49
Awalan win ǝlkamnen ǝn Yaqub i Maddanǝs
1 Iɣra Yaqub maddanǝs, inn-asan: «Iddawat-du a dawan-ǝmǝla awa kawan-z-igrǝwan daɣ azzaman win d-ǝzaynen.
2 Iddawat-du bararan-in, sǝsǝmat y awal-in:
3 "Ruben kay aɣafadday-nin,
Kay assahat-in, kay eɣaf ǝn tǝɣurad-in,
Kay a ogaran ǝtǝwǝsǝɣmar daɣ bararan-in,
Kay a ogaran tǝla ǝn fǝrregaten.
4 Tǝmosa angǝy n aman ozâlnen
Mišan a kay-igmǝd almaqam-nak,
Wa n tizart i mǝdrayan-nak
Fǝlas tǝsaffallasa abba-nak
S ǝnǝmǝnsa wa tǝge d anna-nak.
5 Šimǝɣon ǝd Lebi imǝdrayan olânen
Šikabiwen-nasan kayatan ǝkmânen.
6 Sǝnnǝmǝggǝgaɣet šimǝrkas-nawan ǝd man-in
Aqqamet ǝtǝwǝsaɣmar-in
Wǝr irtay dǝr-wan daɣ ahan-in,
Fǝlas iggaz-kawan alham, bararan-in
s ǝnta kawan-isassanɣan aytedan aggotnen
daɣ tara ǝn man
tǝɣtasam agozan ǝn zǝgran ǝddârnen.
7 Tǝwar tulɣant alham-nawan ilan šiɣǝrden
Fǝlas tǝkmawen a t-ǝhanen.
Tǝwar tulɣant aššar-nawan a d-izzibben,
Fǝlas tǝhanint a kawan-wǝr-nǝha, wala iman mallolnen
A kawan-ǝzǝmmǝzzǝya ǝd tamattay-nin,
Zǝwwǝziwǝzaq-qawan daɣ akal-in.
8 Yahuda kay a ǝflasan mǝdrayan-nak
Ad tarnaɣ imagzaran-nak,
Ǝssǝjǝdan dat-ǝk maddanǝs n abba-nak.
9 Yahuda, barar-in, ǝmawad n ahar a dǝr toleɣ iman-net,
Wa d-iyyǝwanan daɣ tǝgmǝrt, iqqal-du edag-net.
Ikram idaran-net,
Israd: ma ihalan ǝsǝbdǝd-net?
10 Taɣmar wǝr za tǝfǝl ehan-net,
Ǝttǝbil illa ɣur ǝzzurrǝyya-net
Har d-asu wa t-ilan iman-net,
Ǝnta as ǝttafnat tǝmattiwen tanat-net.
11 Ewad daɣ tǝnaflǝyt
As iqqan ajad-net
Daɣ tǝfsǝq n alɣanab-net,
Ad irabbaz isǝlsa-net
Daɣ esmad n alɣanab d ǝzzǝwi-net.
12 Isassahat esmad tǝmǝllay ǝn šittawen-net,
tǝssǝmlal tessay n ǝx išenan-net.
13 Zǝbulun ad iɣsǝr fǝl tama ǝn gǝrwan,
Dad ǝtazakken ǝɣlalan win aman.
Igla akal-net har Sidon daɣ ɣǝrman.
14 Issakar ajad issohen,
Išɣǝl ardu s i t-ilan.
16 Dan ad ixkǝm isǝssuhǝt aytedan-net
Alin ǝd tamattay n Israyil ketnet.
17 Dan šilan taššolt tǝhat tarrayt-net
Tǝddad agozan n ays fǝl a d-udu amawan-net.
18 Ǝge daɣ-ak Amaɣlol attama n efsan!
19 Gad ad t-ǝgrǝwan majjarakan
Mišan a tan-arnu istǝq-qan.
20 Aššer ila tagǝlla tǝnfat,
Ǝnta a z'ihakkin ǝmǝnokal teṭṭay ta tǝzodat.
21 Naftali tenert tǝggoragat
Awjeman win hossaynen ǝnta a tan-tǝtarawat.
22 Yusǝf ǝnezǝr n ašǝk itarawan s igǝt
Illân dagma n aman ǝn šat,
Ilǝdlad-net tǝzzǝgrǝt kul ǝgân-tat.
23 Ǝgrawan-tu kǝl tǝganziwen s igǝt
A tu-naddaban har ǝlan talilant,
Ǝsaknin-tu ǝzzǝngu-nasan s igǝt.
24 Ikna iduf ǝn tǝganzay-net
Tawasasahen zayyan ǝn fassan-net
S ǝfus n Ǝmaqqar wa ǝɣbadaɣ ǝd tanaya-net,
S ǝnta Amadan was ǝheɣ taggast-net,
Imos Tǝhunt n Israyil tas di-tǝkbal assahat-net,
25 Ǝmǝli-nin a kay-ikfan tadhǝlt-net,
Ǝmaqqar wa fall-ak itaggan albaraka-net,
Daɣ tǝnfa n akonak a n jǝnnawan,
D aman win du-gammadnen eres ǝn mǝdlan.
Ikf-ik albaraka igan daɣ tǝla ǝn bararan, ǝd hǝrwan.
26 Abba-nak itattar a igan albarakatan
Ogarnen win marwan-in y-awan,
Afalla n ǝdɣaɣan win ǝrǝwnen okayan-tan.
Yusǝf azzabbenet fall-as albarakatan,
Ǝwǝran tǝkannart-net id ǝnta a imosan
Tafrǝnt daɣ awa ila daɣ mǝdrayan.
27 Benyamin uray iɣišašen
S aɣora ilammaz tagmǝrt-net
Ǝs takǝst ad uzan aglǝz-net."»
28 Ǝntanay da da awalan win dasan-iga abba-nasan assaɣa wa dasan-ittar a tan-ikfan albaraka. Ǝkkullu n iyyan ig-as tǝwatray ǝn man-net. Ǝntanay a daɣ ǝganat tawšeten a n marawat ǝd sanatat n Israyil. 29-30 Dǝffǝr adi omar maddanǝs, inn-asan: «Nak ǝmǝrǝdda tilkamat ǝn tǝɣrǝst-in a ǝhe. As di aba tǝnbǝlam-i ɣur marawan-in daɣ akazam wa ihan tawagost ta n Efron wa n iyyan daɣ Xitatan, tǝhât Makfela dagma n amadal ǝn Mamre daɣ akal wa n Kanan. Tawagost en da a izzǝnza Ibrahim ɣur Efron wa n iyyan daɣ Xitatan fǝl ad iqqǝl akazam wa tat-ihan edag ǝn zǝkwan ǝn nǝmmǝttan-net. 31 Denda ad itawanbal ǝmaraw-nanaɣ Ibrahim ǝd tǝntut-net Sarata, denda harwada ad itawanbal abba-nin Isǝhaq d anna-nin Raqqiyetu, amaran denda ad ǝnbala Leyya. 32 Tawagost d akazam wa tat-ihan Xitatan a ɣur ǝnzân.» 33 As iɣrad Yaqub ammar ǝn maddanǝs iqqal ǝzǝlǝlli-net, tǝga talɣa-net, ilkam i marawan-net.