2
Ǝsǝgli wa iga Joswe inagmayan ǝn salan ǝs Yerikaw
1 Iha Joswe, ag ǝn Nun edag as itawannu Šitim as issǝgla, ǝššin meddan daɣ assatar. Ǝgmadan Šittim y a d-ǝnǝyan akal abǝzan-du isalan-net, wǝllen win ǝɣrǝm wa n Yerikaw. Ǝglan, as ewadan Yerikaw ǝssǝganan daɣ ahan ǝn tǝkarwat as itawannu Rahab ǝnsan den da.
2 Ahad wen da a din-ewadan salan ǝmǝnokal ǝn Yerikaw as meddan wiyyad n Israyil osan-du aɣrǝm y ad zǝggǝzdin, abǝzan isalan n akal. 3 Den daɣ a d-issǝgla ǝmazal ǝs Rahab inn-as-du : «Sakn-anaɣ meddan win kam-d-osanen fǝlas ǝšikǝl-nasan wǝr imos ar ad zǝggǝzdin ǝɣrǝdan abbaz ǝn salan n akal.»
4 As iga awen da Rahab tǝssilɣas-in meddan win ǝššin en. Amaran tǝnna i nammazalan n ǝmǝnokal: «Tidǝt as meddan di osân-du ehan-in, mišan wǝr ǝssanaɣ is d ǝhan. 5 Agadal ǝn tǝfuk a ɣur-i matakwayan, daɣ alwaq wad taɣaffal tǝsǝhǝrt n ǝɣrǝm. Wǝr ǝssenaɣ sas ǝkkan. Aglat tarmad a tan-tawǝdam.» 6 Arat wa imosan tidǝt n awen as meddan en tidawt a dǝr-san tǝga Rahab s afalla n ahan-net, tǝssǝlɣas-tan daɣ ammas n agabal ǝn lin as kala da tǝššedaw-tu den. (Note: annabat iyyan olân ǝd kada/jǝxa.)
7 Ǝlkaman-asan nammazalan n ǝmǝnokal. As ǝgmadan nammazalan n ǝmǝnokal aɣrǝm, tǝtawaɣfal-du tǝsǝhǝrt-net. Amaran obazan tarrayt ta tǝkkat tǝzǝzgǝrt ta n Yordan.
8 Rahab amaran, tǝftan afalla n ahan-net harwa wǝr ǝnsen meddan win ǝššin. 9 Tǝnn-asan: «Ǝssanaɣ as Amaɣlol ikf-iwan tǝla n akal a. Tǝgâm-anaɣ ǝsǝrmǝɣ labasan har as ketnana tǝggaz-ana tasa labasat tas akkiyyan daɣ-na igmad-tu ǝwǝl-net. 10 Fǝlas nǝsla as Amaɣlol issǝɣar agaraw wa n telant y ad tǝgrawam aɣaras-net, ɣur agamad-nawan Masar. Nǝsla deɣ as tǝnɣam Sihon d Og ǝmosnen imǝnokalan ǝn taɣmaren šin sanatat n Amoritatan ǝhanen dǝnnǝg ǝn Yordan, tǝhlakam ǝntada awa ǝlan kul. 11 As dana-d-ewadan salan win, nǝrmaɣ wǝllen tǝggaz-ana tasa n a dat-wan nazzakkat. Id Amaɣlol Ǝmǝli-nawan ǝnta a imosan Mǝššina daɣ jǝnnawan imos-tu deɣ fǝl amadal. 12 Ǝmǝrǝdda ǝhǝdat-i ǝs Mǝššina as ad tagim y ahan-nana ǝnattaf olaɣan s ǝmmǝk was dawan-t-ǝggeɣ, tǝdkǝlam-i arkawal n as 13 ad tǝsǝɣɣǝllǝsam abba-nin, d anna-nin, ǝd mǝdrayan-in, ǝd tǝmǝdrayen-in, d awa ǝlan kul, tǝgdǝlam-anaɣ ad nǝtǝwǝnɣu.»
14 Ǝnnan-as meddan: «As dana-tǝstara, wǝdi alwaq wa dana-z-akfu Amaɣlol akal ad nǝssǝbdǝd arkawal wa nǝga, nagu dǝr-ǝm ǝnǝttaf olâɣan. Mǝššina tǝkkâsa daɣ-na iman, as wǝr nǝga awa nǝnna da.»
15 Ehan ǝn Rahab iwat s afarag zagren issohen, wa og̣azan aɣrǝm. Adi a fǝl du-tǝzazzabbat ǝs fǝnetǝr n ahan-net meddan win ǝššin en s aɣan. 16 Tǝnn-asan: «Agliwat ǝlɣǝssat daɣ tǝkašwaren fǝl ad tǝgmǝdam meddan win dawan-sagadnen. Tǝdrǝram den daɣ har karad adan, ǝddi da ǝqqâlan-du. Dǝffǝr adi tabǝzam tarrayt-nawan.»
17 Ǝnnan-as meddan: «Arat fǝl danaɣ-tǝsahadaɣ da iwar-anaɣ s ǝššǝrǝd n as: 18 alwaq wa du-za-nǝbǝg akal a, sǝkkǝrirǝy aɣan a zaggaɣan a daɣ fǝnetǝr was dana-za-tǝzǝzzǝbbe. Tǝššidǝwa daɣ ahan-nam imarwan-nam, ǝd mǝqqaran-nam ǝd mǝdrayan-nam, ǝd tǝmaqqaren-nam ǝd tǝmǝdrayen-nam d aɣaywan-nam ketnet. 19 As d-igmad awedan ehan-nam, wǝdi ǝnta a idkalan fǝl iri-net tamattant-net, nakkanay wǝr dana-tǝwer. Mišan, as t-imal awedan ibagan i ihan ehan-nam, wǝdi nakkanay as tǝwar tamattant-net irawan-nana. 20 Amaran as tǝsaffagga ǝšikǝl-nana, ab-as danaɣ-iwar awa fǝl danaɣ-tǝsahadaɣ.» 21 Tǝnn-asan: «Awalla! Aget awa as tǝnnam.» Tǝzzar tǝssǝgla meddan win ǝššin. Ǝglan ɣas, tǝsakkareray aɣan zaggaɣan daɣ fǝnetǝr-net.
22 Ǝkkan nagmayan ǝn salan šikašwaren šiyyad ǝgan daɣ-asnat karad adan ǝlɣasan, har d-ǝqqalan mǝsǝssǝggal-nasan Yerikaw wǝr tan-d-ǝgrewan. 23 Dǝffǝr awen ǝgmadan-du nagmayan ǝn salan win tǝsǝlɣǝst-nasan, ǝzzǝbben-du šikašwaren, ǝɣrassan agarew wa n Yordan, ǝqqalan-du Joswe ag Nun. Ǝssoɣalan-as ǝlqissat n ǝšikǝl-nasan ketnet. 24 Ǝnnan-as: «Igmad aššak as Amaɣlol iga gǝr fassan-nana akal ketnet. Aytedan-nasan kul tǝh-en tasa-nana wǝllen.»