5
1 Ǝslan mǝnokalan ketnasan win Amoritatan ǝxsarnen ataram ǝn Yordan ǝd mǝnokalan win Kanan ǝzdaɣnen tama n agaraw wa zǝwwǝran as Amaɣlol issǝɣar agarew wa n Yordan y ad t-ǝɣrǝsan maddanǝs n Israyil. Tǝggaz-tan tasa ab'as ǝlan iwallan n ad ǝbdǝdan dat maddanǝs n Israyil.
Ǝmǝnkǝd ǝn zerǝyan ǝn maddanǝs n Israyil
2 Azzaman en daɣ ad inna Amaɣlol i Joswe: «Sǝssugu ǝlmošitan ǝganen daɣ tǝhun, tǝsǝmmǝnkǝdaɣ izerǝyan ǝn maddanǝs n Israyil.» 3 Isassaga Joswe ǝlmošitan ǝgananen daɣ tǝhun tǝzzar isammankad maddanǝs n Israyil dagma ǝn tǝkašwart iyyat. Awen daɣ a fǝl das-itawagga esǝm wa n "Tǝkašwart ta n Ǝsǝmmǝnkǝd".
4-5 Azzaman win daɣ ǝgmadan maddanǝs n Israyil Masar, yayyan-nasan kul ǝmminkadan, amaran meddan kul win ewadnen ǝmǝgǝr ǝɣradan ahluk daɣ taneray. Bararan-nasan win ǝhǝwnen daɣ azzaman win ǝgan daɣ teneray wǝr ǝmmǝnkadan. Awen daɣ a fǝl tan-isammankad Joswe. 6 Dǝffǝr agamad ǝn maddanǝs n Israyil Masar, ǝgan ǝkkozat tǝmǝrwen n awatay ǝllilan teneray har as meddan-nasan win ewadnen ǝmǝgǝr, ǝɣradan ahluk, fǝlas tǝmazrǝyt a ǝgan Amaɣlol. Awen daɣ a fǝl ihad Amaɣlol as wǝr tan-z-ayyu ǝnǝyan akal was iga arkawal n ad t-akfu y aljadan-nasan. Akal wen, ingay daɣ-as ǝx ǝd turawat. 7 Daɣ adi bararan-nasan ɣas a oyya Amaɣlol ǝggazan akal wen. Ǝntanay en daɣ a isammankad Joswe, id wǝr ǝmmǝnkadan daɣ azzaman win ǝgan ǝllilan teneray. 8 As ǝɣradan ǝmǝnkǝd, ǝqqiman daɣ ɣawnatan har ǝzzayan.
9 Ǝddi ad inna Amaɣlol i Joswe: «Azalada ǝkkasa fall-awan takarakit n ǝkkǝlu wa tǝgam daɣ Masar.» Awen daɣ a fǝl itawannu y edag di Gilgal s ǝnta as i tawaɣru har azala.
Amud wa azzaran n Akkay daɣ Kanan
10 Azzaman en daɣ a daɣ ǝzzǝbben maddanǝs n Israyil Gilgal daɣ azawaɣ ihan attayan ǝn Yerikaw. Ǝgan amud wa n Akkay ɣur agadal ǝn tǝfuk n ǝzǝl wa n maraw d ǝkkoz ǝn tǝllit. 11 Ǝzǝl wa dǝffǝr wa n ǝmud, ǝtšan imensewan n akal en daɣ ǝmosnen tagǝlla wǝr iha anassakaf d amayoɣ. 12 Aba fall-asan Manna ǝzǝl wad ǝssǝntan teṭṭay ǝn mensewan n akal wa n Kanan. Awatay wen wǝr ǝdderan ar daɣ mensewan ǝdwalnen daɣ akal wen da. (Note: Agamad 16, 1-18)
Assa n ǝmuzar n agan wa n Amaɣlol
13 Ǝzǝl iyyan iha Joswe attayan ǝn Yerikaw, idkal asawad-net ihin-in inây alǝs ibdadan dat-ǝs ilbayan takoba. Ihoz-t-idu Joswe isǝstan-tu inn-as: «Awak iyyan daɣ-naɣ a tǝmosa, meɣ azangaw-nana?» 14 Ijjǝwwab-as-du inn-as: «Wǝr aheɣ win wala win. Nak ǝmuzar n agan n Amaɣlol a mosa, assa-nin dada.» Ǝddi ad issǝjad Joswe daɣ amadal inn-as: «Akli-nak a ǝmosaɣ mas di-tomara mǝšši?» 15 Inn-as ǝmuzar n agan n Amaɣlol: «Ǝkkǝs iɣateman-nak. Edag wa tahe da, edag zǝddigan a imos.» Ikkǝwan-as Joswe.