50
Tamazala ǝn Yaqub
1 Ifataqqat Yusǝf fǝl abba-net izalammat-tu ad ihallu. 2 Dǝffǝr adi omar Yusǝf inasmagalan-net s ad ǝšširǝdan alzanazat ǝn šis, agin-as aḍutan ǝzodnen. 3 Imutag win ǝkkozat tǝmǝrwen n ǝzǝl a dǝr du-tagdin. Ǝgan Kǝl-Masar ǝssayat tǝmǝrwen n ǝzǝl ǝhallin-fall-as.
4 As okayan adan win tǝweškent iššewal Yusǝf y aytedan ǝn Firɣawna inn-asan: «Kud a tǝnnam tarâm i tǝšǝššiwǝdam i ǝmazal-in a dawan-z-aga ǝs Firɣawna, tannim-as: 5 " Abba-nin as ǝhada ɣur tilkamat ǝn tǝɣrǝst-net as akal wa n Kanan a daq-qu z'ǝnbǝla daɣ ǝzǝkka wa isammatag i man-net." Tannim-as deɣ: " A di-d-akfu turagat n ad agla a t-in-ǝnbǝla ad d-ǝqqǝla."» 6 Inn-as-du Firɣawna: «Aglu tammazalaɣ abba-nak tassandaɣ arat wa fǝl das-tǝhada.» 7 Iggǝzzay Yusǝf ǝs Kanan a din-ammazal šis. Ǝddewan dǝr-ǝs maššaɣalan ǝn Firɣawna d ǝmɣaran win nǝqqima-net d ǝmɣaran kul ǝn Masar, 8 d aɣaywan ǝn Yusǝf kul ǝd mǝdrayan-net d aytedan n abba-net, wǝr d-iqqim dǝffǝr-san daɣ akal wa n Gošen ar bararan-nasan ǝd hǝrwan-nasan. 9 Iddew Yusǝf d aytedan ǝs wiyyad ǝwânan ǝggǝsan wiyyad ǝwânan amalankaytan ǝwânan ǝggǝsan. Imos šikkelt tǝknât igǝt.
10 As din-ewadan Goran-Ha-Atad, almaɣna aɣarɣar n ǝbǝkki wa n Atad dagma n agarew wa n Yordan ǝgan-as tǝfǝyyawt tǝknât tǝzzǝwwǝrt a daɣ sikarayan. Iga Yusǝf daɣ adag wen ǝssa adan tǝga fall-as tǝfǝyyawt n abba-net. 11 As ǝnayan Kananitatan ǝɣsârnen amadal en tǝfǝyyawt ta daɣ Goran-Ha-Atad ǝnnan: «Iket ǝn tǝfǝyyawt ǝn Kǝl-Masar!» Adi da a fǝl itawagga y adag en esǝm Habila Misrayim, almaɣna Tǝfǝyyawt ǝn Masar. Edag en illa dagma n agarew wa n Yordan. 12 Ǝgan maddanǝs ǝn Yaqub arat was tan-omar šissan. 13 Ewayan alzanazat-net s akal wa n Kanan ǝnbalan-t-in daɣ akazam ihan tawagost ta n Makfela, akazam wen ǝnta a izzǝnza Ibrahim ǝnta ǝd tawagost ta iha ɣur Efron wa n iyyan daɣ Xitatan, fǝl ad iqqǝl edag ǝn zǝkwan ǝn nǝmmǝttan-net. Edag wen illa dagma n amadal ǝn Mamre. 14 As immozal Yusǝf abba-net, iqqal akal ǝn Masar ǝnta ǝd mǝdrayan-net, d aytedan kul win dǝr-ǝs ǝddewnen ǝs tamazala n abba-net.
15 As ǝnayan mǝdrayan ǝn Yusǝf as abba-nasan za aba-tu, ad ǝtinǝmǝnnin: «Ma za nagu as iggaz alham-nana Yusǝf, iru a daɣ-na izzǝzǝl ark ǝmazal wa nad a das-nǝga da?» 16 Tǝzzar ǝzammazalan-in sǝr-ǝs ǝnnan-as-in: «Abba-nana harwada iddar, as danaɣ-omar inn-ana: 17 "Annat i Yusǝf: 'Yusǝf ǝssânaɣ as ǝgân-ak mǝqqaran-nak ark-ǝmazal labasan mišan ǝgmâya daɣ-ak a dasan-tǝssurǝfa ark igi-nasan d abakkad-nasan.' " Ǝmǝrǝdda nǝgmây daɣ-ak ad tǝssurǝfa y eklan n Ǝmǝli n abba-nak.» As isla Yusǝf i batu-nasan iggaz šin tala. 18 Osan-t-idu mǝdrayan-net ǝssǝjadan dat-ǝs ǝnnan-as: «Nakkanay da eklan-nak a nǝmos.» 19 Mišan inn-asan Yusǝf: «Ad wǝr tǝššǝwǝšam! Nak wǝr z'ǝggǝzaɣ edag ǝn Mǝššina. 20 Kala tǝgam ǝnnǝyat n a di-tagim tǝkma mišan isammatay-tat Mǝššina ig-et alxer fǝl ad agǝz aytedan aggotnen. Tǝnfa n adi da, a tǝhannayam daɣ azzaman win nǝha da ǝmǝrǝdda. 21 Daɣ adi ad wǝr tǝššǝwǝšam! A daɣ-wan ǝssǝna kawanay ǝd bararan-nawan.» Isahhadarrat-tan ǝs batuten hossaynen ǝdâsnen iwallan-nasan.
Tilkamat ǝn tǝɣrǝst ǝn Yusǝf
22 Iɣsar Yusǝf daɣ Masar ǝnta d aɣaywan n abba-net. As iga Yusǝf temeday n awatay ǝd maraw daɣ ǝddǝnet, aba-tu. 23 Inay Yusǝf maddanǝs ǝn hayawan ǝn rures Efrayim, ǝhǝwan ɣur-ǝs deɣ maddanǝs ǝn Makir ag Manasay issǝdwal-tan.
24 Inna Yusǝf i mǝdrayan-net: «Nak za wǝr di-tǝggug tǝmattant amaran illikan as a daɣ-wan issǝn Mǝššina, issuɣǝl-kawan akal wa was ihad as ad t-akfu y Ibrahim d Isǝhaq ǝd Yaqub.» 25 Tǝzzar iqqan Yusǝf arkawal daɣ maddanǝs n Israyil inn-asan: «Illikan as Mǝššina ilkam ad aknu taɣara-nawan, amaran, are daɣ-wan a di-tǝhǝdam as as tǝglam, ad tǝmmǝram iɣasan-in, tǝssǝgǝgam-tan edag a.» 26 As tewad tǝɣrǝst ǝn Yusǝf temeday n awatay ǝd maraw, aba-tu. Tǝtawašarad alzanazat-net ǝtawaggan-as aḍutan ǝzodnen tǝtawagga daɣ šifit tǝtawasansa daɣ ǝssǝnduq wa daɣ taggin Kǝl-Masar alzanazat.