3
Aɣaras n agarew wa n Yordan
1 As ǝzǝl wa hadan aɣora iggǝlat Joswe ǝd maddanǝs n Israyil ketnasan daɣ adag igan esǝm Šitim ǝnnǝmadan tama n agarew wa n Yordan. Ǝzzǝbben den daɣ iket di a d-itawad ǝzǝl wa daq-qu z'ǝɣrǝsan. 2 As ǝgan karad adan den ǝllilan muzaran ǝn tamattay iɣawnatan 3 ad tamaran maddanǝs n Israyil gannin-asan: «As tǝnayam ǝssǝnduq wa n arkawal ǝn tassaq n Amaɣlol, Ǝmǝli-nawan ewayan-tu limaman ǝn Kǝl-Lebi, taggalem daɣ adag wǝdi tǝlkǝmam-as. 4 Ǝmmǝk wǝdi daɣ as za tǝssǝnam tarrayt ta za tagim, id wǝr kala tewayam tarrayt tǝdi. Mišan, ad wǝr tǝtihazam ǝssǝnduq. Agiwat dǝr-ǝs ǝnǝmǝggag ogdan d ǝddukad n ǝššin gim n ǝɣil.» 5 Inna Joswe i tamattay: «Zǝzdǝgat iman-nawan, fǝlas tufat ad agu Amaɣlol dat šittawen-nawan šijujab wǝr nǝtawazday." 6 Inna Joswe i ilimaman ad ǝdkǝlan ǝssǝnduq n arkawal ǝn tassaq izaran i tamattay. Ǝgan awen da.
7 Inna Amaɣlol i Joswe: "A obazan ɣur azala a kay-aggaɣ awedan iknân ǝtǝwǝsǝɣmar daɣ maddanǝs ǝn Israyil ketnasan! Ad ǝssanan as illeq-qu dǝr-ǝk s ǝmmǝk was kala t-ǝlleɣ ǝd Musa. 8 Kay amaran amǝr ilimaman win ewayan ǝssǝnduq wa n arkawal ǝn tassaq s ad azzakken daɣ tama aman n agarew wa n Yordan, ɣur amazay wa tan-z-ǝggǝzan.»
9 Dǝffǝr adi iššewal Joswe i maddanǝs n Israyil, inn-asan: «Ihazat-du tǝssǝsǝmam y awa inna Amaɣlol Ǝmǝli-nawan 10 ad ǝssǝnam as Mǝššina di idaran illa gar-ewwan, amaran igmad aššak as dat-wan istǝɣ Kananitatan, ǝd Xitatan, ǝd Xifatan, ǝd Fǝrizitatan, ǝd Girgašitatan, d Amoritatan ǝd Yebusatan. 11 Ǝssǝnat as ǝssǝnduq wa n arkawal ǝn tassaq n Ǝmǝli n amadal a ibukan y ad iɣrǝs Yordan dat wa n. 12 Daɣ adi ǝmǝrǝdda sǝnnǝfrǝnat daɣ-wan maraw meddan d ǝššin gǝr tawšeten ǝn maddanǝs n Israyil. Akkiyyat tǝsinnafranam daɣ-as alǝs. 13 Amazay wa da daɣ z'ǝdǝsan tǝfran ǝn ǝlimaman win ewaynen ǝssǝnduq wa n Amaɣlol Ǝmǝli n amadal ketnet agarew wa n Yordan, ǝnta a daɣ z'aqqatas ǝngǝy ǝbdǝdan aman ǝqqǝlan zun taɣǝrt ad tinǝmǝqqilan.»
14 Dǝffǝr awen tǝttǝrkat tamattay y ad tǝɣrǝs Yordan azzaran-as limaman win ewaynen ǝssǝnduq wa n arkawal ǝn tassaq. 15 Awen iga daɣ azzaman ǝn ɣarat s ǝntanay a daɣ d-isafal agarew wa n Yordan har akǝyan aman ǝs tamawen-net. Mišan amazay wa daɣ din-ewadan limaman win ewaynen ǝssǝnduq agarew, ǝdasan tǝfran-nasan aman, 16 ǝnta ad izzǝkkat ǝngǝy. Ǝwaɣan aman daɣ igǝg ǝqqalan zun taɣǝrt, sa sǝr ǝɣrǝm wa n Adam ihan attayan n ǝɣrǝm wa n Sartan. Amaran aman win zagadaynen sa sǝr agaraw wa n ǝsalǝɣ išw-en amadal. Ǝddi ad tǝgraw tamattay aɣaras ǝn Yordan daɣ tǝnǝmiwǝla ǝn Yerikaw. 17 Tǝzzar ǝbdadan limaman win ewaynen ǝssǝnduq wa n arkawal ǝn tassaq n Amaɣlol daɣ ammas n aɣarɣar n agarew har tǝɣras tamattay n Israyil ketnet s afay wen sen iɣateman da wǝr tan-ǝkkesan.