Ǝlkǝttab wa n Agamad ǝn Masar
1
Ǝkkǝlu d ǝsǝllǝllu
Ǝkkǝlu ǝn maddanǝs n Israyil daɣ Masar
1-4 Maddanǝs ǝn Yaqub, was itawannu Israyil, win d-osanen Masar ǝddewan dǝr-ǝs, akkiyyan d aɣaywan-net, ismawan-nasan: Ruben, Šimǝɣon, Lebi ǝd Yahuda, Issakar, Zǝbulun ǝd Benyamin, Dan ǝd Naftali, Gad d Aššer. 5 As ig'awen barar-net wa igan Yusǝf ǝnta iha Masar. Xasil awa d-igmadan Yaqub ketnet imos ǝssayat tǝmǝrwen n awedan. 6 Dǝffǝr awen aba Yusǝf ǝd mǝdrayan-net ǝd tamattay ta n azzaman win di. 7 Tǝzzar ad tarawan maddanǝs n Israyil tittǝyan, har ǝgan iggǝt wǝr nǝmmǝkkan, ǝdnayan akal.
8 Iggaz ǝmǝnokal iyyan wǝr nǝssen fǝl Yusǝf taɣmar ǝn Masar. 9 Inkar inna i tamattay-net: Toggam as maddanǝs n Israyil ogaran-anaɣ igǝt d assahat. 10 Agiwatana y asan tǝmǝrkest dasan-za-tǝgdǝlat tittǝyt, ad wǝr inkǝr ǝmǝgǝr daɣ akal, tǝzzar ǝwǝran aganna wa n magzaran-nana, dǝffǝr adi ǝbbǝzan akal. 11 Denda ad sannafranan Kǝl-Masar meddan wiyyad ǝzzozaran-tan i Kǝl-Israyil y a tan-šahaššalan ǝššǝɣǝl, ǝdgǝzan-tan wǝllen. Ǝmmǝk en da as ǝkrasan i Firɣawna iɣǝrman an Fitom ǝd Ramses ǝmosnen idaggan ǝn tǝɣebǝren-net. 12 Mišan ǝddǝguz wa labasan en iqqal i maddanǝs n Israyil tǝttǝyt d adanay n akal. Tǝggaz-tan tasa ǝn maddanǝs n Israyil, oglafan-tan. 13-14 Ǝnkaran Kǝl-Masar ǝgan-tan eklan a tan-saknin alɣazab wǝr nǝmmǝkkan s ǝššǝɣǝl issohen ǝn talaq, ǝd bargitan d ǝššǝɣǝlan kul win tǝwǝgas. Ǝššǝɣǝlan kul win ǝnɣanen awedan sisugin-asan-tan.
15 Arat wa wǝr igda y ǝmǝnokal ǝn Masar tǝzzar iššewal i tǝdoden šin ǝšɣalnen daɣ batu n ǝmzuran, iyyat esǝm-net Šifra ta n sanatat esǝm-net Fuha, 16 inn-asnat: «As tǝtaggimat šidoden šin Israyil daɣ ǝmzur, kud za barar a ihǝwan tanɣimat-tu, kud amaran tabarart tayyimat-tat.» 17 Mišan šidoden šin den wǝr ǝgenat arat was inna ǝmǝnokal ǝn Masar ad t-aginat fǝlas ǝksudnat Mǝššina. Ad tayyinat bararan win yayyan da ǝddaran. 18 Tǝzzar iɣra-du Firɣawna šidoden šin den inn-asnat: «Mafel tǝtayyimat bararan win yayyan ǝddaran?» 19 Ǝnnanat-as: «Adi šidoden šin Israyil wǝr olenat ǝd šin Masar. Assahat agget a ǝganat. Bararan-nasnat as tihǝwan harwa wǝr din-osenat tǝdoden šin tagginen daɣ ǝmzur.» 20-21 Fǝl tǝksǝda ta ǝganat tǝdoden šin den i Mǝššina, izazzabbat-du fall-asnat albaraka-net, ǝganat inan. Tǝgla tamattay n Israyil tǝtittǝy tǝkannu assahat.
22 Omar Firɣawna tamattay-net ketnet, inn-as: «Bararan-nasan win yayyan kul ǝggarat-tan daɣ agarew wa n Ǝnnil ad tǝtayyim šin tǝntawen da ǝddarnat.»