4
Marawat tǝhun ǝd sanatat šin ǝmosnen issǝkta
1 Dǝffǝr as tǝɣrâd tamattay ketnet aɣaras ǝn Yordan, inna Amaɣlol i Joswe: 2 «Ǝkkullu n iyyat daɣ tawšeten šin marawat ǝd sanatat tǝsinafranam daɣ-as alǝs. 3 Meddan win amǝrat-tan s a d-awǝy akkiyyan daɣ-san tǝhunt daɣ adag iman-net wa daɣ ǝbdadan limaman daɣ ammas n aɣarɣar ǝn Yordan. Awǝyanet šihun šin marawat ǝd sanatat a, assansin-tanat daɣ adag wa daɣ za tansim ahada.» 4 Iɣra Joswe maraw meddan d ǝššin win as inna ad tǝwǝsǝnǝfrǝnan daɣ maddanǝs n Israyil, 5 inn-asan: «Akǝyat dat ǝssǝnduq wa n Amaɣlol Ǝmǝli-nawan, takkim ammas n aɣarɣar ǝn Yordan. Akkiyyan daɣ-wan idkǝlet-du daɣ-as tǝhunt fǝl ǝzir-net, fǝl a tu-tǝmǝl tǝhunt iyyadda y akk tawšet. 6 Šihun šin a dawan-ǝqqǝlnat isaktan n awa igan da. Tufat as kawan-ǝsǝstǝnan bararan-nawan d almaɣna-nasnat, 7 tannim-asan: "Ǝmǝzzǝy a ǝgan aman n agarew ǝn Yordan ɣur amazay wad iɣarras ǝssǝnduq wa n arkawal ǝn tassaq n Amaɣlol. Ad ǝqqǝlnat tǝhun šin i maddanǝs n Israyil isaktan har faw n ǝmǝzzǝy wa iga agarew wa n Yordan dat ǝssǝnduq n Amaɣlol."» 8 Tǝzzar ǝkkǝwanan maddanǝs n Israyil y awa as tan-omar Joswe. Ǝdkalan-du meddan win tawasanafrannen marawat tǝhun ǝd sanatat daɣ ammas n aɣarɣar n agarew wa n Yordan. Ǝkkullu ǝn tawšet n Israyil tǝla tǝhunt iga awen s ǝmmǝk was omar Amaɣlol Joswe. Ewayan-tanat ǝssǝnsan-tanat daɣ adag wa daɣ z'ansin ahad wen.
9 Iššedaw Joswe marawat tǝhun ǝd sanatat šiyyad daɣ ammas n aɣarɣar n agarew wa n Yordan, daɣ adag wa daɣ ǝbdadan limaman win ewaynan ǝssǝnduq wa n arkawal ǝn tassaq. Šihun en ǝhanat edag wen har azalada.
10 Ilimaman win ewaynen ǝssǝnduq ǝmǝɣrasan-in ǝbdadan daɣ ammas aɣarɣar n agarew wa n Yordan har alwaq wad tǝga tamattay aratan kul win as tan-omar Amaɣlol ǝs tarrayt ǝn Joswe. Awen daɣ as omar Musa Joswe. Tǝzzar tǝɣras tamattay agarew tarmad. 11 As ǝɣradan aytedan kul aɣaras, ilas ǝssǝnduq n Amaɣlol iguz n aɣaf-nasan ewayan-tu limaman.
12 Meddan ǝn tawšet ta n Ruben ǝd ta n Gad d aganna ǝn tawšet ta n Manasay ǝɣrasan ǝttâfan tǝzoli-nasan, azzaran i maddanǝs n Israyil win hadatnen s ǝmmǝk was tan-omar Musa. 13 Ǝmosan ǝddukad n ǝkkozat tǝmǝrwen n ǝgim n alǝs simatagnen y ǝmǝgǝr. Ǝglan ill-ay dǝr-san Mǝššina ǝgan anamod n azawaɣ wa n Yerikaw. 14 Ǝzǝl wen da ad ikfa Amaɣlol Joswe as tu-sannahalan maddanǝs n Israyil saɣmar. Har t-aba ǝssiɣmaran-tu s ǝmmǝk was ǝssǝɣmaran Musa.
15 Amaran inna Amaɣlol i Joswe: 16 «Amǝr ilimaman win ewaynen ǝssǝnduq wa n tassaq s ad ǝgmadan agarew wa n Yordan.» 17 Tǝzzar omar-tan Joswe s awen da. 18 As ǝɣrasan limaman win ewaynen ǝssǝnduq wa n tassaq Yordan, namaqqalan d aman, issǝfal-du agarew iqqal ǝmmǝk-net wa nad da.
19 Ǝzǝl wa n maraw daɣ tǝllit ta tazzarat daɣ awatay, ǝnta ad tǝɣras tamattay n Israyil agarew wa n Yordan. Ǝzzǝbben daɣ ǝɣrǝm wa n Gilgal iddinnagan i Yerikaw. 20 Amaran šihun šin marawat ǝd sanatat a d-ǝmmǝdkalnen daɣ agarew wa n Yordan, iššedaw-tanat Joswe daɣ ǝɣrǝm wa n Gilgal. 21 Amaran inna Joswe i maddanǝs n Israyil: «Tufat as kawan ǝssǝstanan ǝzzurrǝyya-nawan d almaɣna ǝn tǝhun šin, 22 tǝsassagrim-tan tǝmǝwit tas tǝɣras tamattay n Israyil agarew wa n Yordan, wǝr ǝkkesan wala iɣateman.»