6
Abbaz wa ǝgan maddanǝs n Israyil aɣrǝm wa n Yerikaw
1 Kǝl-Yerikaw ǝknan aɣafal ǝn tǝsǝhar n ǝɣrǝm-nasan fǝl ad agǝzan iman-nasan daɣ maddanǝs n Israyil. Wǝr t-illa awedan ifragan iguz, wala agamad. 2 Inna Amaɣlol i Joswe: «Ǝssǝn as ǝgeɣ gǝr fassan-nak aɣrǝm wa n Yerikaw harkid ǝmǝnokal-net ǝd magazan-net. 3 Aglu kay ǝd nammagaran ketnasan tagim-du y ǝɣrǝm aɣalay iyyanda. Ǝzǝl kul agiwat-as-du aɣalay iyyanda har sǝdis adan. 4 Ad izaran ǝssa limaman y ǝssǝnduq wa n Amaɣlol. Akkiyyan eway tǝsǝnsǝq tǝgat daɣ asak n akar. Ǝzǝl wa n ǝssa ad tagim ǝssa ɣalayan y ǝɣrǝm, as itaggu awen ilimaman nassaɣan šisǝnsaɣ-nasan šin den. 5 Amazay wa daɣ z'agin anasaɣ ilwâyan i tǝsǝnsaɣ-nasan, ad taggu tamattay ǝkuray n ǝmǝgǝr. Den daɣ ad z'ibǝrǝjjǝt afarag wa ogazan aɣrǝm ǝn Yerikaw. Tǝzzar ǝggǝzan maddanǝs n Israyil ketnasan aɣrǝm. Akk iyyan izzillaɣ dat-ǝs.»
6 Dǝffǝr adi iɣra-du Joswe ilimaman inn-asan: «Ǝdkǝlat fǝl zeran-nawan ǝssǝnduq wa n tassaq n Amaɣlol, izaranet-as ǝssa daɣ-wan win ǝttafnen iskawan.» 7 Tǝzzar inna y agan-net: «Mǝtkǝwayat taggim-du aɣalay iyyanda y ǝɣrǝm. Inammagaran amaran win aɣaf n agan izaranet y ǝssǝnduq wa n Amaɣlol.» 8 As iɣrad Joswe awal, immozal agan-net s awa inna: «Ilimaman win ǝssa ewaynen šisǝnsaɣ šin ǝganen daɣ ǝskawan ǝn karran, ǝglân nassaɣan-tanat dat ǝssǝnduq wa n arkawal ǝn tassaq n Amaɣlol. 9 Inammagaran win aɣaf n agan azzaran y ǝssǝnduq wa n Amaɣlol, ǝlkâman-as win ǝlǝqqam n agan. Wǝr kala ad imaɣattas ǝmǝsli n ǝskawan win, daɣ amazay wad jawanken den.»
10 Amaran omar Joswe tamattay inn-as: «Ad wǝr tagim a imosan ǝkuray n ǝmǝgǝr har alwaq wa kawan-z-amǝraɣ s awen. Anɣiwat tǝrmuq.» 11 Isassag-en-du aɣalay iyyanda y ǝɣrǝm ewayan ǝssǝnduq wa n Amaɣlol, dǝffǝr adi ǝqqalan-du iɣawnatan y ad ansin.
12 As affaw aɣora inkar-du Joswe inna i limaman ad ǝlǝsan adakal n Ǝssǝnduq wa n Amaɣlol fǝl zeran-nasan. 13 Ǝlasan ǝssa limaman wiyyad s akkiyyan ittaf tǝsǝnsǝq abbaz ǝn tarrayt nassaɣan šisǝnsaɣ-nasan, azzaran y ǝssǝnduq n amaɣlol. Azzaran-asan nammagaran win aɣaf n agan. Inammagaran win ǝhanen ǝlǝqqam n agan ǝntanay ǝlkâman y ǝssǝnduq n Amaɣlol. Wa jawanken den, wǝr kala ad imaɣattas ǝmǝsli ǝn tǝsǝnsaɣ. 14 As ǝzǝl wa n ǝššin ǝgan-du aɣalay iyyanda y ǝɣrǝm, tǝzzar ǝqqalan-du iɣawnatan. Ad taggin awen da har sǝdis adan.
15 Ǝzǝl wa n ǝssa ǝnkaran-du harwa aɣôra tǝzzar ǝgan-du ǝssa ɣalayan y ǝɣrǝm, ǝs tǝmǝwit tanad da. Ǝzǝl wen da ɣas ad ǝgan ǝssa ɣalayan y ǝɣrǝm. 16 Ɣur aɣalay-nasan wa n ǝssa, taggin i tǝsǝnsaɣ-nasan anasaɣ ilwâyan as inna Joswe i tamattay: «Agiwat ǝkuray n ǝmǝgǝr! Amaɣlol iga gǝr fassan-nawan aɣrǝm wa. 17 Aɣrǝm d awa t-ihan ketnet ad itǝwǝhlǝk, fǝlas Amaɣlol a tan-iskatan y ǝhluk. Wǝr du-za-nayyu ar Rahab ta n tǝkarwat ǝnta d awa ihan ehan-net ketnet, fǝlas ǝnta a taɣbarat meddan winad nǝssǝgmay isalan. 18 Mišan ǝnkǝdat! Ad wǝr tǝdkǝlam arat waliyyan daɣ awa z'itǝwǝhlǝkan fǝlas as iga adi a du-tawǝyam ǝlmǝssibat ǝd tarazay ǝn maddanǝs n Israyil. 19 Awa imosan, azrǝf, d urǝɣ, d aratan win ǝganen daɣ daroɣ, ǝd tǝzoli ketnasan ad tǝwǝskǝtan y Amaɣlol, tǝwǝggin daɣ adag wa daɣ tiddawan ǝrǝzǝɣan n Amaɣlol.»
20 As ǝnsaɣan limaman šisǝnsaɣ tǝsl-asan tamattay tǝga ǝkuray n ǝmǝgǝr, ibarajjat afarag n aɣrǝm. Alwaq wen daɣ a t-ǝggazan maddanǝs n Israyil: akkiyyan izzǝllaɣ dat-ǝs, ǝbazan-tu. 21 Ǝhlakan aɣrǝm ketnet. Ǝɣradan tenaɣay n awa t-ihan daɣ aytedan, gǝr za meddan wala šidoden, wala tǝmǝdrǝyt wala imɣaran. Ǝɣradan tenaɣay n awa ǝlan daɣ šitan, d ayfad, d ǝzdan.
Oyya Joswe tǝmǝddurt i Rahab
22 Meddan amaran winad n ǝššin issǝgla Joswe da y a du-zǝggǝzdin akal abǝzan-du isalan n ǝɣrǝm wa n Yerikaw inn-âsan: «Aglat ǝggǝzat ehan ǝn Rahab ta n tǝkarwat tǝkkǝsam-tat-du ǝnta d aɣaywan-net ketnet, s ǝmmǝk was das-tǝdkalam arkawal n adi.» 23 Tǝzzar ewayan-du meddan winad issǝgla Joswe Rahab ǝd marwan-net, ǝd mǝdrayan-net ǝd tǝmadrayen-net, ǝd mǝqqaran-net ǝd tǝmǝqqaren-net, d aɣaywan-net ketnet. Ǝgan-tan den i ɣawnatan-nasan, daɣ adag a daɣ ǝhân alxer.
24 Ǝssǝqqadan maddanǝs n Israyil aɣrǝm d awa t-ihan ketnet. Amaran azrǝf, d urǝɣ, d aratan kul win ǝganen daɣ daroɣ ǝd tǝzoli ǝgan-tan daɣ Ahan ǝn Mǝššina. 25 Issǝfsa Joswe Rahab ta n tǝnasbakkat, wǝr das-itawaɣšad arat ǝnta d aɣaywan-net fǝlas kala taɣbar inagmayan ǝn salan win tawasakanen Yerikaw. Tǝzzar tǝxsar daɣ maddanǝs n Israyil; har azala ihayawan-net ǝɣsaran daɣ-san.
26 Azzaman en daɣ a daɣ iga Joswe tarɣǝmt tǝssohet daɣ batu n ǝɣrǝm ǝn Yerikaw. Inna: «Ilɣan Ǝmǝli awedan wa igmayan ad ilǝs akaras n ǝɣrǝm wa. Awedan wǝdi as iɣaz tǝjǝngǝrert ta daɣ z'aɣtu afarag n ǝɣrǝm wǝdi, ad iba aɣafadday-net. As issǝɣta deɣ šisǝhar n afarag wen, ad iba barar-net wa ilkaman ǝs tǝhǝwt.» 27 Illil Amaɣlol i Joswe, tǝga fall-as masnat daɣ akal ketnet.