8
Abbaz n aɣrǝm wa n Ay
1 Inna Amaɣlol i Joswe: «A kay wǝr tǝggǝz tasa wala tǝɣšǝda. Aglu idaw ǝd nammagaran ketnasan tǝbǝgam aɣrǝm wa n Ay. Ǝssǝn as ǝgeɣ gǝr fassan-nak ǝmǝnokal n ǝɣrǝm wa n Ay ǝd tamattay-net, d ǝɣrǝm-net d akal-net. 2 Ad tagaɣ y ǝɣrǝm wa d ǝmǝnokal-net zun awa as kala a tu-tǝgeɣ y ǝɣrǝm wa n Yerikaw d ǝmǝnokal-net. Mišan daɣ taklat ta ǝdkǝlat kay ǝd nammagaran-nak ǝrrǝzǝɣan win daɣ-as in-za-tagǝzam ǝganen daɣ aratan ǝd hǝrwan. Sǝmmutǝgat y a tan-du-tǝɣdǝram sa sǝr ǝlǝqqam n ǝɣrǝm.»
3 Isammatag Joswe ǝnta d agan-net y ad ǝbǝgan aɣrǝm wa n Ay. Isannafran karadat tǝmǝrwen n ǝgim n alǝs win ǝlanen ǝwǝl, issǝgl-en ehad, 4 ig-asan ammaran a daɣ-san inna: «Agliwat tǝlɣǝsam daɣ ǝlǝqqam n aɣrǝm, daɣ ihǝz-net tǝššidǝwam y a tu-tǝbǝrǝqqem. 5 Nak ǝd meddan-in amaran, a din-nihaz nagu anamod n aɣrǝm wa n Ay. As d-ǝqqǝban aytedan n ǝɣrǝm wa n Ay y a dǝr-naɣ ammagaran, a dat-san nazǝl s ǝmmǝk wanad daɣ azzaran da. 6 Ad ǝggǝzan ǝdǝriz-nana, nǝssǝlǝl-tan har nugag ǝɣrǝm. Ǝddi ad ardin as ǝdǝggǝg a dasan-nǝga ǝs tǝmǝwit tanad da. 7 Alwaq wǝdi kawanay ǝggǝdat-du daɣ adag wa daɣ dasan-tǝbakammem, y ad tǝbǝzam aɣrǝm, fǝlas Amaɣlol Ǝmǝli-nawan ad t-agu gǝr fassan-nawan. 8 As tǝbazam aɣrǝm tǝsǝbbǝlǝglǝgam-tu s ǝmmǝk was kawan-omar Amaɣlol. Tǝlkǝmam y alwajiban-in s ǝlluɣ.»
9 Issǝgla Joswe inammagaran y ad bǝkǝmmen daɣ ataram n ǝɣrǝm wa n Ay gar-es ǝd wa n Betel. Ǝnta amaran insa ɣur nammagaran win d-ǝqqimnen. 10 As affaw ǝzǝl wa hadan iššodan Joswe inammagaran harwa aɣora win sammatagnen y ǝmǝgǝr. Tǝzzar iggaz eɣaf-nasan, ǝnta ǝd muzaran ǝn maddanǝs n Israyil, ǝkkan aɣrǝm wa n Ay. 11 Ǝglan nammagaran ketnasan win dǝr-ǝs ǝddewnen har tǝnǝmiwǝla ǝn tǝsǝhǝrt n ǝɣrǝm. Ǝzzǝbben daɣ tamasna-net, illa ǝɣlal gar-essan d aɣrǝm.
12 Isannafran Joswe ǝddukad ǝn sǝmmos gim n alǝs inn-asan ad bǝkǝmmen daɣ ataram n ǝɣrǝm wa n Ay, gar-es ǝd wa n Betel. 13 Ǝzzǝbben nammagaran win ǝddewnen ǝd Joswe daɣ tamasna n aɣrǝm wa n Ay. As iga awen da aganna wahadan ǝn nammagaran bikammen daɣ ataram-net. As igla ahad ikka Joswe ǝd nammagaran-net ammas n ǝɣlal.
14 As affaw, aɣôra iswad ǝmǝnokal n ǝɣrǝm wa n Ay inay maddanǝs n Israyil, igmad-du aɣrǝm tarmad ǝnta ǝd nammagaran-net ketnasan fǝl ad dǝr-san ammagaran. Ǝnnǝmadan edag wa nad da daɣ ǝmmǝgaran sa sǝr ǝɣlal wa n Yordan. Idrâg-asan as maddanǝs n Israyil bikammen-asan y a tan-d-ǝggǝzan sa sǝr ǝlǝqqam. 15 Issǝkna Joswe ǝd maddanǝs n Israyil as ǝdǝggǝg a dasan-ǝgan sa sǝr taneray. 16 Inna ǝmǝnokal n Ay i meddan-net a dasan-ǝlkǝman. Tǝzzar ǝssǝlalan-tan maddanǝs n Israyil har tan-ǝssǝgagan aɣrǝm. 17 Ǝglan meddan kul win Ay ǝlkaman i maddanǝs n Israyil. Iqqim d ǝɣrǝm wa n Ay ǝd wa n Betel wǝr t-illa i tan-ogâzan.
18 Ǝddi daɣ ad inna Amaɣlol i Joswe: «Izzǝl allaɣ-nak daɣ anamod n ǝɣrǝm wa n Ay, fǝlas aytedan n akal di ǝgeq-qan gǝr fassan-nak.» Iga Joswe awa das-inna Amaɣlol. 19 Amazay wad izzal ǝfus-net, ǝnta ad t-oggan maddanǝs n Israyil win bakammatnen sas ǝlǝqqam, ǝggadan-du ǝggazan aɣrǝm. Ǝrzan-tu ǝntasan-tu tarmad.
20 As din-ǝswǝdan, meddan n ǝɣrǝm wa n Ay dǝffǝr-san ǝhinan-in oggan ǝhu igammad-du aɣrǝm-nasan. Ab'as dasan-t-illa agamad sa wala sa, fǝlas Joswe ǝd maddanǝs n Israyil winad tan-ǝssǝknanen as ǝdǝgǝgan-asan sa sǝr taneray, malallayan-tan-du. 21 As inay Joswe ǝd meddan-net imidawan-nasan win bakammatnen daɣ ǝlǝqqam n ǝɣrǝm as ǝrzan aɣrǝm wen ǝntasan daɣ-as temsay ǝqqalan-du daɣ ǝdǝriz-nasan, ad naqqin Kǝl-Ayi. 22 Ǝfalan-du maddanǝs n Israyil win hadatnen aɣrǝm fǝl a dǝr-san amagaran ǝntanay da. Fataqqen aytedan n ǝɣrǝm wa n Ay gǝr maddanǝs n Israyil tawanɣan ketnasan. Wǝr t-illa i daɣ-san igmadan wala i daɣ-san idaran, 23 ar ǝmǝnokal n Ay a d-ittirmasan immeway-du ǝs Joswe.
24 Ǝhǝlakan maddanǝs n Israyil izǝnga-nasan daɣ ammas n ǝsuf daɣ adag wanad daɣ tan-ǝstaɣan. Dǝffǝr adi ǝqqalan-du aɣrǝm wa n Ay, sakkasawan awa d-iqqiman daɣ aytedan. 25 Aytedan n Ay ketnasan a ǝmmutnen ǝzǝl wǝdi. Ǝmosan ǝddukad ǝn maraw gim n awedan d ǝššin gǝr meddan ǝd tǝdoden. 26 Immǝɣras-in Joswe izzal allaɣ-net sa sǝr anamod n ǝɣrǝm wa n Ay har alwaq wad tǝɣrad tamattay n Ay ketnet tamattant. 27 Mišan daɣ tǝšikǝlt ta, maddanǝs n Israyil ǝdkalan aratan ǝd hǝrwan kul win ǝhanen aɣrǝm wa n Ay s ǝmmǝk was omar Amaɣlol Joswe.
28 Issǝqqad Joswe aɣrǝm wa n Ay iqqal imijar har azala. 29 Ǝmǝnokal n Ay amaran iššolay-tu Joswe ašǝk har tǝga takǝst. Ɣur agadal ǝn tǝfuk omar Joswe s a du-tǝtǝwǝzǝzǝbbǝt tǝfǝkka n ǝmǝnokal tǝtǝwǝgǝr-in dǝgman n tǝsǝhǝrt n ǝɣrǝm. Tǝtawagga fall-as tǝdǝbǝyyǝka zǝwwǝrat ǝn tǝhun ǝs har azalada tǝll-ay.
Teɣaray n ǝššǝriɣa fǝl a falla n adɣaɣ wa n Ebal
30 Dǝffǝr awen issǝkras Joswe edag ǝn tǝkutawen y Amaɣlol Ǝmǝli n Israyil fǝl afalla n adɣaɣ wa n Ebal. 31 Issǝkras-tu Joswe s ǝmmǝk was omar ǝkli ǝn Mǝššina Musa maddanǝs n Israyil. Issǝkras-tu ǝs tǝmǝwit ta tǝktabat daɣ ǝlkǝttab wa n ǝššǝriɣa ǝn Musa, tǝmosat as: «Edag ǝn tǝkutawen igan daɣ tǝhun ǝs wǝr kala a tanat-idas arat.» Amaran tawagganat tǝkutawen šin tirǝkǝmmitnen ǝd šin tassaq y Amaɣlol. 32 Den daɣ ad isaggalat Joswe fǝl tǝhun ǝššǝriɣa iman-net wa da iktab Musa, dat šittawen ǝn maddanǝs n Israyil ketnasan. 33 Maddanǝs n Israyil ketnasan gǝr ǝɣmara-nasan, ǝd muzaran ǝn nammagaran-nasan, ǝd mašraɣan-nasan ǝd naftaɣan win dǝr-san namaɣsarnen ǝbdâdan fǝl ǝššin gannatan n ǝssǝnduq wa n arkawal ǝn tassaq n Amaɣlol. Nimaswadan ǝd limaman ǝn kǝl Lebi win tawaynen ǝssǝnduq. Aganna-nasan iyyan za, ǝkfân šigǝrgas y ǝdɣaɣ wa n Garizim, aganna wa hadan amaran ikfa šigǝrgas y ǝdɣaɣ wa n Ebal. Awen daɣ as kala a sǝr-ǝs omar Musa, akli ǝn Mǝššina fǝl a d-azzabbat albaraka fǝl maddanǝs n Israyil.