48
Tǝwatray ǝn Yaqub y Efrayim ǝd Manasay
1 Dǝffǝr adi osa-du awedan Yusǝf inn-as: «Abba-nak ifrây.» Tǝzzar iddew ǝd bararan-net a n ǝššin ǝmosnen Manasay d Efrayim, ikk-ay. 2 Ittǝmal i Yaqub itawann-as: «Barar-nak Yusǝf da a d-osan da y a kay-inǝy». Iga-du Yaqub šiɣurad-net har d-iqqim daɣ tessat. 3 Inna Yaqub i Yusǝf: «Mǝššina di Maqqaran inifalal-i-du daɣ ǝɣrǝm ǝn Luz daɣ akal ǝn Kanan, ikf-i albaraka-net.» 4 Inn-i: «A kay-akfaɣ ǝzzurrǝyya aggen, aga daɣ-ak šimattiwen aggotnen agaɣ akal a daɣ tǝla n ǝzzurrǝyya-nak har faw. 5 Ǝmǝrǝdda bararan-nak win ǝššin tǝgrawa daɣ Masar dat assa-nin, bararan-in a ǝmosan. Wǝr tan-ǝzlaya ǝd Ruben ǝd Šimǝɣon. 6 Amaran bararan win tǝgrawa dǝffǝr win, win di i-nak. Ismawan ǝn mǝqqaran-nasan Manasay d Efrayim as z'ǝgrǝwan adagar-nasan daɣ tǝkasit. 7 Ǝfala-du akal ǝn Mezobotamǝya as daɣ-i aba anna-nak Raxil daɣ akal ǝn Kanan harwa wǝr din-newed Efrata. Denda a tat-ǝnbala fǝl afay ǝn tarrayt n Efrata, aɣrǝm was itawannu ǝmǝrǝdda Betlexem.»
8-10 Amazay wen da a din-iswad Yaqub daɣ maddanǝs ǝn Yusǝf. Ǝnta tǝssirkam tušaray šittawen-net har as ab'as itaggu anay olaɣan. Tǝzzar inna i Yusǝf: «Ma ǝmosan za win di?» Inn-as Yusǝf: «Bararan-in awa, win di-ikfa Mǝššina daɣ akal wa.» Tǝzzar inn-as Yaqub: «Zǝhǝz-i-tan-du a dasan-ǝttǝra a tan-ikfan albaraka.» Izzǝhaz-as-tan-du Yusǝf, a dasan-itamallat Yaqub itizǝlǝmmit-tan. 11 Inna Yaqub i Yusǝf: «Wǝr ǝɣila a kay-ǝlǝsaɣ anay fadda, ǝmǝrǝdda bararan-nak da issǝkn-i-tan Mǝššina.» 12 Ikkas-tan-du Yusǝf daɣ faddan ǝn Yaqub, issǝjad Yusǝf.
13 Tǝzzar idkal-tan Yusǝf, ittaf Efrayim s ǝfus-net wa n ǝɣil fǝl ad iggǝz zalgat ǝn Yaqub, amaran ittaf Manasay s ǝfus-net wa n zalgat fǝl ad iggǝz aɣil ǝn Yaqub, izzǝhaz-as-tan-in. 14 Izzal-du Israyil ǝfus-net wa n ǝɣil issǝwar-tu eɣaf n Efrayim kuddeɣ as ǝnta wa ǝndǝrran. Izammazray ifassan-net fǝlas ǝsǝwǝr a iga wa n zalgat Manasay kuddeɣ as ǝnta wa waššaran.
15 Ittar Yaqub i Yusǝf, inna:
«Ǝmǝli-nin tǝkfeɣ albaraka-nak bararan a,
Ǝmǝli wa ǝɣbadan marawan-in Ibrahim d Isǝhaq,
tǝmosaɣ Ǝmǝli-nin, s ǝnta a di-ogazan
ɣur tǝhǝwt-in har azala.
16 Ǝmǝli s ǝnta a d-issǝglan angalos wa di-ogazan daɣ ǝššur,
Takfaɣet albaraka-nak bararan-nak,
Ǝssudǝranet esǝm-in d ǝsmawan ǝn marawan-in Ibrahim d Isǝhaq,
igatanet wǝllen daɣ ǝddǝnet.»
17 As inay Yusǝf abba-net as issǝwar ǝfus-net wa n ǝɣil eɣaf n Efrayim ikm-ay awen. Tǝzzar ibaz ǝfus n abba-net ikkas-t-idu fǝl aɣaf n Efrayim issǝwar-tu wa n Manasay. 18 Inna Yusǝf y abba-net: «Wǝrge adi abba-nin, wa ǝnta a waššaran! Sǝwǝr ǝfus-nak wa n ǝɣil eɣaf-net.» 19 Mišan ugay-as abba-net. Inn-as: «Ǝssâna barar-in, ǝssâna. Ǝnta da a fall-as tagu tamattay tagget, mišan a das-izar amadray-net taddawla, iqqǝl ǝzzurrǝyya-net šimattiwen aggotnen.»
20 Ǝzǝl wǝdi da a dasan-ittar inna:
«Kǝl-Israyil ad ǝɣarrin ismawan-nawan.
As taggin tǝwatray tolaɣat ad annin:
"Ig-ak Mǝššina adkul wa iga y Efrayim ǝd Manasay"».
Ǝmmǝk wǝdi as izzozar Yaqub Efrayim i Manasay.