9
Tǝkǝrrest ta ǝgan aytedan win Gabawun i maddanǝs n Israyil
1 Imǝnokalan kul win ahanen ikallan win ataram n agarew wa n Yordan ǝslan as aɣrǝm wa n Yerikaw ǝd wa n Ay ǝdǝgdagan-tan maddanǝs n Israyil. Imǝnokalan win den ǝmosan win azzarnen y akal wa wa n ǝdɣaɣan ǝd win azzarnen y akal wa irasan daw ǝdɣaɣan, ǝd win azzarnen y azawaɣ wa illilan efay n agaraw wa zǝwwǝran har ǝdɣaɣan win tamasna ǝn Labnan. Imǝnokalan win azzaran i tawšet ta n Xitatan ǝd ta n Amoritatan ǝd ta n Kananitatan ǝd ta n Ferizitatan ǝd ta n Xiwitatan ǝd ta n Yebusatan. 2 Ǝgan eɣaf fǝl ad ammagaran ǝd Joswe ǝd maddanǝs n Israyil.
3 Aytedan n ǝɣrǝm wa n Gabawun ǝgânen daɣ tawšet ta n Xiwitatan, ǝslăn ǝntanay da awa iga Yoswe y ǝɣrǝm wa n Yerikaw ǝd wa n Ay. 4 Namannakan ǝntanay da y ad akkarrasan maddanǝs n Israyil. Ǝgan-asan tǝmǝrkest tǝmosat as ǝssǝglan wiyyad daɣ-san ǝggigganen ǝzdan-nasan isumad ǝmmindanen ǝd gǝdad n aman n alɣanab ǝkkizamnen. 5 Ǝzlâgan irakkan, ǝsâlan ifǝkal, ewayan tagǝlla tǝqqurat, tǝmosat ikǝrǝzzan. 6 Tǝzzar ǝkkan-du iɣawnatan ǝn Kǝl-Israyil win Gilgal ǝnnan i Joswe ǝd maddanǝs n Israyil: «Akal iggûgan a du-nǝfal fǝl a daɣ-wan nǝgmǝy tassaq n alxer.» 7 Ǝnnan maddanǝs n Israyil i Xiwitatan: «Mijas tǝxsaram dǝgma-nanaɣ da daɣ? Kud za awen a igan, wǝr danaq-qu-tǝlla tassaq dǝr-wan.» 8 Ǝnnan i Joswe: «Nǝgâr iri y ad nǝqqǝl eklan-nak.» Issǝstan-tan Joswe inn-asan: «Ma tǝmosam? Mǝnid du-tǝfalam?» 9 Ǝnnan-as: «Nakkanay eklan-nak, a d-ǝfalnen akal iknan igǝg fǝlas tesalay a nǝga igitan n Amaɣlol Ǝmǝli-nak. Nǝssan fǝl aratan kul win iga daɣ Masar, 10 nǝssan deɣ fǝl win iga i mǝnokalan win ǝššin n Amoritatan win ǝxsarnen daɣ afay wen sen n agarew wa n Yordan, a tan-imosan wa n Sihon ǝmǝnokal ǝn Xešbon, d Og wa n ǝmǝnokal n amadal ǝn Bašan iɣsâran daɣ ǝɣrǝm n Aštǝrot. 11 Adi a fǝl danaɣ-ǝnnan ǝmɣaran-nana, ǝd tamattay-nanaɣ ketnet s ad nagu allawtan win tarrayt fǝl a dǝr-wan nammanay. Ǝnnan-anaɣ a dawan-nannu: "Nǝrda s ad nǝqqǝl eklan-nawan amaran nǝgmay daɣ-wan tassaq n alxer." 12 Ǝswǝdat daɣ tǝgǝlla-nanaɣ! Harwada tǝkkus as dǝr-ǝs du-nǝfal iɣawnatan-nana nǝkk-iwan-du! Eges tǝɣrad taɣart tǝqqal ikǝrǝzzan! 13 Ibǝyaɣ win aynayan alwaq wa tan-du-nǝdnay aman n alɣanab ǝkkizamnen! Mišan ǝmǝrǝdda ǝntanay da ǝzzǝrratnen da! Tabdoq-nanaɣ ǝd ɣateman-nanaɣ ǝntanay da ǝmmǝndan fǝl igǝg n adag wa du-nǝfal.»
14 Tǝzzar zaggazdan muzaran n Israyil allawtan n aytedan ǝn Gabawun, da wǝr ǝssomaran tanat Amaɣlol fǝl ad ǝssǝnan tidǝt n awen. 15 Inamarda dǝr-san Joswe inamagga dǝr-san tassaq n alxer s ǝnta a tǝlmanat tǝmǝddurt-nasan. Tǝzzar ǝhadan-asan muzaran ǝn tamattay n Israyil as wǝr z'ammazrayan tassaq ten.
16 As ǝgan maddanǝs n Israyil karad adan dǝffǝr tassaq ta dǝr-san namaggan da, ǝslan as zaɣnin imahharagan-nasan a mosan. 17 Tǝzzar obazan maddanǝs n Israyil tarrayt, as ǝzǝl wa n karad ewadan šiɣarmaten šin daɣ ǝxsaran aytedan win Gabawun a tanat-imosan: Gabawun, Kefira, Berot ǝd Kirǝyat-Yeɣarim. 18 Dǝr iga awen da wǝr tan-ǝnɣen maddanǝs n Israyil fǝlas imuzaran ǝn tamattay n Israyil a dasan-ǝhadnen dat Amaɣlol Ǝmǝli n Israyil. Awen daɣ a fǝl ǝssoɣalan maddanǝs n Israyil ketnasan tǝgna imuzaran-nasan. 19 Ǝnnan-asan muzaran kul: «Wǝr danaɣ-t-illa ad nagu ark arat y aytedan win Gabawun fǝlas nahad-asan dat Amaɣlol Ǝmǝli n Israyil. 20 Iwar-anaɣ a tan-nayyu da wǝr tan-nǝɣa fǝl ǝddǝlil ǝn tǝhuday ta dasan-nǝga. As wǝr iga adi a du-nawǝy s Amaɣlol ad t-iggǝz alham-nana. Ǝnta da awa dasan-za-nagu: 21 a tan-nayyu da wǝr tan-nǝnɣa, mišan a tan-nǝsǝnnǝttǝf d aɣatas n eškan, d akator n aman i tamattay ketnet n Israyil.» Awen daɣ a imosan tanat ǝn muzaran.
22 Isassaɣra-du Joswe aytedan ǝn Gabawun inn-asan: «Mǝni ǝddǝlil wa fǝl danaɣ-tǝgam tǝkǝrrest ta. Tǝssodafam-anaɣ as tǝfâlam-du igǝg, ǝnta kawanay tǝɣsaram dagma-nana dada. 23 Ǝmǝrǝdda tǝwar-kawan tulɣant. Ǝmmǝk a tǝmosam as za tǝqqǝlam eklan har faw a za ɣattasnen eškan, kattaran d aman y ahan n Ǝmǝli-nin Mǝššina.» 24 Ǝnnan-as aytedan ǝn Gabawun: «Ǝntada ǝddǝlil wa fǝl nǝga adi : tesalay a nǝtag as Amaɣlol Ǝmǝli-nak omar akli-net Musa s a kawan-akfu akal wa ketnet. Inn-awan deɣ ad tǝhǝlǝkam tamattay kul ta tu-tǝhat iket tǝglam-du. Tǝzzar tǝgaz-anaɣ tasa-nawan labasat, nǝksud fǝl man-nana. 25 Ǝmǝrǝdda, nakkanay da gǝr fassan-nak da. Ag-anaɣ arat was ɣur-ǝk iga as ikna, oɣad.»