7
Abakkad d alɣazab n Akan
1 Ǝgan maddanǝs n Israyil abakkad zǝwwǝran imosan ǝmǝdkǝl n aratan win fǝl irɣam Amaɣlol: Alǝs iyyan ǝn tawšet ta n Yahuda, as itawannu Akan wa n ag Karmi, ag Zabdi, ag Zera, a idkalan daɣ aratan win fǝl tǝga tarɣǝmt. Awen da a d-ewayan s Amaɣlol as t-iggaz alham ǝn Kǝl-Israyil.
2 Issǝgla Joswe meddan. Ǝgmadan Yerikaw ǝggǝzzayan s ǝɣrǝm wa n Ay iddinnagan y ǝɣrǝm wa n Betel, ihoz deɣ aɣrǝm wa n Bet-Awen. Omar-tan s a du-zǝggǝzdin abǝzan-du isalan. Ǝgan awa as tan-omar Joswe. 3 Ǝqqalan-t-idu ǝnnan-as : «Wǝr tǝga addararat s ad aglin nammagaran ketnasan ǝbǝgan. Ǝgdan ɣas ǝššin madeɣ karad gim n alǝs. Meddan n ǝɣrǝm wa n Ay wǝr ǝgen igǝt wa fǝl za nassaglu inammagaran-nanaɣ ketnasan.» 4 Tǝzzar, ǝglan ǝddukad ǝn karad gim n alǝs daɣ maddanǝs n Israyil, ǝggǝzzayan s ǝɣrǝm wa n Ay ǝbagan-tu, mišan ǝrzan-tan-du Kǝl Ay. 5 Ǝstaɣan-tan-du ɣur tǝsǝhǝrt n ǝɣrǝm wa n Ay har edag igan esǝm Šebarim. As du-zagadayan ǝnɣan daɣ-san aytedan n aɣrǝm wa n Ay ǝddukad ǝn karadat tǝmǝrwen n alǝs ǝd sǝdis. Tǝkna tamattay n Israyil aɣšud, tǝggaz-tat tasa.
6 Tǝzzar izazzarrat Joswe tabdoq-net, issǝwar amadal eɣaf-net, issǝjad dat ǝssǝnduq wa n Amaɣlol har tǝga tǝdwit. Ǝgan muzaran win hadatnen awen da. 7 Tǝzzar inna Joswe: «Ya Ǝmǝli Mǝššina! Mafǝl dana-du-tǝssǝɣrasa agarew wa n Yordan? Wǝr immǝkkan a dana-tagaɣ gǝr fassan n Amoritatan tayyaɣ-ana nǝtǝwǝnɣu! Ǝnnar taɣimit ɣas a din-nǝga daɣ afay wen sen ǝn tǝsǝssǝngǝyt. 8 Ya Ǝmǝli-nin! Ma z'annaɣ ǝmǝrǝdda dǝffǝr tarazay ta danaɣ-ǝgan zǝnga-nana? 9 Ad aslin Kananitatan ǝd tǝmattiwen šin hadatnen n akal adi agin fall-anaɣ eɣaf assabin tamayyamayt-nana. Ǝmǝrǝdda mǝni tǝmǝwit ta za tǝsǝttǝdda taɣmar-nak?»
10 Ijǝwwab Amaɣlol i Joswe inn-as : «Ǝnkǝr. Mǝni ǝddǝlil n ǝssǝjǝd a nak da? 11 Maddanǝs n Israyil ǝgan abakkad imosan iba n ǝsǝbdǝd n arkawal wa dǝr-san namagga d adakal n aratan win fǝl dasan-ǝrɣama, okaran-tan ǝgan-tan daɣ lalan-nasan, ǝgmayan-du a di-akkarrasan. 12 Awen daɣ a fǝl tan-za-razzin zǝnga-nasan. Kalar ǝdǝggǝg a dasan-za-taggin, ǝqqǝlan ares n ǝhluk. Wǝr ilkem a kawan ǝdhalaɣ iket wǝr tǝddǝgdagam aratan win fall-awan ǝrɣama.
13 Ǝmǝrǝdda aglu sǝmmutǝg tamattay y ad dǝr-ǝs ammanaya. Amǝr-tat s ad tǝzzǝzdǝg i tufat, fǝlas ǝnta da awa inna Amaɣlol Ǝmǝli n Israyil: "Ǝllan ɣur-wan aratan win as dawan-ǝrɣama fǝl adakal-nasan, wǝr ilkem ad tǝfragam terazay ǝn izǝnga-nawan iket wǝr tǝkkesam aratan di daɣ man-nawan. 14 Tufat aɣora, a dat-i tǝbdǝdam ǝs tawšet tawšet. Tawšet ta ǝɣre a du-tihaz s ǝɣrǝf aɣrǝf. Aɣrǝf wa ǝɣreɣ a d-ihaz s aɣaywan aɣaywan. Meddan n aɣaywan wa ǝɣreɣ a d-ihazan s iyyan iyyan. 15 Ad assakna awedan wa ittafan aratan win fǝl tǝga tǝrɣǝmt. Ad itǝwǝgǝr daɣ tǝmsay, ǝnta d awa ila ketnet, fǝl ǝddǝlil n ǝsaɣǝtǝs wa iga y arkawal ǝn tassaq wa dǝr-wan namadkalaɣ. Igâ tǝmǝtǝkwǝyt tǝsifallasat Israyil."»
16 As affaw aɣora n ǝzǝl wa hadan isassaɣra-du Joswe maddanǝs n Israyil, ǝs tawšet tawšet. Tǝtawaɣra tawšet ta n Yahuda. 17 Isassaɣra-du tawšet ta n Yahuda s aɣrǝf aɣrǝf. Iɣra Joswe aɣrǝf wa n Zera. Isassaɣr-ay-du s aɣaywan aɣaywan, itawaɣra aɣaywan wa n Zabdi. 18 Isassaɣra-du Joswe meddan n aɣaywan wa n Zabdi, itawaɣra Akan wa n ag Karmi. 19 Inn-as Joswe: «Barar-in, kud tǝssanaɣ Amaɣlol Ǝmǝli n Israyil, are daɣ-ak a di-tǝmǝla tidǝt, tǝmǝlaɣ-i awa tǝgeɣ, a di-wǝr-tǝɣbǝra wala.»
20 Inn-as Akan: «Tidǝt as nak a igan abakkad ǝmmǝzraya tǝnna n Amaɣlol, Ǝmǝli n Israyil! 21 Ǝnta da awa ǝgeɣ: anay a ageɣ daɣ ǝrrǝzǝɣ wa itawašadawan ǝbǝrnuz ihossayan n akal wa n Šinar ǝd sanatat tǝmad ǝn tafelt n ǝzrǝf ǝd tǝbǝlulǝq n urǝɣ, tǝggaz-tan ǝnnǝyat-in ǝdkalaq-qan. A tan-in-tagǝzam ǝnbalan daɣ ammas n ehan-in, illa daw-san ǝzrǝf.» 22 Issoka Joswe meddan ahan n Akan. Ozalan, ogazan-tan-in ǝnbalan daɣ ammas n ahaket illa daw-san ǝzrǝf isammaklal sǝr-san awen. 23 Ǝqqaban-du dǝr-san ewayan-tan-du ǝs Joswe ǝd maddanǝs n Israyil. Ǝssǝnsan-tan dat ǝssǝnduq n Amaɣlol. 24 Inkar Joswe ǝd maddanǝs n Israyil obazan Akan. Ǝdkalan-du azrǝf d ǝbǝrnuz ǝd tǝbǝlulǝq n urǝɣ. Obazan-du ǝntada bararan-net ǝd tǝbararen-net ǝd šitan-net, d ǝzdan-net d ayfad-net ǝd wǝlli-net d ahaket-net ǝd lalan-net win hadatnen ketnasan. Ewayan-tan s aɣlal wa n Akor.
25 Tǝzzar inna Joswe y Akan : «Kay a imosan ǝssǝbab n ǝlmǝssibat ta fall-anaɣ tudat! Azalada kay a fǝl z'aggadlu Mǝššina ǝlmǝssibat.» Tǝzzar ǝnkaran maddanǝs n Israyil ketnasan ǝnɣan-tu ǝs tǝhun. Ǝgan awen da y aɣaywan-net, ǝssǝqqadan-tan. 26 Tǝtawašadaw fall-as tǝdǝbǝyyǝka zǝwwǝrat ǝn tǝhun. Igmad alham Amaɣlol issoraf i maddanǝs n Israyil. Tǝdǝbǝyyǝka ta, har azala tǝll-ay, ǝnta a fǝl iga adag en esǝm "aɣlal wa n Akor".