Ǝlkǝttab wa n Joswe
1
Abbaz n akal wa n Kanan
Iguz ǝn Joswe edag ǝn Musa
1 Dǝffǝr iba n ǝkli ǝn Mǝššina Musa, inna Amaɣlol y amadhal ǝn Musa igan esǝm Joswe ag Nun: 2 «Akli-nin Musa aba-tu. Daɣ adi ǝnkǝr tǝɣrǝsaɣ agaraw wa n Yordan kay ǝd tamattay a ketnet, tǝggǝzaɣ akal wa ǝkfeɣ maddanǝs n Israyil. 3 Ǝkfeq-qawan ikallan kul win ǝdasan tǝfran-nawan imos adi arkawal ǝn tassaq ǝdkâlaɣ i Musa. 4 Akal-nawan sa sǝr agala, obbaz-du ɣur teneray, har ǝdɣaɣan win Labnan daɣ tamasna. Sa sǝr dǝnnǝg, obaz ɣur agarew wa zǝwwǝran n Efrat immar akal wa n Xitatan, itram har gǝrwan win zawwarnen. 5 Iket tǝddaraɣ wǝr tu-z-imǝl awedan a dak-ifragan, fǝlas ǝlleq-qu dǝr-ǝk s ǝmmǝk was t-ǝlleɣ ǝd Musa. Tadhǝlt-in wǝr fall-ak tat-z-iba har faw. 6 Sǝggǝtǝkkǝt, tileɣ ǝwǝl, fǝlas kay a z'uzanan i tamattay ta akal was ǝdkala arkawal-net y aljadan-nasan. 7 Igd-ak ɣas ad tǝsǝggǝtǝkke tileɣ ǝwǝl, tǝlkâmaɣ y ǝššǝriɣa ketnet was kay omar ǝkli-nin Musa. A daɣ-as wǝr tǝkǝtǝyyeɣ sa wala sa. As iga adi ad tǝnjǝxa daɣ adag kul wa tǝkkeɣ. 8 Ǝlkǝttab di n ǝššǝriɣa wǝr itugaget imi-nak, ɣarr-ay s ǝnnǝzǝr ehad ezal; fǝl ad tǝlkǝmaɣ y arat kul wa daɣ-as iktaban, tammazala sǝr-ǝs. Ǝddi ad tǝnjǝxa daɣ aratan kul, ǝxsǝlan-du sǝr-ǝk. 9 A din-wǝr-tǝttawaɣ as, ǝgmaya daɣ-ak ad tǝsǝggǝtǝkke tileɣ ǝwǝl. A kay-wǝr-tǝgaz tasa, wala tǝɣšǝda, fǝlas nak Amaɣlol, Ǝmǝli-nak ǝlleq-qu dǝr-ǝk daɣ adag kul wa tǝkkeɣ.»
Ǝsǝmmutǝg ǝn Joswe y aɣaras ǝn Yordan
10 Omar Joswe imuzaran ǝn tamattay 11 s ad ilalan iɣawnatan annin i maddanǝs n Israyil: «Agat allawtan-nawan, fǝlas da daɣ har karad adan ad nawǝd agarew wa n Yordan nǝɣrǝs-tu nabǝz akal wa danaɣ-ikfa Amaɣlol Ǝmǝli-nana, nil-ay.»
12 Amaran iššewal Joswe y aytedan ǝn tawšet ta n Ruben ǝd ta n Gad d aganna ǝn ta n Manasay, inn-asan: 13 «Aktiwat awa as kala kawan sǝr-ǝs omar akli ǝn Mǝššina Musa, ɣur tǝnna ta dawan-iga: "Amaɣlol Ǝmǝli-nawan ikf-iwan akal wa n dǝnnǝg ǝn Yordan i tǝmǝxsurt." 14 Šidoden-nawan ǝd bararan-nawan ǝd hǝrwan-nawan ad ǝxsǝran daɣ amadal wa n dǝnnǝg ǝn Yordan. Amaran kawanay a ǝfragnen ǝmǝgǝr tǝttafam tǝzoli-nawan, ad tǝɣrǝsam agarew tahâm eɣaf ǝn maddanǝs n Israyil win hadatnen y a tan-tǝdhǝlam, 15 har ǝbǝzan akal wa n ataram ǝn Yordan s ǝnta a tan-ikfa Amaɣlol Ǝmǝli-nana. As ikfâ Amaɣlol tawšeten n Israyil šin hadatnen edag ǝn tǝmǝxsurt, ǝddi amaran tǝqqǝlam-du tǝxsǝram dada daɣ amadal wa ihan tǝla-nawan. Tǝxyǝzam amadal wada s ǝnta a kawan ikfa akli ǝn Mǝššina Musa daɣ dǝnnǝg ǝn Yordan.»
16 Ǝnnan-as: «Ad nagu arat kul was dana-tomara, nakku edag kul wa dana-tǝssokaɣ. 17 A dak-nakkawan s ǝmmǝk was nǝkkǝwan i Musa. Imǝlet-tu dǝr-ǝk Amaɣlol, Ǝmǝli-nak ǝs tǝmǝwit tas t-illa ǝd Musa. 18 I iqqalan ǝllid-nak, ugay ǝntada s igi n arat a iqqal, was tu-tomara a daɣ-as tǝwǝkkǝsan man. Kay amaran sǝggǝtǝkkǝt ɣas tileɣ ǝwǝl.»