10
Ǝtǝwǝrza ǝn mǝnokalan win Amoritatan
1 Azzaman en da a daɣ isla Adoni-Sedek wa n ǝmǝnokal ǝn Yerusalam as Joswe ibaz aɣrǝm wa n Ay iɣrad-tu ahluk. Ig-as ǝnta d ǝmǝnokal-net ahluk wa iga y ǝɣrǝm wa n Yerikaw d ǝmǝnokal-net. Isla deɣ tassaq n alxer ta tu-tǝmalat gǝr aytedan ǝn Gabawun ǝd maddanǝs n Israyil, namaɣsaran dǝr-san. 2 Isalan win ǝqqalan arat issirmaɣan wǝllen aytedan win Yerusalam, fǝlas aɣrǝm wa n Gabawun a ogaran aɣrǝm wa n Ay. Amaran imos deɣ arat daɣ ɣǝrman win issohatnen daɣ kallan en. Wǝr t-iha ar inammagaran win tǝfrǝnt.
3 Awen daɣ a fǝl issǝgla Adoni-Sedek inammazalan ǝs Hoham wa n ǝmǝnokal ǝn Xebron, ǝd Firam wa n ǝmǝnokal ǝn Yarmut ǝd Yafiya wa n ǝmǝnokal ǝn Lakiš, ǝd Debir ǝmǝnokal n Eglon. Inn-asan-in: 4 «Agliwat-du tilalam-i s ad nǝbǝg Gabawun, fǝlas tamattay-net a tǝgat tassaq n alxer ǝd Joswe ǝd maddanǝs n Israyil.» 5 Ǝmmǝnayan mǝnokalan win sǝmmos n Amoritatan ǝmosnen: ǝmǝnokal wa n Yerusalam ǝd wa n Xebron ǝd wa n Yarmut ǝd wa n Lakiš ǝd wa n Eglon. Ǝgan eɣaf ǝglan-du ǝntanay ǝd nammagaran-nasan ketnasan ǝgan afarag i Gabawun, inta ǝmǝgǝr.
6 Tǝzzar ǝssǝglan-du aytedan ǝn Gabawun inammazalan ǝs Joswe daɣ ɣawnatan win Gilgal ǝnnan-as-du: «Ad wǝr tayyaɣ eklan-nak. Agla-du tarmad tilalaɣ-ana, fǝlas imǝnokalan n Amoritatan win ǝxsarnen idɣaɣan ketnasan ǝgan fall-anaɣ eɣaf.»
7 Tǝzzar igmad Joswe Gilgal iddew ǝd nammagaran win tǝfrǝnt d agan-net ketnet. 8 Dǝffǝr adi inna Amaɣlol i Joswe: «A kay wǝr tǝggǝz tasa-nasan, fǝlas a tan-agaɣ gǝr fassan-nak. Wǝr tan-iha iyyanda a dak-z-ifrǝgan.»
Terazay ǝn maddanǝs n Israyil Amoritatan ǝnɣan imǝnokalan-nasan win sǝmmos
9 Ifal Joswe ǝnta ǝd nammagaran-net Gilgal. As ǝgan ahad iɣradan jiwanken, ǝɣdaran in Amoritatan. 10 Izawwazawaz Amaɣlol Amoritatan dat maddanǝs n Israyil; ǝgan-asan terazay labasat daɣ attayan ǝn Gabawun. Ǝstaɣan-tan ǝbazan dǝr-san Amoritatan tarrayt ta tǝggǝzzayat ǝs Bet-Xoron imosan aɣrǝm iwaran afalla, a tan-naqqin maddanǝs n Israyil har tan-ǝggǝdlan daɣ ǝɣrǝm wa n Azeka ǝd wa n Makeda. 11 Ǝddǝggagan Amoritatan dat maddanǝs n Israyil, okayan Amoritatan Bet-Xoron zagadayan. Iffay fall-asan Amaɣlol akonak ǝn dagrazan zawwarnen har ewadan aɣrǝm wa n Azeka. Aba daɣ-san a aggen. Ogar awa ǝnɣan dagrazan daɣ aytedan y awa ǝnɣan maddanǝs n Israyil.
12 Ǝzǝl wad iga Amaɣlol Amoritatan gǝr fassan ǝn maddanǝs n Israyil, onsay Joswe Amaɣlol dat šittawen ǝn maddanǝs n Israyil ketnasan, inna :
«Tǝfuk zakkat dǝnnǝg Gabawun! Tallit kam zakkat dǝnnǝg ǝɣlal wa n Ayalon!» 13 Tǝzzǝkkat tǝfuk ǝd tǝllit har tǝrza tamattay n Israyil izǝnga-net; s ǝmmǝk was iktab awen daɣ ǝlkǝttab wa n Jašǝr, almaɣna alxaq.
Tǝzǝkat tǝfuk daɣ ammas ǝn jǝnnawan har tǝga ǝddukad n ǝzǝl iɣradan wǝr tǝgmed edag-net. 14 Wǝr kala dat adi, wala dǝffǝr-ǝs ǝd iga ǝzǝl olan ǝd wǝdi, n as iqbal Amaɣlol arat zund wen daɣ-as igmay aggadǝm. Amaɣlol iman-net a immǝgaran fǝl ǝddǝlil ǝn maddanǝs n Israyil.
15 Dǝffǝr adi iqqal-du Joswe iddew ǝd maddanǝs n Israyil ketnasan ǝs ɣawnatan win Gilgal.
16 Harwada iga ǝmǝgǝr as ǝddǝggagan mǝnokalan win sǝmmos ǝlɣasan daɣ akazam wa n Makeda. 17 Itawanna i Joswe imǝnokalan win sǝmmos ǝlɣasan daɣ akazam. 18 Omar Joswe meddan-net inn-asan : « Aglat, sǝɣɣǝrurǝdat šihun zawwarnen s ǝmi n akazam tǝsǝbdǝdam dat-ǝs imagazan. 19 Mišan ad wǝr tǝllulem den ketnawan, ǝlkǝmat i zǝnga-nawan tǝwǝɣam-asan tarrayt fǝl a dasan-tǝgdǝlam ad awǝdan iɣǝrman-nasan. Id Amaɣlol Ǝmǝli-nawan ig-en daɣ fassan-nawan.»
20 Tǝzzar iga Joswe ǝd maddanǝs n Israyil terazay tǝkmalat y Amoritatan har as wǝr daɣ-san d-iqqim awedan iddaran ar win ǝddǝggagnen ǝs ɣǝrman-nasan win ǝgdalan fǝrgan ǝhhokatnen wǝllen ǝn tǝhun. 21 Dǝffǝr adi ǝqqalan-du maddanǝs n Israyil ketnasan daɣ alxer. Ǝkkan-du Joswe daɣ ɣawnatan ahanen dǝgman Makeda. Wǝr t-illa awedan daɣ akal en ihalan a sǝr-san annu ark arat.
22 Dǝffǝr adi omar Joswe s ad tǝwǝkkǝsnat tǝhun šin ǝharnen akazam, tǝwǝsǝrdǝɣan-du mǝnokalan win sǝmmos n Amoritatan ammawayan-du sǝr-ǝs. 23 Itawagga awa as omar Joswe. Ǝmmewayan-du sǝr-ǝs mǝnokalan win sǝmmos a tan-imosan: wa n Yerusalam ǝd wa n Xebron ǝd wa n Yarmut ǝd wa n Lakiš ǝd wa n Eglon. 24 As d-ǝmmewayan mǝnokalan win ǝs Joswe, isassaɣra-du meddan n Israyil. Inna i muzaran ǝn nammagaran win t-ǝdhalnen daɣ ǝmǝgǝr: «Ayewat, kukǝlat irawan ǝn mǝnokalan win.» Ǝgan awen da.
25 Ilas Joswe inn-asan: «A kawan wǝr tǝggǝz tasa wala tǝɣšǝdam, sǝggǝtǝkkǝtat tillem iwallan, id ǝmmǝk a daɣ a z'agu Amaɣlol i zǝnga-nawan kul win dǝr za tammagaram.»
26 Dǝffǝr adi isassanɣa Joswe imǝnokalan win; išaššalay šifǝkkawen-nasan daɣ sǝmmos eška har agadal ǝn tǝfuk. 27 Ǝddi amaran ad omar Joswe sa du-tǝwǝzǝzǝbǝtnat tǝfǝkkawen-nasan tǝwǝgǝrnat daɣ akazam wanad daɣ ǝlɣasan. Tǝzzar ǝdbaɣan imi-net ǝs tǝhun zawwarnen as har azala ǝllanat den.
Abbaz ǝn Joswe ikallan win agala
28 Ǝzǝl wen daɣ ad obaz Joswe aɣrǝm wa n Makeda, inɣa ǝmǝnokal-net ǝd tamattay-net ketnet. Iɣrad-tan ahluk. Wǝr oyya awedan iddaran. Iga y ǝmǝnokal wa n Makeda awa as kala t-iga y ǝmǝnokal wa n Yerikaw.
29 Ifal Joswe ǝd maddanǝs n Israyil aɣrǝm wa n Makeda ǝkkan aɣrǝm wa n Labnan ǝggazzan-tu. 30 Iga Amaɣlol gǝr fassan-nasan aɣrǝm wa d ǝmǝnokal-net, ǝnɣan tamattay-net, wǝr oyyen awedan iddaran. Ǝgan y ǝmǝnokal-net ǝntada awa s kala t-ǝgan i wa n Yerikaw. 31 Ifal Joswe ǝd maddanǝs n Israyil aɣrǝm wa n Libna ǝkkan wa n Lakiš, ǝzzǝbben, ǝgan afarag y ǝɣrǝm, ǝggazan-tu. 32 Ɣur ǝzǝl-nasan wa n ǝššin d ǝmǝgǝr, iga Amaɣlol aɣrǝm wa n Lakiš gǝr fassan ǝn maddanǝs n Israyil. Ǝnɣan tamattay-net, wǝr oyyen awedan iddaran, s ǝmmǝk was t-ǝgan y aɣrǝm wa n Libna. 33 Amaran igla-du Horam imosan ǝmǝnokal ǝn Gezer, y ad idhǝl aɣrǝm wa n Lakiš. Mišan ǝnta harkid nammagaran-net as tan-irza Joswe. Wǝr d-oyyen awedan iddaran.
34 Ifal Joswe ǝd maddanǝs n Israyil kul aɣrǝm wa n Lakiš ǝkkan wa n Eglon, ǝzzǝbben ǝgan afarag y aɣrǝm, ǝggazan-tu. 35 Ǝbazan-tu ǝzǝl wǝdi da, ǝɣradan-tu ahluk ǝnta d awa t-ihan ketnet. Wǝr daɣ-as oyyen i iddaran. Ǝgan as awa daɣ ǝgan y ǝɣrǝm wa n Lakiš.
36 Ifal Joswe ǝd maddanǝs n Israyil aɣrǝm wa n Eglon ǝkkan aɣrǝm wa n Xebron ǝggazan-tu. 37 Ǝbazan-tu ǝnɣan ǝmǝnokal-net ǝd tamattay-net, ǝbazan deɣ šiɣarmaten šin fǝl ixkam ǝd tǝmattiwen-nasnat. Ǝhlakan deɣ tamattay n ǝɣrǝm wa n Xebron. Wǝr oyyen i iddaran, s ǝmmǝk was t-ǝgan y ǝɣrǝm wa n Eglon.
38 Dǝffǝr adi iqqal Joswe ǝd maddanǝs n Israyil kul daɣ ǝdǝriz-nasan, ǝkkan aɣrǝm wa n Debir, ǝggazan-tu.
39 Ǝbazan-tu ǝnta d ǝmǝnokal-net, ǝd tǝɣarmaten šin fǝl ixkam. Ǝhlakan šimattiwen-nasnat. Wǝr oyyen i iddaran. Iga Joswe i Debir d ǝmǝnokal-net awa daɣ iga i Xebron, d awa iga i Libna ǝd mǝnokalan-net.
40 Ibaz Joswe akal ketnet wa n agala; irza imǝnokalan ǝn ɣǝrman win ǝhanen idɣaɣan, ǝd win ǝxsarnen amadal wa n Negab sa sǝr agala, d akal wa irasan sa sǝr ataram, ǝd kallan win d-ǝbalnen y ǝdɣaɣan sa sǝr dǝnnǝg. Wǝr oyyen awedan iddaran. Ǝɣradan ahluk n awa t-illan isanfas, s ǝmmǝk was omar Amaɣlol, Ǝmǝli n Israyil.
41 Ikallan win obaz Joswe da, ǝmosan akal wa obazan ɣur Qadeš-Barneya har Gaza, d akal ketnet wa n Gošen har Gabawun. 42 Irza Joswe imǝnokalan win kul, ibaz-tan ibaz deɣ ikallan-nasan daɣ tǝnǝbuk iyyanda, fǝlas Amaɣlol Ǝmǝli n Israyil iman-net as immǝgar i tamattay-net.
43 Dǝffǝr adi, iqqal-du Joswe ǝd maddanǝs n Israyil ketnasan iɣawnatan-nasan daɣ Gilgal.