝt, ǝddi amaran ad z'aggalen ǝntanay da. 38 Agarak wa ilsan ehan, ǝnta as isinǝfilil Amaɣlol i maddanǝs Israyil kul as illa den, iket iga azal, amaran as iga ahad ad t-ǝnǝyan imos ǝnnur ǝn temsay tǝhat agarak wen. Ǝmmǝk wen daɣ as iga awen daɣ tǝzzǝgrǝt n ǝšikǝl-nasan.