Ǝlkǝttab wa n Tǝsǝntit
1
Ǝttarix n Ǝnǝtti n ǝddǝnet
Axluk n ǝddǝnet
1 Ǝstizarat Mǝššina ixlak-du ijǝnnawan d amadal.
2 Amadal wǝr iga tǝmǝwit waliyyat za wǝr t-iha wala. Ǝlsân-tu aman ǝknânen igǝt, wǝr t-illa ar šiyyay ǝwârnen afalla n aman win, amaran Rux ǝn Mǝššina ǝnta ollây fǝl aman win. 3 Inna Mǝššina: «Imǝlet-tu ǝnnur.» Tǝzzar imal-tu ǝnnur. 4 Ǝnnur wen imos arat olaɣan ɣur Mǝššina, tǝzzar izammazzay-tu ǝd šiyyay. 5 Iga Mǝššina y ǝnnur esǝm ezal amaran šiyyay ig-asnat esǝm ehad, iga ahad tǝga tifawt, iqqal awen ǝzǝl wa azzaran.
6 Inna Mǝššina: «Imǝlet-tu ǝsǝfǝl a z'izǝmmǝzzǝyan aman.» 7 Iga awen s ǝmmǝk en da. Tǝzzar iga Mǝššina ǝsǝfǝl izimazzayan aman win ǝllanen daw ǝsǝfǝl wa ǝd win ǝwarnen afalla-net. 8 Iga Mǝššina y ǝsǝfǝl wa esǝm ijǝnnawan. Iga ahad tǝga tifawt, iqqal awen ǝzǝl wa n ǝššin.
9 Inna Mǝššina: «Aman win daw jǝnnawan iddawanet, ǝggǝzanet edag iyyanda fǝl a d-inǝfilǝl adag iqquran.» Iga awen s ǝmmǝk en da. 10 Iga Mǝššina y adag wa iqquran esǝm amadal, iga y adag wa daɣ ǝddewan aman esǝm igǝrwan. Arat wen olâɣ ɣur Mǝššina. 11 Tǝzzar inna: «Amadal tǝwǝret-tu taddalǝt tǝgât daɣ ǝzzǝnǝfan n annabatan ǝlânen imasan d ǝzzǝnǝfan n eškan tarawnen s akkiyyan ila amasa-net.» Iga awen s ǝmmǝk en da. 12 Issǝgmad-du amadal taddalǝt tǝgât daɣ ǝzzǝnǝfan n annabatan ǝlanen imasan, d ǝzzǝnǝfan n eškan tarawnen, s akkiyyan ila amasa-net. Arat wen olâɣ ɣur Mǝššina. 13 Iga ahad tǝga tifawt, iqqal awen ǝzǝl wa n karad.
14 Inna Mǝššina: «Ǝmǝlanet-tu ǝnnuran daɣ jǝnnawan, fǝl ad zǝmmǝzzǝyan ehad d azal, ǝqqǝlanet arat a z'izlǝyan šimeren d adan d elan. 15 Ǝqqǝlanet deɣ daɣ jǝnnawan ǝnnur a z'isǝmmǝlǝwlǝwan amadal.» Iga awen s ǝmmǝk en da. 16 Iga Mǝššina ǝnnuran win ǝššin zawwarnen. Ǝnnur wa ogaran, ǝnta tǝfuk, y ad isǝmmǝlǝwlǝw ezal, wa ǝndǝrran, tallit, y ad isǝmmǝlǝwlǝw ehad. Iga etran ǝntanay da. 17 Ig-en daɣ jǝnnawan fǝl ad sǝmmǝlǝwlǝwan amadal, 18 ǝzǝnnǝmǝzlǝyan deɣ ezal d ahad, zǝmmǝzzǝyyan ǝnnur ǝd šiyyay. Arat wen olâɣ ɣur Mǝššina. 19 Iga ahad tǝga tifawt, iqqal awen ǝzǝl wa n ǝkkoz.
20 Inna Mǝššina: «Wǝšǝnkǝlnatet tǝxǝllak ǝddârnen, daɣ aman. Ǝggǝdanet gǝdad daɣ alhawa gǝr jǝnnawan d amadal.» 21 Ixlak-du Mǝššina imudaran ǝknânen tǝzzǝwwǝrt ǝn gǝrwan ǝd tǝxǝllak kul šin wašankalnen daɣ aman s ǝkkullu n iyyan d ǝzzǝnǝf-net. Ixlak-du deɣ igǝdad kul, ǝkkullu n iyyan d ǝzzǝnǝf-net. Arat wen olâɣ ɣur Mǝššina. 22 Iga daɣ-san albaraka, inna i mudaran win aman: «Ǝggǝzat šin n ara, tǝwǝšǝnkǝlam, tǝdkǝram aman ǝd gǝrwan.» Inna i gǝdad ǝntanay da: «Wǝšǝnkǝlat fǝl amadal.» 23 Iga ahad tǝga tifawt, iqqal awen ǝzǝl wa n sǝmmos.
24 Inna Mǝššina: «Ǝmǝlanet-tu mudaran, fǝl amadal, s akkiyyan d ǝzzǝnǝf-net, ǝmosan ihǝrwan, ǝd lumǝt-lumǝt ǝd dǝmǝrdǝmaran, ǝd wǝxsan, sǝkkulluk n iyyan d ǝzzǝnǝf-net.» Iga awen s ǝmmǝk en da. 25 Iga-du Mǝššina iwǝxsan ǝd hǝrwan ǝd lumǝt-lumǝt ǝd dǝmǝrdǝmaran, akkiyyan d ǝzzǝnǝf-net. Arat wen olâɣ ɣur Mǝššina. 26 Inna Mǝššina: agat-ana aytedan ǝs šaššelan-nana. Ǝxkǝmanet ihǝrwan, ǝd wǝxsan, ǝd gǝdad, ǝd kifitan ǝd lumǝt-lumǝt, ǝd dǝmǝrdǝmaran. 27 Amaran ixlak-du Mǝššina aytedan. Ixlak-kan-du ǝs šaššelan-net. Ixlak-kan-du ǝmosan yay ǝd tǝntay. 28 Iga daɣ-san albaraka, inn-asan: «Ǝggǝzat šin tǝla ǝn bararan, tigatam, tǝdkǝram amadal, tǝxkǝmam-tu, tǝxkǝmam imudaran kul win jawankatnen fǝl amadal ǝd gǝdad, ǝd kifitan.» 29 Tǝzzar inna Mǝššina: «Ǝnǝyat, ǝkfeq-qawan annabat kul itarawan fǝl tasayt n amadal d ašǝk kul itarawan. A dawan-ǝqqǝlan aratan-nasan isudar. 30 Imudaran kul win ǝwarnen amadal, ǝd gǝdad kul, ǝkfeq-qan taddalǝt ketnet y a dasan-tǝqqǝl isudar.» Iga awen s ǝmmǝk en da. 31 Arat wa iga Mǝššina da, ketnet ikna ɣur-ǝs ǝlluɣ. Iga ahad tǝga tifawt, iqqal awen ǝzǝl wa n sǝdis.